ಕಲಾ – ವಾಣಿಜ್ಯ ವಿಭಾಗದಲ್ಲಿ ವ್ಯಾಸಂಗ ಮಾಡಿದವರಿಗೂ ಐಐಟಿಯಲ್ಲಿ ಅವಕಾಶ: ಇಲ್ಲಿದೆ ಪ್ರವೇಶಾತಿ ಕುರಿತ ಸಂಪೂರ್ಣ ಮಾಹಿತಿ

ಐಐಟಿಯಲ್ಲಿ ಪ್ರವೇಶ ಪಡೆಯಬೇಕು ಎನ್ನುವುದು ಪ್ರತಿಯೊಬ್ಬ ದೇಶದ ಇಂಜಿನಿಯರ್​​ ಆಕಾಂಕ್ಷಿಯ ಕನಸು ಎಂದು ಹೇಳಿದರೆ ತಪ್ಪಾಗಲಾರದು. ಐಐಟಿ ಬ್ರ್ಯಾಂಡ್​ ಹೆಸರು ಸಿಗುತ್ತೆ ಅಂದರೆ ಬೇಡ ಎಂದು ಹೇಳಲು ಯಾರೂ ತಯಾರಿರುವುದಿಲ್ಲ.

ಆದರೆ ಸೈನ್ಸ್​ ಬಿಟ್ಟು ಬೇರೆ ವಿಭಾಗಗಳಲ್ಲಿ ವ್ಯಾಸಂಗ ಮಾಡಿದ ವಿದ್ಯಾರ್ಥಿಗಳಿಗೆ ಐಐಟಿ ಅನ್ನೋದು ಕೇವಲ ಕನಸು ಎಂಬತಾಗಿತ್ತು. ಆದರೆ ಕಲಾ, ವಾಣಿಜ್ಯ ವಿಭಾಗದಲ್ಲಿ ವ್ಯಾಸಂಗ ಮಾಡಿದವರು ಕೂಡ ಐಐಟಿ ಪ್ರವೇಶ ಮಾಡಲು ಅನೇಕ ಮಾರ್ಗಗಳಿವೆ. ಕಲಾ ಹಾಗೂ ವಾಣಿಜ್ಯ ವಿಭಾಗದಿಂದ ಬಂದವರು ವಿನ್ಯಾಸ, ಮ್ಯಾನೇಜ್​ಮೆಂಟ್​ ಸೇರಿದಂತೆ ಇತರೆ ವಿಭಾಗಗಳಲ್ಲಿ ವ್ಯಾಸಂಗ ಮಾಡಬಹುದಾಗಿದೆ.

ಬ್ಯಾಚುಲರ್ ಆಫ್​ ಡಿಸೈನ್​

ಬ್ಯಾಚುಲರ್​ ಆಫ್​ ಡಿಸೈನ್​​ ಎನ್ನುವುದು ನಾಲ್ಕು ವರ್ಷಗಳ ಪದವಿಪೂರ್ವ ಕಾರ್ಯಕ್ರಮವಾಗಿದೆ. ಈ ವಿಭಾಗದಲ್ಲಿ ವಿದ್ಯಾರ್ಥಿಗಳು ಡಿಸೈನ್​, ಫೋಟೋಗ್ರಫಿ ಸೇರಿದಂತೆ ಸಾಕಷ್ಟು ವಿಷಯಗಳನ್ನು ಕಲಿಸಲಾಗುತ್ತದೆ. ಸಾಮಾನ್ಯ ಪ್ರವೇಶ ಪರೀಕ್ಷೆ (UCEED) ಮೂಲಕ ಈ ಕೋರ್ಸ್​ಗೆ ಪ್ರವೇಶ ಪಡೆಯಬಹುದಾಗಿದೆ. ಐಐಟಿ ಮುಂಬೈ ರಾಷ್ಟ್ರ ಮಟ್ಟದ ಪ್ರವೇಶ ಪರೀಕ್ಷೆಯನ್ನು ಆಯೋಜಿಸುತ್ತದೆ.

ಪ್ರಸ್ತುತ ಐಐಟಿ ಮುಂಬೈ( 37 ಸೀಟು), ಐಐಟಿ ಹೈದರಾಬಾದ್​(20 ಸೀಟುಗಳು) ಹಾಗೂ ಐಐಟಿ ಗುವಾಹಟಿ (56 ಸೀಟುಗಳು)ಯಲ್ಲಿ ವಿದ್ಯಾರ್ಥಿಗಳು ಈ ಕೋರ್ಸ್​ನ್ನು ವ್ಯಾಸಂಗ ಮಾಡಬಹುದಾಗಿದೆ. ಮುಂದಿನ ಶೈಕ್ಷಣಿಕ ವರ್ಷದಿಂದ ಐಐಟಿ ದೆಹಲಿಯಲ್ಲಿ ಬ್ಯಾಚುಲರ್​ ಆಫ್​ ಡಿಸೈನ್​ ಕೋರ್ಸ್​ ಲಭ್ಯವಿರಲಿದೆ.

ಅರ್ಹತಾ ಮಾನದಂಡ : 24 ವರ್ಷದ ಒಳಗಾಗಿ 12ನೇ ತರಗತಿಯಲ್ಲಿ ಉತ್ತೀರ್ಣರಾದವರು ಈ ಕೋರ್ಸ್​ಗೆ ಸೇರಲು ಪ್ರವೇಶ ಪರೀಕ್ಷೆಯನ್ನು ಎದುರಿಸಬಹುದಾಗಿದೆ.

ಮಾಸ್ಟರ್​ ಆಫ್​ ಡಿಸೈನ್​

ಮಾಸ್ಟರ್​ ಆಫ್​ ಡಿಸೈನ್​​ 2 ವರ್ಷಗಳ ಸ್ನಾತಕೋತ್ತರ ಪದವಿಯಾಗಿದೆ. ಆಸಕ್ತ ವಿದ್ಯಾರ್ಥಿಗಳು CEED ಮೂಲಕ ಈ ಐಐಟಿ ಕೋರ್ಸ್​ಗೆ ದಾಖಲಾತಿ ಪಡೆಯಬಹುದಾಗಿದೆ.

ಜಬಲ್ಪುರ ಸೇರಿದಂತೆ ದೇಶದ ಆರು ಐಐಟಿಗಳಲ್ಲಿ ಈ ಕೋರ್ಸ್ ಲಭ್ಯವಿದೆ. ಬಾಂಬೆ, ಹೈದರಾಬಾದ್​, ಗುವಾಹಟಿ, ದೆಹಲಿ, ಕಾನ್ಪುರ ಐಐಟಿಯಲ್ಲಿ ಈ ಸ್ನಾತಕೋತ್ತರ ಪದವಿಯನ್ನು ಮಾಡಬಹುದಾಗಿದೆ.

ಅರ್ಹತಾ ಮಾನದಂಡ : ಡಿಗ್ರಿ, ಡಿಪ್ಲೋಮಾ ಅಥವಾ ಸ್ನಾತಕೋತ್ತರ ಪದವಿ ಪೂರೈಸಿದ ಯಾವುದೇ ಅಭ್ಯರ್ಥಿಯು ಈ ಕೋರ್ಸ್​ಗೆ ಅರ್ಜಿ ಸಲ್ಲಿಸಬಹುದಾಗಿದೆ. ಜಿಡಿ ಆರ್ಟ್ಸ್​ ಡಿಪ್ಲೋಮಾ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ಅಭ್ಯರ್ಥಿಗಳೂ ಸಹ ಈ ಪರೀಕ್ಷೆಯನ್ನು ಎದುರಿಸಬಹುದಾಗಿದೆ.

ಎಂಎ ಸ್ಪೆಷಲೈಸೇಷನ್​

ಭಾಷಾ ವಿಷಯ, ಸೋಶಿಯಲ್​ ವರ್ಕ್​, ರಾಜಕೀಯ ಶಾಸ್ತ್ರ, ಸಮಾಜಶಾಸ್ತ್ರ, ಭೌಗೋಳಿಕ ಶಾಸ್ತ್ರ, ತತ್ವಶಾಸ್ತ್ರದ ವಿಭಾಗಗಳಲ್ಲಿ 2 ವರ್ಷಗಳ ಕಾಲ ಎಂಎ ವ್ಯಾಸಂಗ ಮಾಡಬಹುದಾಗಿದೆ.

ಐಐಟಿ ಗಾಂಧಿನಗರ, ಐಐಟಿ ಮದ್ರಾಸ್​ ಹಾಗೂ ಐಐಟಿ ಗುವಾಹಟಿಯಲ್ಲಿ ಈ ಸ್ನಾತಕೋತ್ತರ ಪದವಿ ಪಡೆಯಬಹುದು.

ಅರ್ಹತಾ ಮಾನದಂಡ : ಮಾನ್ಯತೆ ಪಡೆದ ವಿಶ್ವವಿದ್ಯಾಲಯದಲ್ಲಿ ಪದವಿ ಪೂರ್ಣಗೊಳಿಸಿದ ವಿದ್ಯಾರ್ಥಿಗಳು ಈ ಎಂಎಗೆ ಅರ್ಜಿ ಸಲ್ಲಿಸಬಹುದಾಗಿದೆ.

ಮಾಸ್ಟರ್​ ಆಫ್​ ಬ್ಯಸಿನೆಸ್​ ಅಡ್ಮಿನಿಸ್ಟ್ರೇಷನ್​

ಎಂಬಿಎ ಪ್ರವೇಶ ಪಡೆಯಲು ಇಚ್ಛಿಸುವ ವಿದ್ಯಾರ್ಥಿಗಳು ಐಐಟಿಯಲ್ಲಿ ವ್ಯಾಸಂಗ ಮಾಡಬಹುದಾಗಿದೆ. CATನಲ್ಲಿ ಅಭ್ಯರ್ಥಿಯ ಕಾರ್ಯಕ್ಷಮತೆಯನ್ನು ಆಧರಿಸಿ ಈ ಕೋರ್ಸ್​ಗೆ ಪ್ರವೇಶ ನೀಡಲಾಗುತ್ತದೆ.

ಪ್ರಸ್ತುತ ಐಐಟಿ ಮುಂಬೈ, ಐಐಟಿ ದೆಹಲಿ, ಐಐಟಿ ಮದ್ರಾಸ್​, ಐಐಟಿ ರೂರ್ಕಿ, ಐಐಟಿ ಕಾನ್ಪುರ, ಐಐಟಿ ಧನ್​ಬಾದ್​, ಐಐಟಿ ಖರಗ್​ಪುರ, ಹಾಗೂ ಐಐಟಿ ಜೋಧ್ಪುರದಲ್ಲಿ ಎಂಬಿಎ ವ್ಯಾಸಂಗ ಮಾಡಬಹುದಾಗಿದೆ.