ದುಬೈ: ಇತ್ತೀಚಿನ ದಿನಗಳಲ್ಲಿ ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ಇರಾನ್ ಮೇಲೆ ನಡೆಸಿದ ಮಿಲಿಟರಿ ಕಾರ್ಯಾಚರಣೆಯ ನಂತರ ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಕವಿದಿದೆ. ಅಮೆರಿಕದ ಮೇಲೆ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಎಚ್ಚರಿಸಿದ್ದ ಇರಾನ್, ಕತಾರ್, ಬಹ್ರೇನ್ ಮತ್ತು ಕುವೈತ್ನಂತಹ ದೇಶಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಿದೆ. ಇವೆಲ್ಲವೂ ಅಮೆರಿಕದ ಸೇನಾ ನೆಲೆಗಳನ್ನು ಹೊಂದಿರುವ ರಾಷ್ಟ್ರಗಳು. ಆದರೆ ಎಲ್ಲರನ್ನೂ ಆಶ್ಚರ್ಯಚಕಿತಗೊಳಿಸಿದ್ದು ದುಬೈ ಮೇಲಿನ ದಾಳಿ. ಏಕೆಂದರೆ ದುಬೈನಲ್ಲಿ ಅಧಿಕೃತವಾಗಿ ಅಮೆರಿಕದ ಯಾವುದೇ ಮಿಲಿಟರಿ ಬೇಸ್ ಇಲ್ಲ. ಹಾಗಿದ್ದರೂ ಇರಾನ್ ದುಬೈನ್ನೇ ಗುರಿಯಾಗಿಸಿಕೊಂಡಿದ್ದೇಕೆ? ಇದರ ಹಿಂದಿನ ಆಘಾತಕಾರಿ ಕಾರಣಗಳು ಇಲ್ಲಿವೆ.
ದುಬೈನಲ್ಲಿ ಅಮೆರಿಕದ ಸೇನಾ ನೆಲೆ ಇಲ್ಲದಿರಬಹುದು, ಆದರೆ ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಗಳಿಗೆ ಯುಎಇ (UAE) ನೀಡುತ್ತಿರುವ ಬೆಂಬಲ ಇರಾನ್ ಕಣ್ಣು ಕೆಂಪು ಮಾಡಿದೆ. ಇರಾನ್ ಪ್ರಮುಖವಾಗಿ ದುಬೈನ ಜೆಬೆಲ್ ಅಲಿ ಬಂದರು, ಬುರ್ಜ್ ಅಲ್ ಅರಬ್ ಹೋಟೆಲ್, ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ಪಾಮ್ ಜುಮೇರಾವನ್ನು ಗುರಿಯಾಗಿಸಿಕೊಂಡಿದೆ. ಇವು ಮಿಲಿಟರಿ ನೆಲೆಗಳಲ್ಲದಿದ್ದರೂ ಆಯಕಟ್ಟಿನ ಪ್ರದೇಶಗಳಾಗಿವೆ.
ಜೆಬೆಲ್ ಅಲಿ ಬಂದರಿನ ರಹಸ್ಯವೇನು? ದುಬೈನಲ್ಲಿರುವ ಜೆಬೆಲ್ ಅಲಿ ಬಂದರು ಅಮೆರಿಕದ ನೌಕಾಪಡೆಯ ಅಧಿಕೃತ ಕೇಂದ್ರವಲ್ಲ. ಆದರೆ ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ ನೌಕಾ ಹಡಗುಗಳು ಮತ್ತು ವಿಮಾನವಾಹಕ ನೌಕೆಗಳು ಅತಿ ಹೆಚ್ಚಾಗಿ ತಂಗುವುದು ಇದೇ ಬಂದರಿನಲ್ಲಿ. ಅಮೆರಿಕದ ನೌಕಾಪಡೆಯ ಜಾಲದ ಒಂದು ಪ್ರಮುಖ ಭಾಗವಾಗಿ ಈ ಬಂದರು ಕಾರ್ಯನಿರ್ವಹಿಸುತ್ತಿದೆ ಎಂಬುದು ಇರಾನ್ ವಾದ. ಇದೇ ಕಾರಣಕ್ಕೆ ಇರಾನ್ ಇದನ್ನು ಅಮೆರಿಕದ ಅಘೋಷಿತ ಸೇನಾ ಕೇಂದ್ರವೆಂದೇ ಪರಿಗಣಿಸಿ ದಾಳಿ ಮಾಡಿದೆ.
ಅಬುಧಾಬಿಯ ಅಲ್ ಧಫ್ರಾ ವಾಯುನೆಲೆ ದುಬೈನ ದಕ್ಷಿಣಕ್ಕಿರುವ ಅಬುಧಾಬಿಯಲ್ಲಿ ಅಲ್ ಧಫ್ರಾ ಎಂಬ ಬೃಹತ್ ವಾಯುನೆಲೆಯಿದೆ. ಇದನ್ನು ಯುಎಇ ಮತ್ತು ಅಮೆರಿಕ ಜಂಟಿಯಾಗಿ ಬಳಸುತ್ತಿವೆ. ಇಸ್ಲಾಮಿಕ್ ಸ್ಟೇಟ್ ವಿರುದ್ಧದ ಹೋರಾಟ ಮತ್ತು ಈ ಭಾಗದಲ್ಲಿ ಕಣ್ಗಾವಲು ನಡೆಸಲು ಅಮೆರಿಕ ಈ ನೆಲೆಯನ್ನು ಬಳಸುತ್ತಿದೆ. ಇದು ಇಡೀ ಯುಎಇ ಅಮೆರಿಕದ ಮಿಲಿಟರಿ ಚಟುವಟಿಕೆಗಳಿಗೆ ಬೆನ್ನೆಲುಬಾಗಿ ನಿಂತಿದೆ ಎಂಬುದನ್ನು ಸಾಬೀತುಪಡಿಸುತ್ತದೆ.
ಕತಾರ್ನಲ್ಲಿ ಸುಮಾರು 10,000 ಅಮೆರಿಕನ್ ಸೈನಿಕರಿದ್ದಾರೆ, ಬಹ್ರೇನ್ ಅಮೆರಿಕದ ಐದನೇ ನೌಕಾಪಡೆಯ ಕೇಂದ್ರವಾಗಿದೆ. ಕುವೈತ್, ಇರಾಕ್ ಮತ್ತು ಸೌದಿ ಅರೇಬಿಯಾದಲ್ಲಿಯೂ ಅಮೆರಿಕದ ಬಲವಾದ ಸೇನಾ ನೆಲೆಗಳಿವೆ. ಆದರೆ ಇರಾನ್ ಈ ಬಾರಿ ಕೇವಲ ಮಿಲಿಟರಿ ನೆಲೆಗಳನ್ನು ಮಾತ್ರವಲ್ಲದೆ, ಅಮೆರಿಕಕ್ಕೆ ಪರೋಕ್ಷವಾಗಿ ನೆರವಾಗುತ್ತಿರುವ ಬಂದರು ಮತ್ತು ವಿಮಾನ ನಿಲ್ದಾಣಗಳನ್ನೂ ಗುರಿಯಾಗಿಸಿಕೊಂಡಿದೆ. ಒಟ್ಟಾರೆಯಾಗಿ, ದುಬೈ ಅಮೆರಿಕದ ಮಿಲಿಟರಿ ಮೂಲಸೌಕರ್ಯದ ಭಾಗವಾಗಿದೆ ಎಂಬುದು ಇರಾನ್ನ ಬಲವಾದ ನಂಬಿಕೆಯಾಗಿದ್ದು, ಈ ದಾಳಿಯ ಮೂಲಕ ಇಡೀ ವಿಶ್ವಕ್ಕೆ ಎಚ್ಚರಿಕೆ ಸಂದೇಶ ರವಾನಿಸಿದೆ.
