ಬೆಂಗಳೂರು: ಮೇ ಮುಗಿದು ಜೂನ್ 2026ರ ಹೊಸ ತಿಂಗಳು ಆರಂಭವಾಗುತ್ತಿದೆ. ಒಂದು ವೇಳೆ ಹೊಸ ತಿಂಗಳಲ್ಲಿ ನಿಮಗೆ ಬ್ಯಾಂಕಿಂಗ್ ಕೆಲಸಗಳಿದ್ದರೆ, ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಬಿಡುಗಡೆ ಮಾಡಿರುವ ರಜಾದಿನಗಳ ಪಟ್ಟಿಯನ್ನು ಮುಂಚಿತವಾಗಿಯೇ ಪರಿಶೀಲಿಸುವುದು ತುಂಬಾ ಒಳ್ಳೆಯದು. ಯಾಕಂದ್ರೆ, ಜೂನ್ ತಿಂಗಳಲ್ಲಿ ವಾರಾಂತ್ಯದ ರಜೆಗಳು ಹಾಗೂ ವಿವಿಧ ಹಬ್ಬಗಳ ಕಾರಣದಿಂದಾಗಿ ದೇಶದ ಹಲವು ರಾಜ್ಯಗಳಲ್ಲಿ ಬ್ಯಾಂಕುಗಳಿಗೆ ಸಾಕಷ್ಟು ದಿನಗಳ ಕಾಲ ರಜೆ ಇರಲಿದೆ. ಆದರೆ, ಬ್ಯಾಂಕ್ ಶಾಖೆಗಳು ಮುಚ್ಚಲ್ಪಟ್ಟಿದ್ದರೂ ಆನ್‌ಲೈನ್ ಹಾಗೂ ಡಿಜಿಟಲ್ ಸೇವೆಗಳು ಎಂದಿನಂತೆ ಲಭ್ಯವಿರಲಿವೆ.
ಹಾಗಾದ್ರೆ ಜೂನ್ ತಿಂಗಳಲ್ಲಿ ಯಾವೆಲ್ಲಾ ದಿನ ಬ್ಯಾಂಕ್ ರಜೆ ಇರಲಿದೆ? ಕರ್ನಾಟಕ ಸೇರಿದಂತೆ ದೇಶದ ಪ್ರಮುಖ ರಾಜ್ಯಗಳ ಬ್ಯಾಂಕ್ ರಜಾದಿನಗಳ ಕಂಪ್ಲೀಟ್ ಡಿಟೇಲ್ಸ್ ಇಲ್ಲಿದೆ ನೋಡಿ.
ವಾರಾಂತ್ಯದ ನಿಯಮಿತ ರಜೆಗಳು (ಎಲ್ಲಾ ರಾಜ್ಯಗಳಿಗೂ ಅನ್ವಯ):
ದೇಶದ ಎಲ್ಲಾ ಸಾರ್ವಜನಿಕ ಮತ್ತು ಖಾಸಗಿ ವಲಯದ ಬ್ಯಾಂಕುಗಳು ಈ ಕೆಳಗಿನ ವಾರಾಂತ್ಯದ ದಿನಗಳಲ್ಲಿ ಕಡ್ಡಾಯವಾಗಿ ಮುಚ್ಚಿರುತ್ತವೆ:
ಭಾನುವಾರಗಳು: ಜೂನ್ 7, ಜೂನ್ 14, ಜೂನ್ 21, ಮತ್ತು ಜೂನ್ 28.
ಎರಡನೇ ಶನಿವಾರ: ಜೂನ್ 13.
ನಾಲ್ಕನೇ ಶನಿವಾರ: ಜೂನ್ 27.
ಪ್ರಾದೇಶಿಕ ಮತ್ತು ಹಬ್ಬದ ರಜಾದಿನಗಳ ಪಟ್ಟಿ (ವಿವಿಧ ರಾಜ್ಯಗಳ ಪ್ರಕಾರ):
ರಾಷ್ಟ್ರೀಯ ರಜೆಗಳಲ್ಲದೆ, ವಿವಿಧ ಹಬ್ಬಗಳು ಮತ್ತು ಸಾಂಸ್ಕೃತಿಕ ದಿನಗಳ ಕಾರಣದಿಂದಾಗಿ ನಿರ್ದಿಷ್ಟ ರಾಜ್ಯಗಳಲ್ಲಿ ಬ್ಯಾಂಕ್ ಸೇವೆಗಳು ಲಭ್ಯವಿರುವುದಿಲ್ಲ:
ಜೂನ್ 15 (ಸೋಮವಾರ): ವೈಎಂಎ (YMA) ದಿನ ಮತ್ತು ರಾಜಾ ಸಂಕ್ರಾಂತಿ ನಿಮಿತ್ತ ಐಜ್ವಾಲ್ (ಮಿಜೋರಾಂ) ಮತ್ತು ಭುವನೇಶ್ವರ (ಒಡಿಶಾ) ಭಾಗದಲ್ಲಿ ಬ್ಯಾಂಕ್ ರಜೆ.
ಜೂನ್ 25 (ಗುರುವಾರ): ಮೊಹರಂ ಹಬ್ಬದ ಹಿನ್ನೆಲೆಯಲ್ಲಿ ವಿಜಯವಾಡ (ಆಂಧ್ರಪ್ರದೇಶ) ವಲಯದಲ್ಲಿ ಬ್ಯಾಂಕ್‌ಗಳು ಕಾರ್ಯನಿರ್ವಹಿಸುವುದಿಲ್ಲ.
ಜೂನ್ 26 (ಶುಕ್ರವಾರ – ಬೆಂಗಳೂರು ಒಳಗೊಂಡಂತೆ): ಮೊಹರಂ (ಅಶೂರಾ/ಯಾಮ್-ಎ-ಶಹಾದತ್) ಪ್ರಯುಕ್ತ ದೇಶದ ಬಹುತೇಕ ಪ್ರಮುಖ ನಗರಗಳಲ್ಲಿ ಬ್ಯಾಂಕುಗಳಿಗೆ ರಜೆ ಇರುತ್ತದೆ. ಬೆಂಗಳೂರು, ನವದೆಹಲಿ, ಮುಂಬೈ, ಚೆನ್ನೈ, ಹೈದರಾಬಾದ್, ಕೋಲ್ಕತ್ತಾ, ಅಗರ್ತಲಾ, ಐಜ್ವಾಲ್, ಬೇಲಾಪುರ್, ಭೋಪಾಲ್, ಜಮ್ಮು, ಕಾನ್ಪುರ್, ಲಕ್ನೋ, ನಾಗ್ಪುರ್, ಪಾಟ್ನಾ, ರಾಯ್ಪುರ್, ರಾಂಚಿ ಮತ್ತು ಶ್ರೀನಗರದಲ್ಲಿ ಬ್ಯಾಂಕುಗಳು ಮುಚ್ಚಿರುತ್ತವೆ.
ಜೂನ್ 29 (ಸೋಮವಾರ): ಸಂತ ಗುರು ಕಬೀರ್ ಜಯಂತಿ ನಿಮಿತ್ತ ಶಿಮ್ಲಾ (ಹಿಮಾಚಲ ಪ್ರದೇಶ) ಹಾಗೂ ಹರಿಯಾಣ, ಪಂಜಾಬ್‌ ಭಾಗಗಳಲ್ಲಿ ಬ್ಯಾಂಕ್ ಬಂದ್.
ಜೂನ್ 30 (ಮಂಗಳವಾರ): ರೆಮ್ನಾ ನಿ (Remna Ni) ಪ್ರಯುಕ್ತ ಐಜ್ವಾಲ್‌ನಲ್ಲಿ (ಮಿಜೋರಾಂ) ಬ್ಯಾಂಕ್ ಸೇವೆ ಇರುವುದಿಲ್ಲ.
ಆರ್‌ಬಿಐ ಬ್ಯಾಂಕ್ ರಜೆಗಳನ್ನು ಹೇಗೆ ವರ್ಗೀಕರಿಸುತ್ತದೆ?
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಬ್ಯಾಂಕ್ ರಜೆಗಳನ್ನು ಪ್ರಮುಖವಾಗಿ ಮೂರು ವಿಭಾಗಗಳಾಗಿ ವಿಂಗಡಿಸುತ್ತದೆ:
ನೆಗೋಷಿಯೇಬಲ್ ಇನ್ಸ್ಟ್ರುಮೆಂಟ್ಸ್ ಆಕ್ಟ್ ಅಡಿಯಲ್ಲಿ ರಜೆಗಳು: ಈ ದಿನಗಳಲ್ಲಿ ಚೆಕ್ ಕ್ಲಿಯರೆನ್ಸ್ ಮತ್ತು ಶಾಖೆಯ ಆಧಾರಿತ ಸೇವೆಗಳು ಸಂಪೂರ್ಣವಾಗಿ ಸ್ಥಗಿತಗೊಳ್ಳುತ್ತವೆ.
RTGS ರಜೆಗಳು: ಶಾಖೆಗಳ ಮೂಲಕ ಯಾವುದೇ ರಿಯಲ್ ಟೈಮ್ ಗ್ರಾಸ್ ಸೆಟಲ್ಮೆಂಟ್ (RTGS) ವಹಿವಾಟುಗಳು ನಡೆಯುವುದಿಲ್ಲ.
ಬ್ಯಾಂಕ್ ಖಾತೆಗಳ ವಾರ್ಷಿಕ ಮುಕ್ತಾಯ: ಇದು ಸಾಮಾನ್ಯವಾಗಿ ಏಪ್ರಿಲ್ 1 ರಂದು ಮಾತ್ರ ಅನ್ವಯಿಸುತ್ತದೆ (ಜೂನ್ ತಿಂಗಳಿಗೆ ಅನ್ವಯಿಸುವುದಿಲ್ಲ).
ಬ್ಯಾಂಕ್ ರಜೆ ದಿನಗಳಲ್ಲಿ ಡಿಜಿಟಲ್ ಸೇವೆಗಳು ಇರುತ್ತವಾ?
ಖಂಡಿತ ಇರುತ್ತವೆ ಬ್ಯಾಂಕ್ ಶಾಖೆಗಳು ಭೌತಿಕವಾಗಿ ಮುಚ್ಚಿದ್ದರೂ ಗ್ರಾಹಕರಿಗೆ ಯಾವುದೇ ಡಿಜಿಟಲ್ ಅಡಚಣೆ ಇರುವುದಿಲ್ಲ. ಯುಪಿಐ (UPI), ಇಂಟರ್ನೆಟ್ ಬ್ಯಾಂಕಿಂಗ್, ಮೊಬೈಲ್ ಬ್ಯಾಂಕಿಂಗ್, ನೆಫ್ಟ್ (NEFT) ಮತ್ತು ಆನ್‌ಲೈನ್ ಮೂಲಕ ಮಾಡುವ ಆರ್‌ಟಿಜಿಎಸ್ (RTGS) ಸೇವೆಗಳು 24/7 ನಿರಂತರವಾಗಿ ಕಾರ್ಯನಿರ್ವಹಿಸುತ್ತವೆ.
ಹಣ ವರ್ಗಾವಣೆ, ಬಿಲ್ ಪಾವತಿ ಅಥವಾ ಆನ್‌ಲೈನ್ ಶಾಪಿಂಗ್ ಅನ್ನು ಗ್ರಾಹಕರು ರಜಾದಿನಗಳಲ್ಲೂ ಯಾವುದೇ ವಿಳಂಬವಿಲ್ಲದೆ ಸುಲಭವಾಗಿ ಮಾಡಬಹುದು. ಆದರೆ, ಚೆಕ್ ಡಿಪಾಸಿಟ್ ಮಾಡುವುದು ಅಥವಾ ನೇರವಾಗಿ ಬ್ಯಾಂಕ್ ಶಾಖೆಗೆ ಭೇಟಿ ನೀಡಿ ಮಾಡುವ ಆರ್‌ಟಿಜಿಎಸ್ ವ್ಯವಹಾರಗಳಿಗೆ ಮಾತ್ರ ರಜಾದಿನಗಳಲ್ಲಿ ಅವಕಾಶವಿರುವುದಿಲ್ಲ. ಹಾಗಾಗಿ ನಿಮ್ಮ ಬ್ಯಾಂಕ್ ಕೆಲಸಗಳನ್ನು ಈ ರಜಾ ಪಟ್ಟಿ ನೋಡಿಕೊಂಡು ಪ್ಲಾನ್ ಮಾಡಿಕೊಳ್ಳಿ.
