ಬಾಲಿವುಡ್ನ ಎವರ್ಗ್ರೀನ್ ಹೀರೋ ದೇವ್ ಆನಂದ್ ಬಗ್ಗೆ ನೀವು ಕೇಳಿರಬಹುದು. 100ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದ ದೇವ್ ಆನಂದ್ ಒಂದು ಕಾಲದಲ್ಲಿ ಯುವತಿಯರ ನಿದ್ದೆ ಕದ್ದಿದ್ದಂತಹ ಚೆಲುವಾಂತ ನಟ. ದೇವ್ ಆನಂದ್ ನಟಿಸಿರುವ ಹರೇ ಕೃಷ್ಣ ಹರೇ ನಾಮ್, ದೇಸ್ ಪರದೇಸ್ನಂತಹ ಸಿನಿಮಾಗಳು ಈಗಲೂ ಕೂಡ ಸಿನಿಪ್ರಿಯರ ಮನದಲ್ಲಿ ಜೀವಂತವಾಗಿದೆ. ಅಂದಹಾಗೆ ಈ ನಟನಿಗೆ ಕೋರ್ಟ್ ಒಂದು ಸಾರ್ವಜನಿಕವಾಗಿ ನೀವು ಎಲ್ಲಿಯೂ ಕಪ್ಪು ಬಣ್ಣದ ಕೋಟ್ ಧರಿಸಬಾರದು ಎಂದು ತಾಕೀತು ಮಾಡಿತ್ತು ಎಂಬ ವಿಚಾರ ನಿಮಗೆ ತಿಳಿದಿದೆಯೇ..?
ಹೌದು…! ಇಂತಹದ್ದೊಂದು ಘಟನೆಯು ಬಾಲಿವುಡ್ನಲ್ಲಿ ನಡೆದಿತ್ತು ಎನ್ನಲಾಗಿದೆ. ದೇವ್ ಆನಂದ್ ಎಷ್ಟರ ಮಟ್ಟಿಗೆ ಫೇಮಸ್ ಆಗಿದ್ದ ನಟ ಅಂದರೆ ಮಹಿಳಾ ಅಭಿಮಾನಿಗಳು ಇವರನ್ನು ಕಪ್ಪು ಬಣ್ಣದ ಕೋಟ್ನಲ್ಲಿ ನೋಡಲು ಮುಗಿಬೀಳುತ್ತಿದ್ದರಂತೆ.
1950 ಹಾಗೂ 1960ರ ದಶಕದಲ್ಲಿ ದೇವ್ ಆನಂದ್ರ ಸ್ಟಾರ್ಡಂ ಎಷ್ಟರ ಮಟ್ಟಿಗೆ ಇತ್ತು ಅಂದರೆ ಅದನ್ನು ಊಹಿಸಲೂ ನಿಮ್ಮಿಂದ ಸಾಧ್ಯವಿಲ್ಲ. ಅದರಲ್ಲೂ ಮಹಿಳಾ ಮಣಿಯರಂತೂ ದೇವ್ ಆನಂದ್ರನ್ನು ಕಣ್ತುಂಬಿಕೊಳ್ಳುವ ಸಲುವಾಗಿ ಜೀವವನ್ನು ಪಣಕ್ಕಿಡಲೂ ಸಹ ತಯಾರಿದ್ದರಂತೆ.
1958ರಲ್ಲಿ ದೇವ್ ಆನಂದ್ರ ಕಾಲಾ ಪಾನಿ ಸಿನಿಮಾ ತೆರೆ ಕಂಡಿತ್ತು. ಈ ಸಿನಿಮಾದಲ್ಲಿ ದೇವ್ ಆನಂದ್ ಜೊತೆಯಲ್ಲಿ ನಟಿ ಮಧುಬಾಲಾ ಹಾಗೂ ನಳಿನಿ ಜಯವಂತ್ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ಕಪ್ಪು ಬಣ್ಣದ ಕೋಟ್ ಧರಿಸಿದ್ದ ದೇವ್ ಆನಂದ್ ಎಷ್ಟರ ಮಟ್ಟಿಗೆ ಸುಂದರವಾಗಿ ಕಾಣುತ್ತಿದ್ದರು ಅಂದರೆ ಯುವತಿಯೊಬ್ಬಳು ಕಟ್ಟಡದಿಂದ ಜಿಗಿದು ತನ್ನ ಜೀವವನ್ನೇ ಕಳೆದುಕೊಂಡಿದ್ದಳಂತೆ..!
ದೇವ್ ಆನಂದ್ರನ್ನು ನೋಡಲು ಯುವತಿಯರು ಕಟ್ಟಡಗಳಿಂದ ಜಿಗಿಯುತ್ತಿದ್ದರಂತೆ. ಹೀಗಾಗಿಯೇ ಕೋರ್ಟ್ನಲ್ಲಿ ದೇವ್ ಆನಂದ್ರಿಗೆ ಇನ್ಮುಂದೆ ಕಪ್ಪು ಬಣ್ಣದ ಕೋಟ್ ಧರಿಸದಂತೆ ಸೂಚಿಸಲಾಗಿತ್ತು ಎಂದು ಹೇಳಲಾಗುತ್ತದೆ.
ಆದರೆ ಈ ಬಗ್ಗೆ ಯಾವುದೇ ಸೂಕ್ತ ಪುರಾವೆಗಳಿಲ್ಲ. ನಟ ದೇವ್ ಆನಂದ್ ತಮ್ಮ ಜೀವನ ಚರಿತ್ರೆ ಪುಸ್ತಕದಲ್ಲಿ ಇದೊಂದು ವದಂತಿ ಎಂದು ಹೇಳಿದ್ದಾರೆ. ಹೀಗಾಗಿ ಇದರಲ್ಲಿ ಯಾವುದು ಸತ್ಯ ಯಾವುದು ಮಿಥ್ಯ ಎಂಬುದು ಇನ್ನೂ ನಿಗೂಢವಾಗಿಯೇ ಇದೆ. ಆದರೆ ನೀವು ಗೂಗಲ್ನಲ್ಲಿ ಈಗಲೂ ಕೂಡ ದೇವ್ ಆನಂದ್ ಬಗ್ಗೆ ಹುಡುಕಾಟ ನಡೆಸಿದರೆ ನಿಮಗೆ ಮೊದಲು ಕಾಣ ಸಿಗುವ ವಿಚಾರವೇ ಈ ಕಪ್ಪು ಬಣ್ಣದ ಕೋಟ್ ಬ್ಯಾನ್ ಆದ ಕತೆ..!
Loading ...