ದಿಢೀರ್ ಬದಲಾಯ್ತು ಎಐಸಿಸಿ ಅಧ್ಯಕ್ಷ ಸ್ಥಾನ ಚುನಾವಣೆ ಚಿತ್ರಣ: ಶಶಿ ತರೂರ್ ಗೆ ಕೈಕೊಟ್ಟು ಖರ್ಗೆ ಕ್ಯಾಂಪ್ ಸೇರಿದ G-23 ಸೇರಿ ಕಾಂಗ್ರೆಸ್ ಘಟಾನುಘಟಿ ನಾಯಕರು

ಎಐಸಿಸಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ ಶಶಿ ತರೂರ್ ನಾಮಪತ್ರಕ್ಕೆ ಸಹಿ ಹಾಕಲು ಮುಂದೆ ಬರದ G-23 ರ ಪ್ರಮುಖರಾದ ಭೂಪಿಂದರ್ ಸಿಂಗ್ ಹೂಡಾ, ಆನಂದ್ ಶರ್ಮಾ, ಮನೀಶ್ ತಿವಾರಿ ಮತ್ತು ಪೃಥ್ವಿರಾಜ್ ಚವಾಣ್ ಶುಕ್ರವಾರ ಮಲ್ಲಿಕಾರ್ಜುನ್ ಖರ್ಗೆ ಅವರ ಹಿಂದೆ ಒಟ್ಟುಗೂಡುವ ಮೂಲಕ ಮತ್ತು ಅವರ ನಾಮಪತ್ರಗಳಿಗೆ ಪ್ರತಿಪಾದಕರಾಗಿ ಸಹಿ ಹಾಕುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.

ಶಶಿ ತರೂರ್ ಜಿ -23 ನಾಯಕರೊಂದಿಗೆ ಗುರುತಿಸಿಕೊಂಡಿದ್ದರೂ, ಅವರ ನಾಮಪತ್ರಕ್ಕೆ ನಾಯಕರು ಸಹಿ ಹಾಕಿಲ್ಲ. ಪಕ್ಷದಲ್ಲಿ ಸುಧಾರಣೆ ಕೋರಿ 2020 ರಲ್ಲಿ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರಿಗೆ ಪತ್ರ ಬರೆದ 23 ನಾಯಕರ ಗುಂಪು ಅಖಿಲ ಭಾರತ ಕಾಂಗ್ರೆಸ್ ಸಮಿತಿ ಕಾರ್ಯಚಟುವಟಿಕೆಗಳ ಶೈಲಿಯ ಬಗ್ಗೆ ಟೀಕೆಗಳ ಹೊರತಾಗಿಯೂ ಕಾಂಗ್ರೆಸ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಖರ್ಗೆ ಜೊತೆಗೆ ನಿಂತಿದ್ದಾರೆ.

ನಾನು ಜಿ 23 ಪರವಾಗಿ ಸ್ಪರ್ಧಿಸುತ್ತಿಲ್ಲ ಅಥವಾ ಅವರಿಂದ ಅನುಮೋದನೆಯನ್ನು ಬಯಸುತ್ತಿಲ್ಲ. ನನ್ನ ಉಮೇದುವಾರಿಕೆಯು ಪಕ್ಷವನ್ನು ಪುನರುಜ್ಜೀವನಗೊಳಿಸುವ ಗುರಿಯನ್ನು ಹೊಂದಿದೆ ಹೊರತೂ ಅದನ್ನು ಅಡ್ಡಿಪಡಿಸಲು ಅಲ್ಲ ಎಂದು ಶಶಿ ತರೂರ್ ಹೇಳಿದ್ದಾರೆ.

ಮಾಜಿ ಲೋಕಸಭಾ ಸಂಸದ ಸಂದೀಪ್ ದೀಕ್ಷಿತ್ ಅವರು ತರೂರ್ ಅವರ ನಾಮನಿರ್ದೇಶನ ಪತ್ರಕ್ಕೆ ಸಹಿ ಮಾಡಿದ ಏಕೈಕ ಜಿ -23 ಸದಸ್ಯರಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ. G-23 ಮೂಲಗಳು ತರೂರ್ ಅವರನ್ನು ಗಂಭೀರ ಅಭ್ಯರ್ಥಿಯಾಗಿ ಪರಿಗಣಿಸಿಲ್ಲ.

ಸೋನಿಯಾ ಗಾಂಧಿ ಅವರು ಯಾವ ಅಭ್ಯರ್ಥಿಯನ್ನು ಬೆಂಬಲಿಸಿಲ್ಲ ಎಂದು ಮಲ್ಲಿಕಾರ್ಜುನ ಖರ್ಗೆ ಹೇಳಿದ್ದಾರೆ. ಆದರೆ, ಗಾಂಧಿ ಕುಟುಂಬದ ಬೆಂಬಲದೊಂದಿಗೆ ಖರ್ಗೆಯವರ ಪ್ರವೇಶ ಎಐಸಿಸಿ ಅಧ್ಯಕ್ಷ ಸ್ಥಾನದ ಚುನಾವಣೆ ಚಿತ್ರಣವನ್ನೇ ಬದಲಾಯಿಸಿದೆ.

ಖರ್ಗೆ ಅವರು ಸಲ್ಲಿಸಿರುವ ಮೂರು ಸೆಟ್‌ ಗಳ ನಾಮಪತ್ರಗಳಲ್ಲಿ ಮುಕುಲ್ ವಾಸ್ನಿಕ್, ಅಖಿಲೇಶ್ ಪ್ರಸಾದ್ ಸಿಂಗ್, ಹೂಡಾ, ಶರ್ಮಾ, ತಿವಾರಿ ಮತ್ತು ಚವಾಣ್ ಅವರ ಸಹಿ ಇದೆ. ಇವರೆಲ್ಲರೂ ಆಗಸ್ಟ್ 2020 ರಲ್ಲಿ ಸೋನಿಯಾ ಗಾಂಧಿಗೆ ಕಳುಹಿಸಲಾದ ಪತ್ರಕ್ಕೆ ಸಹಿ ಮಾಡಿದವರಲ್ಲಿ ಸೇರಿದ್ದಾರೆ. ಇನ್ನು ಎಐಸಿಸಿಯ ಪ್ರಮುಖರು ಕೂಡ ಖರ್ಗೆ ಅವರ ನಾಮಪತ್ರಕ್ಕೆ ಸಹಿ ಹಾಕಿದ್ದು, ಅವರೇ ಸ್ಥಾಪಿತ ಅಭ್ಯರ್ಥಿ ಎಂಬುದನ್ನು ಯಾವುದೇ ಸಂದೇಹವಿಲ್ಲದೆ ಸ್ಪಷ್ಟಪಡಿಸಿದ್ದಾರೆ. ಅವರ ಪ್ರತಿಪಾದಕರಲ್ಲಿ ಎಕೆ ಆಂಟನಿ, ಅಶೋಕ್ ಗೆಹ್ಲೋಟ್, ಅಂಬಿಕಾ ಸೋನಿ, ಅಭಿಷೇಕ್ ಸಿಂಘ್ವಿ, ಅಜಯ್ ಮಾಕನ್, ದಿಗ್ವಿಜಯ ಸಿಂಗ್ ಮತ್ತು ತಾರಿಕ್ ಅನ್ವರ್ ಸೇರಿದ್ದಾರೆ. ಇವರೆಲ್ಲರೂ ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ(ಸಿಡಬ್ಲ್ಯುಸಿ) ಸದಸ್ಯರಾಗಿದ್ದಾರೆ ಎನ್ನುವುದು ಮುಖ್ಯವಾಗಿದೆ.

ಎರಡನೇ ಸೆಟ್‌ನಲ್ಲಿ ಸಲ್ಮಾನ್ ಖುರ್ಷಿದ್, ದೀಪೇಂದರ್ ಹೂಡಾ, ವಿ. ನಾರಾಯಣಸಾಮಿ, ಪ್ರಮೋದ್ ತಿವಾರಿ, ಪಿಎಲ್ ಪುನಿಯಾ, ಅವಿನಾಶ್ ಪಾಂಡೆ, ರಾಜೀವ್ ಶುಕ್ಲಾ ಮತ್ತು ಸೈಯದ್ ನಾಸೀರ್ ಹುಸೇನ್ ಸಹಿ ಹಾಕಿದ್ದರು. ಇವರಲ್ಲಿ ಹೆಚ್ಚಿನವರು ಎಐಸಿಸಿ ಪದಾಧಿಕಾರಿಗಳು. ಇನ್ನು ಮೂರನೇ ಸೆಟ್‌ನಲ್ಲಿ ರಘುವೀರ್ ಸಿಂಗ್ ಮೀನಾ, ಧೀರಜ್ ಪ್ರಸಾದ್ ಸಾಹು, ತಾರಾಚಂದ್ ಭಾಗೋರಾ, ಕಮಲೇಶ್ವರ್ ಪಟೇಲ್, ಮೂಲಚಂದ್ ಮೀನಾ, ದಿಲೀಪ್ ಗುರ್ಜಾರ್, ಸಂಜಯ್ ಕಪೂರ್ ಮತ್ತು ವಿನೀತ್ ಪುನಿಯಾ ಸಹಿ ಹಾಕಿದ್ದಾರೆ.