ಸಿರಿಯಾ, ಇರಾಕ್ ನಲ್ಲಿ 16 ಉಗ್ರರ ಹತ್ಯೆ

ಅಂಕಾರಾ : ಉತ್ತರ ಇರಾಕ್ ಮತ್ತು ಉತ್ತರ ಸಿರಿಯಾದಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಟರ್ಕಿಯ ಸೇನೆಯು ಒಟ್ಟು 16 ಭಯೋತ್ಪಾದಕರನ್ನು ಹತ್ಯೆ ಮಾಡಿದೆ ಎಂದು ದೇಶದ ರಕ್ಷಣಾ ಸಚಿವಾಲಯ ಭಾನುವಾರ ತಿಳಿಸಿದೆ.

ಉತ್ತರ ಇರಾಕ್ ನ ಹಕುರ್ಕ್, ಗಾರಾ ಮತ್ತು ಅಸೋಸ್ ಪ್ರದೇಶಗಳಲ್ಲಿ ಟರ್ಕಿಯ ಪಡೆಗಳು ನಿಷೇಧಿತ ಕುರ್ದಿಸ್ತಾನ್ ವರ್ಕರ್ಸ್ ಪಾರ್ಟಿಯ (ಪಿಕೆಕೆ)  ಸದಸ್ಯರನ್ನು ಕೊಂದಿವೆ ಎಂದು ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ.

ಟರ್ಕಿಯ ಸೇನೆಯು 2016 ರಲ್ಲಿ ಆಪರೇಷನ್ ಯೂಫ್ರೆಟಿಸ್ ಶೀಲ್ಡ್, 2018 ರಲ್ಲಿ ಆಪರೇಷನ್ ಆಲಿವ್ ಬ್ರಾಂಚ್, 2019 ರಲ್ಲಿ ಆಪರೇಷನ್ ಪೀಸ್ ಸ್ಪ್ರಿಂಗ್ ಮತ್ತು 2020 ರಲ್ಲಿ ಉತ್ತರ ಸಿರಿಯಾದಲ್ಲಿ ಆಪರೇಷನ್ ಸ್ಪ್ರಿಂಗ್ ಶೀಲ್ಡ್ ಅನ್ನು ಪ್ರಾರಂಭಿಸಿತು. ಟರ್ಕಿ, ಯುನೈಟೆಡ್ ಸ್ಟೇಟ್ಸ್ ಮತ್ತು ಯುರೋಪಿಯನ್ ಯೂನಿಯನ್ ಭಯೋತ್ಪಾದಕ ಸಂಘಟನೆ ಎಂದು ಪಟ್ಟಿ ಮಾಡಿರುವ ಪಿಕೆಕೆ ಮೂರು ದಶಕಗಳಿಂದ ಟರ್ಕಿ ಸರ್ಕಾರದ ವಿರುದ್ಧ ದಂಗೆ ಎದ್ದಿದೆ.