ಸಾಲ ಪಡೆದವರಿಗೆ ಸಿಗುತ್ತಾ ಸಿಹಿ ಸುದ್ದಿ…? ಬದಲಾಗುತ್ತಾ ಬಡ್ಡಿ ದರ…? ಇಂದೇ RBI ನಿರ್ಧಾರ

ಮುಂಬೈ: ಭಾರತೀಯ ರಿಸರ್ವ್ ಬ್ಯಾಂಕ್ ಗವರ್ನರ್ ಶಕ್ತಿಕಾಂತ ದಾಸ್ ಅವರು ಇಂದು ಆರು ಸದಸ್ಯರ ಹಣಕಾಸು ನೀತಿ ಸಮಿತಿಯ(ಎಂಪಿಸಿ) ನಿರ್ಧಾರವನ್ನು ಪ್ರಕಟಿಸಲಿದ್ದಾರೆ.

ಜಾಗತಿಕ ಸರಕುಗಳ ಬೆಲೆ ಏರಿಕೆ ಮತ್ತು ಹಣದುಬ್ಬರವನ್ನು ನಿಯಂತ್ರಿಸುವ ಅಗತ್ಯತೆಯ ನಡುವೆ ಕೇಂದ್ರೀಯ ಬ್ಯಾಂಕಿನ ದರ ನಿಗದಿಪಡಿಸುವ ಸಮಿತಿಯು ಮುಂದಿನ ವಿತ್ತೀಯ ನೀತಿಯ ಕುರಿತು ತನ್ನ ಮೂರು ದಿನಗಳ ಚರ್ಚೆಯನ್ನು ಬುಧವಾರ ಆರಂಭಿಸಿದ್ದು, ಇಂದು ನಿರ್ಧಾರ ಪ್ರಕಟವಾಗಲಿದೆ.

ಕೇಂದ್ರ ಬ್ಯಾಂಕ್ ಸತತ ಎಂಟನೇ ಬಾರಿಗೆ ಪಾಲಿಸಿ ದರಗಳಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಪಾಲಿಸಿ ರೆಪೊ ದರ ಅಥವಾ ಅಲ್ಪಾವಧಿ ಸಾಲ ದರವು ಪ್ರಸ್ತುತ ಶೇ .4 ರಷ್ಟಿದ್ದು, ರಿವರ್ಸ್ ರೆಪೊ ದರ ಶೇ .3.35 ರಷ್ಟಿದೆ.

2022-23ರ ಮೊದಲ ತ್ರೈಮಾಸಿಕದಲ್ಲಿ ಸಿಪಿಐ ಹಣದುಬ್ಬರವನ್ನು ಶೇಕಡ 5.1 ರಷ್ಟು ಎಂದು ಅಂದಾಜಿಸಲಾಗಿದೆ. ಆಗಸ್ಟ್ ನಲ್ಲಿ ಸಿಪಿಐ ಹಣದುಬ್ಬರವು ಶೇ .5.3 ರಷ್ಟಿತ್ತು. ಸೆಪ್ಟೆಂಬರ್ ಹಣದುಬ್ಬರ ದತ್ತಾಂಶವನ್ನು ಅಕ್ಟೋಬರ್ 12 ರಂದು ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ.

ಆರ್‌ಬಿಐ ಪಾಲಿಸಿ ದರಗಳಲ್ಲಿ ಯಥಾಸ್ಥಿತಿ ಕಾಯ್ದುಕೊಂಡರೆ, ದರ ಬದಲಾಗದೇ ಇರುವುದರಿಂದ ಇದು ಸತತ ಎಂಟು ಬಾರಿಯಾಗಲಿದೆ. ಐತಿಹಾಸಿಕ ಕನಿಷ್ಠ ಮಟ್ಟಕ್ಕೆ ಬಡ್ಡಿದರವನ್ನು ಕಡಿತಗೊಳಿಸುವ ಮೂಲಕ ಬೇಡಿಕೆಯನ್ನು ಹೆಚ್ಚಿಸಲು ಕೇಂದ್ರೀಯ ಬ್ಯಾಂಕ್ ಕೊನೆಯ ಬಾರಿಗೆ ಪಾಲಿಸಿ ದರವನ್ನು ಮೇ 22, 2020 ರಂದು ಪರಿಷ್ಕರಿಸಿದೆ ಎಂದು ಹೇಳಲಾಗಿದೆ.

ಗ್ರಾಹಕ ಬೆಲೆ ಸೂಚ್ಯಂಕವನ್ನು ಆಧರಿಸಿದ ಚಿಲ್ಲರೆ ಹಣದುಬ್ಬರವು ಶೇಕಡ 4 ರಲ್ಲಿ ಉಳಿಯುವಂತೆ ನೋಡಿಕೊಳ್ಳಲು ಕೇಂದ್ರ ಸರ್ಕಾರವು ಆರ್‌ಬಿಐಗೆ ಕೇಳಿದೆ. ಆಗಸ್ಟ್‌ ನಲ್ಲಿ ಹಣಕಾಸು ನೀತಿ ಪರಾಮರ್ಶೆಯ ನಂತರ ರಿಸರ್ವ್ ಬ್ಯಾಂಕ್ ಪ್ರಮುಖ ಬಡ್ಡಿದರವನ್ನು ಬದಲಿಸಲಿಲ್ಲ.

ಆರ್‌ಬಿಐ ನೀತಿ – ತಜ್ಞರ ನಿರೀಕ್ಷೆಗಳು

ಪಿಡಬ್ಲ್ಯೂಸಿ ಇಂಡಿಯಾದ ನಾಯಕ(ಸಾರ್ವಜನಿಕ ಹಣಕಾಸು ಮತ್ತು ಅರ್ಥಶಾಸ್ತ್ರ) ರಾನೆನ್ ಬ್ಯಾನರ್ಜಿ ಅವರು, ತೈಲ, ನೈಸರ್ಗಿಕ ಅನಿಲ ಮತ್ತು ಕಲ್ಲಿದ್ದಲು ಬೆಲೆಗಳು ಹಣದುಬ್ಬರದ ಮೇಲೆ ಪರಿಣಾಮ ಬೀರುತ್ತವೆ ಎಂದು ಹೇಳಿದರು.

ಆರ್ಥಿಕ ಸಲಹೆಗಾರ ಎಂ. ಗೋವಿಂದ ರಾವ್, ಗ್ರಾಹಕರ ಬೆಲೆ ಹಣದುಬ್ಬರವು ಜುಲೈನಲ್ಲಿ 5.59 ಶೇಕಡದಿಂದ ಆಗಸ್ಟ್‌ ನಲ್ಲಿ 5.3 ಶೇಕಡಕ್ಕೆ ಇಳಿಕೆಯೊಂದಿಗೆ, ಸಾಂಕ್ರಾಮಿಕ-ನೇತೃತ್ವದ ನಿರ್ಬಂಧಗಳು ಸಡಿಲಗೊಂಡಿರುವ ಹಿನ್ನೆಲೆಯಲ್ಲಿ ಪೂರೈಕೆ ಪರಿಸ್ಥಿತಿ ಸುಧಾರಿಸಿದೆ. ಬಡ್ಡಿದರಗಳನ್ನು ಬದಲಾಯಿಸಲು ತಕ್ಷಣದ ಒತ್ತಡವಿಲ್ಲ ಎಂದಿದ್ದಾರೆ.

ಆರ್ಥಿಕ ಸ್ಥಿರತೆ ಮತ್ತು ನಡೆಯುತ್ತಿರುವ ಹಬ್ಬದ ಸಮಯದಲ್ಲಿ ಬೇಡಿಕೆಯನ್ನು ಹೆಚ್ಚಿಸುವ ಉದ್ದೇಶವಿದೆ. ಆರ್‌ಬಿಐ ಪ್ರಮುಖ ಪಾಲಿಸಿ ದರಗಳಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳುವ ನಿರೀಕ್ಷೆಯಿದೆ. ಗೃಹ ಸಾಲಗಳು ಪ್ರಸ್ತುತ ಬಡ್ಡಿದರದಲ್ಲಿ ಶೇಕಡಾ 6.50 ರಷ್ಟು ಕಡಿಮೆ ಬಡ್ಡಿದರದಲ್ಲಿ ಲಭ್ಯವಿದೆ ಎಂದು ಅವರು ಹೇಳಿದ್ದಾರೆ.