ಬಡರಾಷ್ಟ್ರಗಳ ಆರೋಗ್ಯ ಸಂರಕ್ಷಣೆ ವಿಚಾರದಲ್ಲಿ ಸೀರಂ ಕಂಪನಿ ಪಾತ್ರದ ಬಗ್ಗೆ ವಿವರಿಸಿದ ಸೈರಸ್​ ಪೂನವಾಲ

ಕೋವಿಶೀಲ್ಡ್​ ಲಸಿಕೆಯ ತಯಾರಕ ಕಂಪನಿಯಾದ ಸೀರಮ್​ ಇನ್​ಸ್ಟಿಟ್ಯೂಟ್ ಆಫ್​ ಇಂಡಿಯಾದ ಅಧ್ಯಕ್ಷರಾದ ಸೈರಸ್​ ಪೂನವಾಲ ವಿಶ್ವದಲ್ಲಿ ಮೂರರಲ್ಲಿ ಎರಡು ಶಿಶು ನಮ್ಮ ಕಂಪನಿಯ ಒಂದು ಅಥವಾ ಅದಕ್ಕೂ ಹೆಚ್ಚಿನ ಲಸಿಕೆಗಳಿಂದ ಸಂರಕ್ಷಿಸಲ್ಪಟ್ಟಿದೆ ಎಂದು ಹೇಳಿದ್ದಾರೆ.

ನಿನ್ನೆ ನಡೆದ ಪುಣೆ ಇಂಟರ್​ನ್ಯಾಷನಲ್​ ಬ್ಯುಸಿನೆಸ್​ ಶೃಂಗಸಭೆಯಲ್ಲಿ ಈ ವಿಚಾರವಾಗಿ ಮಾತನಾಡಿದ ಪದ್ಮಭೂಷಣ ಪುರಸ್ಕೃತ ಸೈರಸ್​ ಪೂನವಾಲ, ನಮ್ಮ ಕಂಪನಿಯ ಡೋಸ್​ಗಳು ಒಂದು ಕಪ್​ ಚಹಾದ ಬೆಲೆಗೆ ಮಾರಾಟವಾಗುತ್ತಿರೋದ್ರಿಂದ ವಿಶ್ವದ ಬಹುತೇಕ ಬಡ ರಾಷ್ಟ್ರಗಳು ನಮ್ಮ ಕಂಪನಿಯ ಲಸಿಕೆಗಳನ್ನೇ ಬಳಸುತ್ತಿವೆ ಎಂದು ಹೇಳಿದರು.

ನಮ್ಮ ಕಂಪನಿಯ ಹೆಚ್ಚಿನ ಲಸಿಕೆಗಳನ್ನು ಬಡರಾಷ್ಟ್ರಗಳು ಬಳಕೆ ಮಾಡುತ್ತಿವೆ. ಯುನಿಸೆಫ್​ ಹಾಗೂ ಇತರೆ ಲೋಕೋಪಕಾರಿ ಸಂಸ್ಥೆಗಳು ನಮ್ಮ ಕಂಪನಿಯ ಲಸಿಕೆಗಳಿಗೆ ಹೆಚ್ಚು ಆದ್ಯತೆ ನೀಡುತ್ತಿವೆ. ನಮ್ಮ ಸಿಬ್ಬಂದಿ ಹಾಗೂ ವಿಜ್ಞಾನಿಗಳ ಸಹಾಯದಿಂದ ನಿರ್ಮಾಣವಾದ ಲಸಿಕೆಗಳನ್ನು ಒಂದು ಕಪ್​ ಚಹಾದ ಬೆಲೆಗೆ ಕೈಗೆಟುಕುವಂತೆ ಮಾಡಿದ್ದರಿಂದ ವಿಶ್ವದ ಬಹುತೇಕ ರಾಷ್ಟ್ರಗಳು ಔಷಧಿ ವಿಚಾರದಲ್ಲಿ ಸ್ವಾವಲಂಬಿಯಾಗಿ ಇರಬಹುದಾಗಿದೆ ಎಂದು ಹೇಳಿದರು.