ನವದೆಹಲಿ, ಸೆ.17: ಇಂಡಿಗೋ ವಿಮಾನದಲ್ಲಿ ಪ್ರಯಾಣಿಸುವವರಿಗೆ ಹೆಚ್ಚುವರಿ ಖರ್ಚು ಎದುರಾಗಿದೆ. ವಿಮಾನಯಾನ ಸಂಸ್ಥೆ ಕೆಲವು ಆಡ್‌-ಆನ್‌ ಹಾಗೂ ವಿಶೇಷ ಸೇವೆಗಳ ಶುಲ್ಕವನ್ನು ಹೆಚ್ಚಿಸಿದೆ. ಹೆಚ್ಚುವರಿ ಬ್ಯಾಗೇಜ್, ಶಿಶುಗಳ ಪ್ರಯಾಣ, ಪೋಷಕರಿಲ್ಲದೆ ಒಂಟಿಯಾಗಿ ಪ್ರಯಾಣಿಸುವ ಮಕ್ಕಳು ಮತ್ತು ಫಾಸ್ಟ್ ಫಾರ್ವರ್ಡ್‌ ಸೇವೆಗೆ ಹೊಸ ದರ ನಿಗದಿಯಾಗಿದೆ.ಹೊಸ ದರಗಳು ಸೆಪ್ಟೆಂಬರ್ 17ರಿಂದ ಜಾರಿಗೆ ಬಂದಿವೆ ಎಂದು ವಿಮಾನಯಾನ ಮೂಲಗಳು ತಿಳಿಸಿವೆ.
ಹೆಚ್ಚುವರಿ ಬ್ಯಾಗೇಜ್‌ಗೆ ಪ್ರತಿ ಕೆಜಿಗೆ ₹800
ವಿಮಾನಯಾನ ಸಂಸ್ಥೆ ನಿಗದಿಪಡಿಸಿರುವ ಬ್ಯಾಗೇಜ್ ಮಿತಿಗಿಂತ ಹೆಚ್ಚಿನ ಸಾಮಾನು ಕೊಂಡೊಯ್ಯುವವರು ಇನ್ನು ಮುಂದೆ ಪ್ರತಿ ಕೆಜಿಗೆ 800 ರೂ. ಪಾವತಿಸಬೇಕು. ಈ ಮೊದಲು ಪ್ರತಿ ಕೆಜಿಗೆ 700 ರೂ. ಶುಲ್ಕವಿತ್ತು.
ಹೀಗಾಗಿ ಹೆಚ್ಚುವರಿ ಬ್ಯಾಗೇಜ್ ಶುಲ್ಕದಲ್ಲಿ ಪ್ರತಿ ಕೆಜಿಗೆ 100 ರೂ. ಹೆಚ್ಚಳವಾಗಿದೆ.
ಶಿಶುಗಳ ಪ್ರಯಾಣ ದರ ₹3,000
3 ದಿನದಿಂದ 2 ವರ್ಷದೊಳಗಿನ ಶಿಶುಗಳನ್ನು ತಮ್ಮೊಂದಿಗೆ ಕರೆದೊಯ್ಯುವ ಪ್ರಯಾಣಿಕರಿಗೆ ವಿಧಿಸುವ ಶುಲ್ಕವನ್ನೂ ಹೆಚ್ಚಿಸಲಾಗಿದೆ.
ಈ ಮೊದಲು 2,000 ರೂ. ಇದ್ದ ಶುಲ್ಕ ಈಗ 3,000 ರೂ. ಆಗಿದೆ. ಶಿಶುಗಳಿಗೆ ಪ್ರತ್ಯೇಕ ಆಸನ ಇರುವುದಿಲ್ಲ. ಆದರೂ ಅವರ ಪ್ರಯಾಣಕ್ಕೆ ನಿಗದಿತ ಶುಲ್ಕ ಪಾವತಿಸಬೇಕಾಗುತ್ತದೆ.
ಒಂಟಿಯಾಗಿ ಪ್ರಯಾಣಿಸುವ ಮಕ್ಕಳಿಗೆ ₹5,999
ಪೋಷಕರು ಅಥವಾ ಯಾವುದೇ ವಯಸ್ಕರ ಜೊತೆಗಿಲ್ಲದೆ ವಿಮಾನದಲ್ಲಿ ಪ್ರಯಾಣಿಸುವ 5ರಿಂದ 12 ವರ್ಷದೊಳಗಿನ ಮಕ್ಕಳ ಸೇವಾ ಶುಲ್ಕದಲ್ಲೂ ಬದಲಾವಣೆಯಾಗಿದೆ.
ದೇಶೀಯ ವಿಮಾನಗಳಲ್ಲಿ ಈ ಸೇವೆಗೆ ಈ ಮೊದಲು 5,000 ರೂ. ಶುಲ್ಕವಿತ್ತು. ಈಗ 5,999 ರೂ. ಪಾವತಿಸಬೇಕು.
ಅಂತಾರಾಷ್ಟ್ರೀಯ ವಿಮಾನಗಳಲ್ಲಿ ಒಂಟಿಯಾಗಿ ಪ್ರಯಾಣಿಸುವ ಮಕ್ಕಳಿಗೆ ಈ ಸೇವೆಯ ಶುಲ್ಕ 12,999 ರೂ. ಇರಲಿದೆ. ಇಂತಹ ಪ್ರಯಾಣದ ವೇಳೆ ವಿಮಾನ ಸಿಬ್ಬಂದಿ ಮಕ್ಕಳಿಗೆ ಅಗತ್ಯ ಸಹಾಯ ನೀಡುತ್ತಾರೆ.
ಫಾಸ್ಟ್ ಫಾರ್ವರ್ಡ್‌ ಸೇವೆ ದುಬಾರಿ
ಚೆಕ್‌-ಇನ್‌ ಮತ್ತು ಬೋರ್ಡಿಂಗ್‌ನಲ್ಲಿ ಆದ್ಯತೆ ಪಡೆಯಲು ಬಳಸುವ ಫಾಸ್ಟ್ ಫಾರ್ವರ್ಡ್‌ (Fast Forward) ಸೇವೆಯ ದರವನ್ನೂ ಹೆಚ್ಚಿಸಲಾಗಿದೆ.
ದೇಶೀಯ ವಿಮಾನಗಳಲ್ಲಿ ಈ ಸೇವೆಯ ಶುಲ್ಕ 500 ರೂ.ನಿಂದ 650 ರೂ.ಗೆ ಏರಿಕೆಯಾಗಿದೆ. ಅಂತಾರಾಷ್ಟ್ರೀಯ ವಿಮಾನಗಳಿಗೆ ಪ್ರತಿ ಸೆಕ್ಟರ್‌ಗೆ 850 ರೂ. ಶುಲ್ಕ ಇರಲಿದೆ.
ಹೆಚ್ಚುವರಿ ಬ್ಯಾಗೇಜ್: ₹700/ಕೆಜಿಯಿಂದ ₹800/ಕೆಜಿಗೆ
ಶಿಶುಗಳ ಪ್ರಯಾಣ: ₹2,000ರಿಂದ ₹3,000ಕ್ಕೆ
ಒಂಟಿಯಾಗಿ ಪ್ರಯಾಣಿಸುವ ಮಕ್ಕಳು: ₹5,000ದಿಂದ ₹5,999ಕ್ಕೆ
ಫಾಸ್ಟ್ ಫಾರ್ವರ್ಡ್‌ ಸೇವೆ: ₹500ರಿಂದ ₹650ಕ್ಕೆ
ಪ್ರಯಾಣ ಪ್ರಮಾಣಪತ್ರ: ₹200ರಿಂದ ₹300ಕ್ಕೆ
ಟಿಕೆಟ್ ದರದಿಂದ ಪ್ರತ್ಯೇಕ ಶುಲ್ಕ
ಇಂಡಿಗೋ ಕಾಲಕಾಲಕ್ಕೆ ತನ್ನ ಹೆಚ್ಚುವರಿ ಹಾಗೂ ಸಹಾಯಕ ಸೇವೆಗಳ ದರವನ್ನು ಪರಿಶೀಲಿಸಿ ಬದಲಾವಣೆ ಮಾಡುತ್ತದೆ. ಈ ಬಾರಿ ಕೂಡ ಕೆಲವು ಸೇವೆಗಳ ಶುಲ್ಕ ಪರಿಷ್ಕರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಈ ಶುಲ್ಕಗಳು ವಿಮಾನದ ಮೂಲ ಟಿಕೆಟ್ ದರಕ್ಕೆ ಸೇರಿರುವುದಿಲ್ಲ. ನಿಗದಿತ ಉಚಿತ ಲಗೇಜ್ ಮಿತಿಗಿಂತ ಹೆಚ್ಚಿನ ಸಾಮಾನು ಅಥವಾ ಹೆಚ್ಚುವರಿ ಸೇವೆಗಳನ್ನು ಪಡೆಯುವ ಪ್ರಯಾಣಿಕರು ಪ್ರತ್ಯೇಕವಾಗಿ ಈ ಶುಲ್ಕ ಪಾವತಿಸಬೇಕಾಗುತ್ತದೆ.
