ಅತ್ಯಾಚಾರ ಎಸಗಿದ ಯುವತಿಯನ್ನೇ ಮದುವೆಯಾಗಿ ಆರೇ ತಿಂಗಳಲ್ಲಿ ಕೊಲೆ ಮಾಡಿದ ಪತಿ

ಮಹಿಳೆಯನ್ನ ಅತ್ಯಾಚಾರ ಮಾಡಿ ಬಳಿಕ ಆಕೆಯನ್ನೇ ವಿವಾಹವಾಗಿದ್ದ ವ್ಯಕ್ತಿ ಪತ್ನಿಯನ್ನ ಕೊಲೆ ಮಾಡಿ ಜೈಲು ಪಾಲಾಗಿದ್ದಾನೆ.

ಅತ್ಯಾಚಾರ ಎಸಗಿದ ಆರೋಪದ ಹಿನ್ನೆಲೆಯಲ್ಲಿ ಆರೋಪಿ ಕಳೆದ ವರ್ಷ ಡಿಸೆಂಬರ್​ನಲ್ಲಿ ಸಂತ್ರಸ್ತೆಯನ್ನು ವಿವಾಹವಾಗಿದ್ದ. ಮದುವೆಯಾಗಿ ಆರು ತಿಂಗಳಲ್ಲೇ ಪತ್ನಿಯನ್ನೇ ಕೊಲೆ ಮಾಡಿ ಆಕೆಯ ಶವವನ್ನ ನೈನಿತಾಲ್​ – ಹಲ್ದ್ವಾನಿ ಹೆದ್ದಾರಿಯಲ್ಲಿ ಎಸೆದಿದ್ದ ಎನ್ನಲಾಗಿದೆ.

ಪ್ರಕರಣ ಸಂಬಂಧ ಪೊಲೀಸರ ತಂಡದ ಮುಂದಾಳತ್ವ ವಹಿಸಿದ್ದ ಎಸ್​ಐ ನರೇಂದ್ರ ಸಿಂಗ್​ ಈ ವಿಚಾರವಾಗಿ ಮಾತನಾಡಿದ್ದು, ಅತ್ಯಾಚಾರ ಎಸಗಿದ್ದ ಆರೋಪದಡಿಯಲ್ಲಿ ಈ ಆರೋಪಿಯನ್ನ ಬಂಧಿಸಿ ಜೈಲಿಗಟ್ಟಲಾಗಿತ್ತು. ಇದಾದ ಬಳಿಕ ತಾನು ಬಬಿತಾಳನ್ನೇ ವಿವಾಹವಾಗುತ್ತೇನೆ ಎಂದು ರಾಜೇಶ್​​ ಅಫಿಡವಿಡ್​​ ಸಲ್ಲಿಸಿದ ಬಳಿಕ ರಾಜೇಶ್​ರನ್ನ ಜೈಲಿನಿಂದ ಹೊರಗೆ ಬಂದಿದ್ದ. ಇವರಿಬ್ಬರು ಕಳೆದ ವರ್ಷ ಡಿಸೆಂಬರ್​ನಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು. ಆದರೆ ಕಳೆದ ತಿಂಗಳು ಬಬಿತಾ ಕುಟುಂಬಸ್ಥರು ಆಕೆ ನಾಪತ್ತೆಯಾಗಿದ್ದಾಳೆ ಎಂದು ಪ್ರಕರಣ ದಾಖಲಿಸಿದ್ದರು ಎಂದು ಮಾಹಿತಿ ನೀಡಿದ್ರು.

ಜೂನ್​ 11ನೇ ತಾರೀಖಿನಂದು ಬಬಿತಾ ಕಾಣೆಯಾಗಿದ್ದಾಳೆ ಎಂದು ದೆಹಲಿಯ ದ್ವಾರಕಾ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ಇದಾದ ಬಳಿಕ ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಆಕೆಯ ಫೋನ್​ ಕಾಲ್​ಗಳನ್ನ ಆಲಿಸಿದ್ದಾರೆ. ಈ ಮೊಬೈಲ್​ ಫೋನ್​ನಲ್ಲಿ ಕೊನೆಯ ಲೊಕೇಷನ್​ ಜೂನ್​ 12ನೇ ತಾರೀಖನ್ನು ತೋರಿಸುತ್ತಿತ್ತು. ಈಕೆ ನೈನಿತಾಲ್​​ನ ಹನುಮಾನ್​ಗಢ್ ದೇವಸ್ಥಾನದಲ್ಲಿ ಕೊನೆಯ ಸ್ಥಳ ತೋರಿಸುತ್ತಿತ್ತು. ವಿಪರ್ಯಾಸ ಅಂದರೆ ಇದೇ ಸಮಯದಲ್ಲಿ ರಾಜೇಶ್​ ಮೊಬೈಲ್​ನಲ್ಲೂ ಇದೇ ಸ್ಥಳ ತೋರಿಸಿದೆ. ಇದಾದ ಬಳಿಕ ರಾಜೇಶ್​ಗೆ ಪೊಲೀಸರು ಡ್ರಿಲ್​ ಮಾಡುತ್ತಿದ್ದಂತೆಯೇ ಆತ ತಾನೇ ಕೊಲೆ ಮಾಡಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾನೆ.

ಬಬಿತಾ ಹಾಗೂ ಆಕೆಯ ತಾಯಿ ನನಗೆ ಹಿಂಸೆ ನೀಡುತ್ತಿದ್ದರು ಹೀಗಾಗಿ ನಾನು ಪತ್ನಿಯನ್ನ ಕೊಲೆ ಮಾಡಿದ್ದಾಗಿ ಪೊಲೀಸರ ಎದುರು ರಾಜೇಶ್​ ತಪ್ಪೊಪ್ಪಿಕೊಂಡಿದ್ದಾನೆ.