ಪ್ರಸಿದ್ಧ ಬಿಸ್ಕಟ್ ಕಂಪನಿಗಳಲ್ಲಿ ಒಂದಾದ ಸನ್ಫೀಸ್ಟ್ ಮಾರಿ ಲೈಟ್ನ ಪ್ಯಾಕೇಟ್ನ ಮೇಲೆ ನಮೂದಾಗಿದ್ದ ಬಿಸ್ಕೆಟ್ ಸಂಖ್ಯೆಗಳಿಗಿಂತ ಒಂದು ಬಿಸ್ಕೆಟ್ ಕಡಿಮೆ ಇದೆ ಎಂಬ ದೂರು ನೀಡಿದ ವ್ಯಕ್ತಿಗೆ ತಿರವಳ್ಳೂರು ಜಿಲ್ಲಾ ಗ್ರಾಹಕರ ವೇದಿಕೆಯು 1 ಲಕ್ಷ ರೂಪಾಯಿ ಪರಿಹಾರ ನೀಡುವಂತೆ ಐಟಿಸಿ ಲಿಮಿಟೆಡ್ ಫುಡ್ ವಿಭಾಗಕ್ಕೆ ಸೂಚನೆ ನೀಡಿದೆ. ಗ್ರಾಹಕ ಖರೀದಿ ಮಾಡಿದ್ದ ಬಿಸ್ಕಟ್ ಪ್ಯಾಕೇಟ್ನಲ್ಲಿ 16 ಬಿಸ್ಕಟ್ಗಳ ಬದಲು 15 ಬಿಸ್ಕಟ್ಗಳು ಇದ್ದವು ಎನ್ನಲಾಗಿದೆ.
ಈ ಪ್ರಕರಣ ಸಂಬಂಧ ಆದೇಶ ಹೊರಡಿಸಿದ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆಯು, ಸನ್ಫೀಸ್ಟ್ ಬಿಸ್ಕತ್ ಬ್ಯಾಚ್ ನಂ.0502C36ರ ಎಲ್ಲಾ ಬಿಸ್ಕಟ್ ಪ್ಯಾಕುಗಳ ಮಾರಾಟವನ್ನು ನಿಲ್ಲಿಸುವಂತೆ ಕಂಪನಿಗೆ ಸೂಚನೆ ನೀಡಿದೆ. ಬಿಸ್ಕಟ್ನ ತೂಕ ಸಮಾನಾಗಿದೆ ಎಂಬ ಕಂಪನಿಯ ವಾದವನ್ನು ತಳ್ಳಿ ಹಾಕಿದ ಗ್ರಾಹಕರ ವೇದಿಕೆಯು ದೂರುದಾರರಾದ ಚೆನ್ನೈನ ಪಿ ದಿಲ್ಲಿ ಬಾಬುರಿಗೆ ಪರಿಹಾರ ನೀಡುವಂತೆ ಸೂಚಿಸಿದೆ.
ಈ ಬಿಸ್ಕಟ್ಗಳನ್ನು ತೂಕದ ಆಧಾರದ ಮೇಲೆ ಮಾರಾಟ ಮಾಡಿದ್ದೇವೆಯೇ ಹೊರತು ಬಿಸ್ಕಟ್ಗಳ ಸಂಖ್ಯೆಯನ್ನು ಆಧರಿಸಿಲ್ಲ ಎಂದು ಕಂಪನಿ ಪರ ವಕೀಲರು ವಾದಿಸಿದ್ದಾರೆ. ಆದರೆ ಬಿಸ್ಕಟ್ ಮೇಲೆ ನಮೂದಾದ ಜಾಹೀರಾತನ್ನು ಪೂರೈಸುವುದು ಕಂಪನಿ ಜವಾಬ್ದಾರಿಯಾಗಿದೆ ಎಂದು ಹೇಳಿದ ಗ್ರಾಹಕ ರಕ್ಷಣಾ ವೇದಿಕೆಯು ವಕೀಲರ ವಾದವನ್ನು ತಳ್ಳಿ ಹಾಕಿದೆ.
ಗ್ರಾಹಕನನ್ನು ಸಂತೃಪ್ತಿಪಡಿಸುವಲ್ಲಿ ಲೇಬಲ್ಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಹೀಗಾಗಿ ಲೇಬಲ್ನಲ್ಲಿ ನಮೂದಾದ ಎಲ್ಲಾ ಮಾಹಿತಿಗಳನ್ನು ಕಂಪನಿಯು ಪೂರೈಸಲೇಬೇಕು ಎಂದು ಹೇಳಿದೆ.
Loading ...