ಪೆಪ್ಸಿಗೆ ಮೊದಲ 100 ಎಲೆಕ್ಟ್ರಿಕ್ ಟ್ರಕ್‌; ಟೆಸ್ಲಾ ಘೋಷಣೆ

ಟೆಸ್ಲಾ ಕಂಪನಿಯು ತಂಪು ಪಾನೀಯ ಕಂಪನಿ ಪೆಪ್ಸಿಗೆ ಈ ವರ್ಷದ ಡಿಸೆಂಬರ್‌ನಲ್ಲಿ 100 ಇವಿ ಟ್ರಕ್‌ಗಳನ್ನು ಸರಬರಾಜು ಮಾಡಲಿದೆ.

ಟೆಸ್ಲಾ ಸಿಇಒ ಎಲೋನ್ ಮಸ್ಕ್ ಶುಕ್ರವಾರ, ಟೆಸ್ಲಾ ತನ್ನ ಸೆಮಿ ಟ್ರಕ್‌ನ ತಯಾರಿಕೆಯನ್ನು ಪ್ರಾರಂಭಿಸಿದೆ, ಇದು 500 ಮೈಲುಗಳ (800 ಕಿಮೀ) ವ್ಯಾಪ್ತಿಯ ಮೈಲೇಜ್ ಹೊಂದಿರುತ್ತದೆ. ಮೊದಲು ಪೆಪ್ಸಿ ಕಾರ್ಯಾಚರಣೆಗೆ ನೀಡಲಾಗುತ್ತದೆ ಎಂದಿದ್ದಾರೆ.

ಡಿಸೆಂಬರ್ 1ರ ವೇಳೆಗೆ ಪೆಪ್ಸಿ ಕಂಪನಿಯು ಎಲೆಕ್ಟ್ರಿಕ್ ವಾಹನ ತಯಾರಕರಿಂದ ಮೊದಲ ಸೆಮಿ ಟ್ರಕ್‌ಗಳನ್ನು ಸ್ವೀಕರಿಸಲಿದೆ. ಡಿಸೆಂಬರ್ 1 ರಂದು ಪೆಪ್ಸಿಗೆ ಟ್ರಕ್ ವಿತರಣೆಯೊಂದಿಗೆ ಟೆಸ್ಲಾ ಸೆಮಿ ಟ್ರಕ್ ಉತ್ಪಾದನೆಯ ಪ್ರಾರಂಭವನ್ನು ಘೋಷಿಸಲು ಉತ್ಸುಕನಾಗಿದ್ದೇನೆ ಎಂದು ಅವರು ಟ್ವೀಟ್ ಮಾಡಿದ್ದಾರೆ.

500 ಮೈಲಿ ರೇಂಜ್ ಮತ್ತು ಚಾಲನೆ ಮಾಡಲು ಸೂಪರ್ ಫನ್ ಇರಲಿದೆ. 100 ಸೆಮಿ ಟ್ರಕ್‌ಗಳನ್ನು ಪೆಪ್ಸಿ ಡಿಸೆಂಬರ್ 2017ರಲ್ಲಿ ಆರ್ಡರ್ ಮಾಡಿತ್ತು.

ಮೂಲ ಮಾದರಿಯು 150,000 ಡಾಲರ್‌ನಂತೆ ನಿರೀಕ್ಷಿತ ಬೆಲೆಯಲ್ಲಿ ಬರುತ್ತದೆ. ದುಬಾರಿ ಮಾದರಿಯು 180,000 ಡಾಲರ್‌ನಿಂದ ಪ್ರಾರಂಭವಾಗುವ ನಿರೀಕ್ಷೆಯಿದೆ.

ಟೆಸ್ಲಾ ಪ್ರಕಾರ ಸೆಮಿ ಟ್ರಕ್ 20 ಸೆಕೆಂಡ್‌ಗಳಲ್ಲಿ ಗಂಟೆಗೆ ಶೂನ್ಯದಿಂದ 60 ಮೈಲುಗಳವರೆಗೆ ವೇಗವನ್ನು ಹೊಂದಬಹುದು, ಸಂಪೂರ್ಣವಾಗಿ ಲೋಡ್ ಆಗಿದ್ದರೂ ಮತ್ತು ಕಡಿದಾದ ಪ್ರದೇಶದಲ್ಲೂ ಸಹ ನಿರ್ವಹಿಸುತ್ತದೆ ಎಂದು ಟೆಸ್ಲಾ ಮುಖ್ಯಸ್ಥರು ಹೇಳಿಕೊಂಡಿದ್ದಾರೆ.

ವಾಹನವು ಕೇವಲ 30 ನಿಮಿಷಗಳಲ್ಲಿ ತನ್ನ ಪ್ರಯಾಣದ ಶ್ರೇಣಿಯ 70 ಪ್ರತಿಶತದಷ್ಟು ರೀಚಾರ್ಜ್ ಆಗುತ್ತದೆ. ಎಲ್ಲಾ ಪರಿಸ್ಥಿತಿಗಳಲ್ಲಿ ಪಿಕಪ್ ಮತ್ತು ಸ್ಥಿರತೆಯನ್ನು ನೀಡಲು ಸುಧಾರಿತ ಮೋಟಾರ್ ಮತ್ತು ಬ್ರೇಕ್ ನಿಯಂತ್ರಣಗಳೊಂದಿಗೆ ಪ್ರಮಾಣಿತ ಸುರಕ್ಷತಾ ವೈಶಿಷ್ಟ್ಯಗಳೊಂದಿಗೆ ಸೆಮಿ ಟ್ರಕ್ ಮಾರುಕಟ್ಟೆಗೆ ಬರುತ್ತದೆ.

ಡೀಸೆಲ್‌ನಿಂದ ತುಂಬುವುದಕ್ಕಿಂತ ಪ್ರತಿ ಮೈಲಿಗೆ ವಿದ್ಯುಚ್ಛಕ್ತಿಯೊಂದಿಗೆ ಚಾರ್ಜ್ ಮಾಡುವುದು ಸರಿಸುಮಾರು 2.5 ಪಟ್ಟು ಅಗ್ಗವಾಗಿರಲಿದೆ.