24 ವರ್ಷಗಳ ಹಿಂದಿನ ಕೇಸ್​​ನಲ್ಲಿ ರಾಜ್​ ಠಾಕ್ರೆಗೆ ಬಿಗ್‌ ರಿಲೀಫ್

ಮಹಾರಾಷ್ಟ್ರ ನವ ನಿರ್ಮಾಣ ಸೇನೆಯ ಅಧ್ಯಕ್ಷ ರಾಜ್​ ಠಾಕ್ರೆ 24 ವರ್ಷದ ಹಿಂದಿನ ಕೇಸ್​​ನಿಂದ ಮುಕ್ತಿ ಪಡೆದಿದ್ದಾರೆ. 24 ವರ್ಷಗಳ ಹಿಂದೆ ಅಂದಿನ ಶಿವ ಉದ್ಯೋಗ್​ ಸೇನೆಯ ಮುಖ್ಯಸ್ಥರಾಗಿದ್ದ ರಾಜ್​ ಠಾಕ್ರೆ ಮೈಕಲ್​ ಜಾಕ್ಸನ್​ರನ್ನ ಮಹಾರಾಷ್ಟ್ರಕ್ಕೆ ಕರೆಯಿಸಿ ಕಾನ್ಸರ್ಟ್​ ಒಂದನ್ನ ಆಯೋಜಿಸಿದ್ದರು.

ಈ ಕಾರ್ಯಕ್ರಮದ ತೆರಿಗೆ ವಿಚಾರವಾಗಿ ನಡೆಯುತ್ತಿದ್ದ ಕೇಸ್​​ 24 ವರ್ಷಗಳ ಬಳಿಕ ಮುಕ್ತಾಯಗೊಂಡಿದೆ. 1996ರಲ್ಲಿ ಅಂದಿನ ಶಿವಸೇನಾ ಸರ್ಕಾರ ಈ ಕಾರ್ಯಕ್ರಮಕ್ಕೆ ತೆರಿಗೆ ವಿನಾಯಿತಿ ನೀಡಿತ್ತು. ಆದರೆ ಸರ್ಕಾರದ ಈ ನಿರ್ಧಾರಕ್ಕೆ ಬಾಂಬೆ ಹೈಕೋರ್ಟ್ ನಿರ್ಬಂಧ ಹೇರಿತ್ತು.

ಇದೀಗ ಮತ್ತೊಮ್ಮೆ ಮಹಾರಾಷ್ಟ್ರದಲ್ಲಿ ಶಿವಸೇನೆ ಸರ್ಕಾರ ಅಧಿಕಾರದಲ್ಲಿದೆ. ಹೀಗಾಗಿ 24 ವರ್ಷದ ಹಿಂದಿನ ಕೇಸ್​ ಕೈಗೆತ್ತಿಕೊಂಡಿರುವ ಮಹಾರಾಷ್ಟ್ರ ಸರ್ಕಾರ 1996ರಲ್ಲಿ ಮುಂಬೈನಲ್ಲಿ ನಡೆದ ಸಂಗೀತ ಕಚೇರಿಗೆ ಮಂಜೂರು ಮಾಡಲಾಗಿದ್ದ ತೆರಿಗೆ ವಿನಾಯಿತಿಯನ್ನ ಪುನರ್​ ಸ್ಥಾಪಿಸಲು ನಿರ್ಧರಿಸಿದೆ.

ಇದರಿಂದಾಗಿ ಕಾರ್ಯಕ್ರಮದ ಆಯೋಜಕರಾದ ವಿಜ್​ಕ್ರಾಫ್ಟ್ ಇಂಟರ್​ನ್ಯಾಷನಲ್​ಗೆ 3 ಕೋಟಿ 36 ಲಕ್ಷ ರೂಪಾಯಿ ವಾಪಾಸ್​ ಸಿಗಲಿದೆ. ಈ ಹಣವನ್ನ ಕೋರ್ಟ್​ ಆದೇಶದ ಬಳಿಕ ಈ ಹಿಂದೆ ಅದಾಲತ್​ನ ಖಜಾನೆಗೆ ಆಯೋಜಕರು ಪಾವತಿಸಿದ್ದರು.