ವಾಷಿಂಗ್ಟನ್- ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಹತ್ಯೆ ಮಾಡಲು ತಲೆಯಲ್ಲಿನ ಧ್ವನಿಗಳು ಸೂಚಿಸಿದ್ದವು ಎಂದು ಹೇಳಿದ ವೆನೆಜುವೆಲಾ ಪ್ರಜೆಯನ್ನು ಶ್ವೇತಭವನದ ಸಮೀಪ ಬಂಧಿಸಲಾಗಿದೆ ಎಂದು ಅಮೆರಿಕದ ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇಲಾಖೆ (DHS) ತಿಳಿಸಿದೆ.
ಗುರುವಾರ ರಾತ್ರಿ ಶ್ವೇತಭವನದ ಬಳಿ ಅನುಮಾನಾಸ್ಪದವಾಗಿ ನಿಲ್ಲಿಸಿದ್ದ ಕದ್ದ ಪಿಕಪ್ ಟ್ರಕ್‌ನಲ್ಲಿ ವ್ಯಕ್ತಿಯೊಬ್ಬ ಶಸ್ತ್ರಾಸ್ತ್ರಗಳೊಂದಿಗೆ ಪತ್ತೆಯಾಗಿದ್ದ. ಸೀಕ್ರೆಟ್ ಸರ್ವಿಸ್ ಅಧಿಕಾರಿಗಳು ವಾಹನವನ್ನು ಪರಿಶೀಲಿಸಿದಾಗ ಒಂದು AR-15 ರೈಫಲ್, ಎರಡು ಪಿಸ್ತೂಲ್‌ಗಳು ಹಾಗೂ ಹಲವು ಸುತ್ತು ಮದ್ದುಗುಂಡುಗಳು ಪತ್ತೆಯಾಗಿವೆ.
ಆರೋಪಿಯನ್ನು ರೋನಿ ಯೋರ್ಡ್ರಿಕ್ಸ್ ಗುವಾನಿಪಾ-ಕ್ರಿನೋಸ್ ಎಂದು ಗುರುತಿಸಲಾಗಿದೆ. ಅಧಿಕಾರಿಗಳ ಪ್ರಕಾರ, ಟ್ರಂಪ್ ಅವರನ್ನು ಕೊಲ್ಲಲು ಸೂಚಿಸುವ ಧ್ವನಿಗಳು ತನ್ನ ತಲೆಯಲ್ಲಿ ಕೇಳಿಬಂದಿದ್ದವು ಎಂದು ಆತ ಹೇಳಿದ್ದಾನೆ. ಆದರೆ ಈ ಹೇಳಿಕೆ ಕ್ರಿಮಿನಲ್ ದೂರಿನ ಅಫಿಡವಿಟ್‌ನಲ್ಲಿ ದಾಖಲಾಗಿಲ್ಲ ಎಂದು ವರದಿಯಾಗಿದೆ.
ದಕ್ಷಿಣ ಕೆರೊಲಿನಾದಲ್ಲಿ ಕಳವಾಗಿದ್ದ ವಾಹನವನ್ನು ವಶಪಡಿಸಿಕೊಳ್ಳಲಾಗಿದ್ದು, ಆರೋಪಿಯ ವಿರುದ್ಧ ಕದ್ದ ವಾಹನ ಬಳಕೆ, ಕದ್ದ ಆಸ್ತಿ ಹೊಂದಿರುವುದು ಹಾಗೂ ಪರವಾನಗಿ ಇಲ್ಲದೆ ಶಸ್ತ್ರಾಸ್ತ್ರ ಸಾಗಣೆ ಸೇರಿದಂತೆ ಹಲವು ಪ್ರಕರಣಗಳನ್ನು ದಾಖಲಿಸಲಾಗಿದೆ.
ಆರೋಪಿ ಶುಕ್ರವಾರ ಡಿಸಿ ಸುಪೀರಿಯರ್ ಕೋರ್ಟ್‌ಗೆ ಹಾಜರಾಗಿದ್ದು, ಜಾಮೀನು ನೀಡದೆ ಬಂಧನದಲ್ಲಿರಿಸಲಾಗಿದೆ. ಆತ 2024ರ ಮಾರ್ಚ್‌ನಲ್ಲಿ ಟೆಕ್ಸಾಸ್ ಮೂಲಕ ಅಮೆರಿಕ ಪ್ರವೇಶಿಸಿದ್ದ ದಾಖಲೆರಹಿತ ವಲಸಿಗ ಎಂದು DHS ತಿಳಿಸಿದೆ. ಪ್ರಕರಣದ ಕುರಿತು ICE ಕೂಡ ವಲಸೆ ಬಂಧನ ಪ್ರಕ್ರಿಯೆ ಆರಂಭಿಸಿದೆ.
ಶ್ವೇತಭವನದ ಸುತ್ತಲಿನ ಭದ್ರತಾ ಪರಿಸ್ಥಿತಿಯ ಬಗ್ಗೆ ಪ್ರತಿಕ್ರಿಯಿಸಿರುವ ಸೀಕ್ರೆಟ್ ಸರ್ವಿಸ್ ನಿರ್ದೇಶಕ ಸೀನ್ ಕರನ್, ಶಸ್ತ್ರಸಜ್ಜಿತ ವ್ಯಕ್ತಿಗಳು ಶ್ವೇತಭವನದತ್ತ ಬರುತ್ತಿರುವ ಪ್ರಕರಣಗಳು ಹೆಚ್ಚುತ್ತಿರುವುದು ಆತಂಕಕಾರಿ ಬೆಳವಣಿಗೆ ಎಂದು ಹೇಳಿದ್ದಾರೆ.
