ಓದು ಮುಗಿಸಿದ ಬಳಿಕ ಉದ್ಯೋಗ ಅಥವಾ ಸ್ವಂತ ವ್ಯವಹಾರ ಮಾಡಬೇಕು ಎಂಬ ಆಸೆ ಹಲವರಿಗಿರುತ್ತದೆ. ಸರ್ಕಾರಿ ಸೇವೆಗಳೊಂದಿಗೆ ಕೈಜೋಡಿಸಿ ಆದಾಯ ಗಳಿಸಲು ಬಯಸುವವರಿಗೆ ಇಂಡಿಯಾ ಪೋಸ್ಟ್ ಫ್ರಾಂಚೈಸಿ ಒಂದು ಅವಕಾಶವಾಗಿದೆ. ಕೆಲವು ಪ್ರದೇಶಗಳಲ್ಲಿ ಅಂಚೆ ಸೇವೆಗಳನ್ನು ಒದಗಿಸಲು ಇಂಡಿಯಾ ಪೋಸ್ಟ್ ಫ್ರಾಂಚೈಸಿ ಔಟ್‌ಲೆಟ್ ಮಾದರಿಯನ್ನು ಪರಿಚಯಿಸಿದೆ.
ಈ ಫ್ರಾಂಚೈಸಿ ಮೂಲಕ ಗ್ರಾಹಕರಿಗೆ ಹಲವು ಅಂಚೆ ಸೇವೆಗಳನ್ನು ಒದಗಿಸಬಹುದು. ಇದರಲ್ಲಿ ಮುಖ್ಯವಾಗಿ ಫ್ರಾಂಚೈಸಿ ಔಟ್‌ಲೆಟ್ ಮತ್ತು ಪೋಸ್ಟಲ್ ಏಜೆಂಟ್ ಎಂಬ ಎರಡು ಮಾದರಿಗಳಿವೆ. ಪೋಸ್ಟಲ್ ಏಜೆಂಟ್‌ಗಳು ಮುಖ್ಯವಾಗಿ ಅಂಚೆ ಚೀಟಿಗಳು ಮತ್ತು ಸ್ಟೇಷನರಿ ವಸ್ತುಗಳನ್ನು ಮಾರಾಟ ಮಾಡುತ್ತಾರೆ.
ಫ್ರಾಂಚೈಸಿ ಔಟ್‌ಲೆಟ್ ಆರಂಭಿಸಲು ಇಂಡಿಯಾ ಪೋಸ್ಟ್‌ನೊಂದಿಗೆ ಒಪ್ಪಂದ ಮಾಡಿಕೊಂಡು ಅಧಿಕೃತ ಫ್ರಾಂಚೈಸಿ ಕೇಂದ್ರವನ್ನು ತೆರೆಯಬಹುದು. ಇದರ ಮೂಲಕ ಆದಾಯ ಗಳಿಸಬಹುದು. ನೀವು ಒದಗಿಸುವ ಸೇವೆಗಳು ಮತ್ತು ನಡೆಯುವ ವಹಿವಾಟಿನ ಆಧಾರದ ಮೇಲೆ ಕಮಿಷನ್ ದೊರೆಯುತ್ತದೆ.
ಅರ್ಹತೆಗಳೇನು?
-
ಅರ್ಜಿದಾರರಿಗೆ ಕನಿಷ್ಠ 18 ವರ್ಷ ವಯಸ್ಸಾಗಿರಬೇಕು.
-
ಗರಿಷ್ಠ ವಯೋಮಿತಿ ಇರುವುದಿಲ್ಲ.
-
ಕನಿಷ್ಠ 8ನೇ ತರಗತಿ ಉತ್ತೀರ್ಣರಾಗಿರಬೇಕು.
-
ಮೂಲಭೂತ ಕಂಪ್ಯೂಟರ್ ಜ್ಞಾನ ಹೊಂದಿರಬೇಕು.
-
ಅಂಚೆ ಇಲಾಖೆಯ ಉದ್ಯೋಗಿಗಳ ಕುಟುಂಬ ಸದಸ್ಯರು ಈ ಯೋಜನೆಗೆ ಅರ್ಹರಾಗಿರುವುದಿಲ್ಲ.
-
ಫ್ರಾಂಚೈಸಿ ಔಟ್‌ಲೆಟ್ ಗ್ರಾಹಕರಿಗೆ ಸುಲಭವಾಗಿ ತಲುಪಬಹುದಾದ ಸ್ಥಳದಲ್ಲಿರಬೇಕು.
-
ಸ್ವಂತ ಅಥವಾ ಬಾಡಿಗೆ ಅಂಗಡಿ/ಕೌಂಟರ್ ಸ್ಥಳ ಹೊಂದಿರಬಹುದು.
-
ಕನಿಷ್ಠ ₹5,000 ಭದ್ರತಾ ಠೇವಣಿ ಪಾವತಿಸಬೇಕು.
ಭದ್ರತಾ ಠೇವಣಿಯ ಜೊತೆಗೆ ಅಂಗಡಿ ಅಥವಾ ಕೌಂಟರ್, ಕಂಪ್ಯೂಟರ್, ಲ್ಯಾಪ್‌ಟಾಪ್, ಪ್ರಿಂಟರ್, ಇಂಟರ್ನೆಟ್ ಸಂಪರ್ಕ, ಮೂಲಭೂತ ಪೀಠೋಪಕರಣಗಳು ಹಾಗೂ ಸೈನ್‌ಬೋರ್ಡ್‌ಗಳಿಗೆ ಖರ್ಚು ಮಾಡಬೇಕಾಗುತ್ತದೆ.
ಈ ಫ್ರಾಂಚೈಸಿಯಲ್ಲಿ ನಿಗದಿತ ಮಾಸಿಕ ವೇತನ ಇರುವುದಿಲ್ಲ. ಗ್ರಾಹಕರಿಗೆ ಒದಗಿಸುವ ಅಂಚೆ ಸೇವೆಗಳಿಗೆ ಅನುಗುಣವಾಗಿ ಕಮಿಷನ್ ಅಥವಾ ಸಂಭಾವನೆ ಸಿಗುತ್ತದೆ. ಹೆಚ್ಚು ವಹಿವಾಟು ನಡೆದಷ್ಟೂ ಆದಾಯ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.
ಹೆಚ್ಚಿನ ಪ್ರಮಾಣದಲ್ಲಿ ಸೇವೆಗಳನ್ನು ಒದಗಿಸಿದರೆ ತಿಂಗಳಿಗೆ ₹20,000ರಿಂದ ₹30,000ದವರೆಗೆ ಆದಾಯ ಗಳಿಸುವ ಅವಕಾಶವಿದೆ ಎಂದು ಹೇಳಲಾಗಿದೆ. ಆದರೆ ಆದಾಯವು ಸ್ಥಳ, ಗ್ರಾಹಕರ ಸಂಖ್ಯೆ, ವಹಿವಾಟು ಹಾಗೂ ಒದಗಿಸುವ ಸೇವೆಗಳ ಮೇಲೆ ಅವಲಂಬಿತವಾಗಿರುತ್ತದೆ.
ಯಾವ ಸೇವೆಗಳನ್ನು ನೀಡಬಹುದು?
ಫ್ರಾಂಚೈಸಿ ಮೂಲಕ ವಿವಿಧ ಅಂಚೆ ಸೇವೆಗಳನ್ನು ಒದಗಿಸಿ ಆದಾಯ ಗಳಿಸಬಹುದು. ಅವುಗಳಲ್ಲಿ:
-
ರಿಜಿಸ್ಟರ್ಡ್ ಅಂಚೆ ಮತ್ತು ಪಾರ್ಸೆಲ್‌ಗಳ ಬುಕ್ಕಿಂಗ್
-
ಸ್ಪೀಡ್ ಪೋಸ್ಟ್ ಮತ್ತು ಸ್ಪೀಡ್ ಪೋಸ್ಟ್ ಪಾರ್ಸೆಲ್ ಬುಕ್ಕಿಂಗ್
-
ಮನಿ ಆರ್ಡರ್ ಬುಕ್ಕಿಂಗ್
-
ಅಂಚೆ ಚೀಟಿಗಳ ಮಾರಾಟ
-
ಲಕೋಟೆಗಳು ಹಾಗೂ ಇತರ ಸ್ಟೇಷನರಿ ವಸ್ತುಗಳ ಮಾರಾಟ
-
ಅರ್ಹತೆ ಇದ್ದರೆ ಪೋಸ್ಟಲ್ ಲೈಫ್ ಇನ್ಶೂರೆನ್ಸ್ (PLI) ಏಜೆಂಟ್ ಸೇವೆಗಳು
-
ಇಲಾಖೆಗೆ ಸಂಬಂಧಿಸಿದ ಕೆಲವು ಬಿಲ್, ತೆರಿಗೆ ಮತ್ತು ದಂಡ ವಸೂಲಿ ಸೇವೆಗಳು
ಅರ್ಜಿ ಸಲ್ಲಿಸುವುದು ಹೇಗೆ?
ಅರ್ಜಿ ಸಲ್ಲಿಸಲು ಆಧಾರ್ ಕಾರ್ಡ್, ಪ್ಯಾನ್ ಕಾರ್ಡ್, ವಿದ್ಯಾರ್ಹತಾ ಪ್ರಮಾಣಪತ್ರ, ವಿಳಾಸದ ದಾಖಲೆಗಳು ಹಾಗೂ ಅಂಗಡಿ/ಪ್ರಮಿಸಸ್‌ಗೆ ಸಂಬಂಧಿಸಿದ ದಾಖಲೆಗಳು ಅಗತ್ಯವಾಗಬಹುದು.
ಅರ್ಜಿಯಲ್ಲಿ ವ್ಯವಹಾರದ ಸ್ಥಳ, ಕಂಪ್ಯೂಟರ್ ಜ್ಞಾನ ಹಾಗೂ ಹಿಂದಿನ ಅನುಭವದಂತಹ ವಿವರಗಳನ್ನು ನೀಡಬೇಕಾಗುತ್ತದೆ. ಮೊದಲು ಇಂಡಿಯಾ ಪೋಸ್ಟ್‌ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಫ್ರಾಂಚೈಸಿ ಯೋಜನೆಯ ವಿವರಗಳನ್ನು ಪರಿಶೀಲಿಸಿ, ಅಧಿಕೃತ ಅರ್ಜಿ ನಮೂನೆಯನ್ನು ಪಡೆಯಬೇಕು. ನಂತರ ಹೆಸರು, ವಿಳಾಸ, ವಯಸ್ಸು, ವಿದ್ಯಾರ್ಹತೆ, ಪ್ಯಾನ್ ವಿವರಗಳು, ವ್ಯವಹಾರದ ಸ್ಥಳ ಮತ್ತು ಪ್ರಮಿಸಸ್ ವಿವರಗಳನ್ನು ಸರಿಯಾಗಿ ಭರ್ತಿ ಮಾಡಬೇಕು.
ಅಗತ್ಯ ದಾಖಲೆಗಳನ್ನು ಅರ್ಜಿಯೊಂದಿಗೆ ಲಗತ್ತಿಸಿ, ಸಂಬಂಧಪಟ್ಟ ಸೀನಿಯರ್ ಸೂಪರಿಂಟೆಂಡೆಂಟ್ ಅಥವಾ ಸೂಪರಿಂಟೆಂಡೆಂಟ್ ಆಫ್ ಪೋಸ್ಟ್ ಆಫೀಸಸ್ ಕಚೇರಿಗೆ ಅರ್ಜಿಯನ್ನು ಸಲ್ಲಿಸಬೇಕು.
