‘ತರಕಾರಿ’ಗಳನ್ನು ಯಾವ ರೀತಿ ಬೇಯಿಸಬೇಕು…? ಇಲ್ಲಿದೆ ಟಿಪ್ಸ್

ಅಡುಗೆ ಸ್ವಲ್ಪ ಏರುಪೇರಾದರೂ ತಿನ್ನುವವರು ಮೂಗು ಮುರಿಯುತ್ತಾರೆ. ಆದ್ದರಿಂದ ಅಡುಗೆ ತಯಾರಿಸುವಾಗ ಅದರಲ್ಲೂ ತರಕಾರಿಗಳನ್ನು ಬೇಯಿಸುವಾಗ ಯಾವ ರೀತಿ ಕೇರ್ ತೆಗೆದುಕೊಳ್ಳಬೇಕು ಅಂತ ತಿಳಿಯೋಣ.

* ಹಾಗಲಕಾಯಿ, ತೊಂಡೆಕಾಯಿ, ಹೀರೆಕಾಯಿ ಮುಂತಾದ ಹಸಿರು ತರಕಾರಿಗಳನ್ನು ಬಣ್ಣ ಮಾಸದಂತೆ, ತೀರಾ ಮೆತ್ತಗಾಗದಂತೆ ಬೇಯಿಸಬೇಕು ಎಂದಾಗ ಸ್ವಲ್ಪ ಸಕ್ಕರೆ ಹಾಕಿ ಬೇಯಿಸಿದರೆ ತರಕಾರಿ ಬಣ್ಣ ಮಾಸುವುದಿಲ್ಲ.

* ಬಟಾಣಿ, ಅವರೆ, ತೊಗರಿ ಮುಂತಾದ ಕಾಳುಗಳನ್ನು ಬೇಯಿಸುವಾಗ ಚಿಟಕಿ ಅರಿಶಿನ ಹಾಗೂ 2 ಹನಿ ಬಾದಾಮಿ ಎಣ್ಣೆಯನ್ನು ಹಾಕಿ ಬೇಯಿಸಿ. ಅದರಿಂದ ಕಾಳುಗಳು ತಾಜಾ ರೀತಿಯಾಗಿಯೇ, ತೀರಾ ಮೆತ್ತಗೆ ಆಗದೆ ಉಂಡೆಯಾಗಿ ಉಳಿದುಕೊಳ್ಳುತ್ತವೆ.

*ಯಾವುದೇ ರೀತಿಯ ಸೊಪ್ಪು ಬೇಯಿಸುವಾಗ ಒಂದು ಚಮಚ ಅಡುಗೆ ಎಣ್ಣೆ ಹಾಕಿದರೆ ಬಣ್ಣ ಮಾಸುವುದಿಲ್ಲ.

* ತರಕಾರಿಗಳನ್ನು ಬೇಯಿಸುವ ಮೊದಲು ಸ್ವಲ್ಪ ಎಣ್ಣೆಯಲ್ಲಿ ಕರಿದು ನಂತರ ನೀರಿನಲ್ಲಿ ಹಾಕಿ ಬೇಯಿಸಿದರೆ ಪಾತ್ರೆ ತಳ ಹಿಡಿಯುವುದಿಲ್ಲ. ಅದಲ್ಲದೇ ಕಡಿಮೆ ಸಮಯದಲ್ಲಿಯೇ ಬೇಯುತ್ತದೆ.

* ಎಣ್ಣೆಯಲ್ಲಿ ಕರಿಯುವ ಕೆಲ ಪದಾರ್ಥಗಳು ಬಾಣಲೆಗೆ ಹಿಡಿದುಕೊಂಡಿರುತ್ತದೆ. ಅದನ್ನು ಉಜ್ಜುವುದು ಕಷ್ಟವಾಗುತ್ತದೆ. ತಳ ಹಿಡಿದ ಬಾಣಲೆಗೆ ತಣ್ಣನೆಯ ನೀರು ಹಾಕಿ 5 ನಿಮಿಷ ನೆನಸಿಡಬೇಕು. ನಂತರ ತೊಳೆದರೆ ಸುಲಭವಾಗಿ ಶುಚಿಯಾಗುತ್ತದೆ.

* ಹಾಲನ್ನು ಕಾಯಿಸುವಾಗ ಪಾತ್ರೆಯ ತುದಿಗೆ ಎಣ್ಣೆಯನ್ನು ಸವರಿ ಇಟ್ಟರೆ ಉಕ್ಕಿ ಕೆಳಗೆ ಚೆಲ್ಲುವುದಿಲ್ಲ.

* ಅಡುಗೆ ಮನೆಯಲ್ಲಿ ಎಣ್ಣೆ ಅಥವಾ ತುಪ್ಪ ಚೆಲ್ಲಿದ್ದರೆ ಚಿಂತೆ ಮಾಡಬೇಡಿ. ಬಿದ್ದ ಜಾಗಕ್ಕೆ ಬ್ಲೀಚಿಂಗ್‌ ಪೌಡರ್‌ ಹಾಕಿ ಕ್ಲೀನ್‌ ಮಾಡಿ.