ಪ್ರತಿಯೊಬ್ಬರಿಗೂ ತಮ್ಮ ದುಡಿಮೆಯ ಹಣದಲ್ಲಿ ಒಂದಿಷ್ಟು ಉಳಿತಾಯ ಮಾಡಿ ಭವಿಷ್ಯವನ್ನು ಭದ್ರಪಡಿಸಿಕೊಳ್ಳಬೇಕೆಂಬ ಆಸೆ ಇರುತ್ತದೆ. ಮಕ್ಕಳ ವಿದ್ಯಾಭ್ಯಾಸ, ಮದುವೆ, ನಿವೃತ್ತಿ ಜೀವನದ ಖರ್ಚು ಹೀಗೆ ಹತ್ತು ಹಲವು ಕನಸುಗಳನ್ನು ನನಸು ಮಾಡಿಕೊಳ್ಳಲು ವರ್ಷಗಟ್ಟಲೆ ಹಣ ಕೂಡಿಡುತ್ತಾರೆ. ಅದರಲ್ಲೂ ಸುರಕ್ಷಿತ ಹೂಡಿಕೆ ಎಂದು ನಂಬಿ ಹಲವರು ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ (PPF) ಯೋಜನೆಯಲ್ಲಿ ಲಕ್ಷಾಂತರ ರೂಪಾಯಿ ಉಳಿತಾಯ ಮಾಡಿರುತ್ತಾರೆ. ಆದರೆ, ಹೀಗೆ ಕಷ್ಟಪಟ್ಟು ಕೂಡಿಟ್ಟ ಹಣಕ್ಕೆ ಆದಾಯ ತೆರಿಗೆ ಬಾಕಿಯೇ ಮುಳುವಾಗುತ್ತದೆಯೇ? ನಿಮ್ಮ ಮೇಲೆ ತೆರಿಗೆ ಬಾಕಿ ಇದ್ದರೆ ಪಿಪಿಎಫ್ ಖಾತೆಯಲ್ಲಿರುವ ಹಣವನ್ನೂ ಸರ್ಕಾರ ವಶಪಡಿಸಿಕೊಳ್ಳಬಹುದೇ? ಎಂಬ ಆತಂಕ ಹೂಡಿಕೆದಾರರನ್ನು ಕಾಡುತ್ತಿದೆ. ಹಾಗಾದರೆ ಪಿಪಿಎಫ್ ಹಣಕ್ಕೆ ಕಾನೂನಿನ ರಕ್ಷಣೆ ಇದೆಯೇ? ತೆರಿಗೆ ಇಲಾಖೆ ಯಾವ ಕ್ರಮ ಕೈಗೊಳ್ಳಬಹುದು? ತಿಳಿಯೋಣ.
ಕಷ್ಟಪಟ್ಟು ಕೂಡಿಟ್ಟ ಪಿಪಿಎಫ್ ಹಣಕ್ಕೆ ರಕ್ಷಣೆ ಇದೆಯೇ?
ಸಾಮಾನ್ಯವಾಗಿ ಆದಾಯ ತೆರಿಗೆ ಬಾಕಿ ಉಳಿಸಿಕೊಂಡರೆ ತೆರಿಗೆ ಇಲಾಖೆ ನಿಮ್ಮ ಬ್ಯಾಂಕ್ ಖಾತೆ ಸೇರಿದಂತೆ ಕೆಲವು ಆಸ್ತಿಗಳ ಮೇಲೆ ವಸೂಲಾತಿ ಕ್ರಮ ಕೈಗೊಳ್ಳಬಹುದು. ಆದರೆ, ಪಿಪಿಎಫ್ ವಿಚಾರದಲ್ಲಿ ಕಾನೂನು ವಿಶೇಷ ರಕ್ಷಣೆ ಒದಗಿಸಿದೆ.
ಸಾರ್ವಜನಿಕ ಭವಿಷ್ಯ ನಿಧಿ ಕಾಯ್ದೆ, 1968ರ ಸೆಕ್ಷನ್ 9ರ ಪ್ರಕಾರ, ಪಿಪಿಎಫ್ ಖಾತೆಯಲ್ಲಿರುವ ಹಣಕ್ಕೆ ಕೆಲವು ಸಂದರ್ಭಗಳಲ್ಲಿ ಜಪ್ತಿಯಿಂದ ರಕ್ಷಣೆ ದೊರೆಯುತ್ತದೆ. ಅಂದರೆ, ತೆರಿಗೆ ಬಾಕಿ ಇದೆ ಎಂಬ ಒಂದೇ ಕಾರಣಕ್ಕೆ ಪಿಪಿಎಫ್ ಖಾತೆಯಲ್ಲಿರುವ ಹಣವನ್ನು ನೇರವಾಗಿ ವಶಪಡಿಸಿಕೊಳ್ಳಲು ಸಾಧ್ಯವಿಲ್ಲ.
2014ರಲ್ಲಿ ಗುಜರಾತ್ ಹೈಕೋರ್ಟ್ ಕೂಡ ದಿನೇಶ್ ಚಂದ್ರ ಭಲಿಯಾಲ್‌ಭಾಯ್ ಗಾಂಧಿ ವಿರುದ್ಧ ತೆರಿಗೆ ವಸೂಲಾತಿ ಅಧಿಕಾರಿ ಪ್ರಕರಣದಲ್ಲಿ ಪಿಪಿಎಫ್ ಹಣದ ಜಪ್ತಿ ವಿಚಾರವಾಗಿ ಮಹತ್ವದ ತೀರ್ಪು ನೀಡಿತ್ತು.
₹10 ಲಕ್ಷ ಉಳಿತಾಯವಿದ್ದರೆ ಏನಾಗುತ್ತದೆ?
ಇದನ್ನು ಒಂದು ಉದಾಹರಣೆಯ ಮೂಲಕ ಅರ್ಥಮಾಡಿಕೊಳ್ಳೋಣ. ಒಬ್ಬ ವ್ಯಕ್ತಿ ವರ್ಷಗಳಿಂದ ಕಷ್ಟಪಟ್ಟು ಪಿಪಿಎಫ್ ಖಾತೆಯಲ್ಲಿ ₹10 ಲಕ್ಷ ಉಳಿತಾಯ ಮಾಡಿದ್ದಾನೆ ಎಂದುಕೊಳ್ಳಿ. ಆದರೆ, ಆತನ ಮೇಲೆ ಆದಾಯ ತೆರಿಗೆ ಬಾಕಿಯಿದೆ.
ಈ ಸಂದರ್ಭದಲ್ಲಿ ಪಿಪಿಎಫ್ ಖಾತೆಯಲ್ಲಿರುವ ಹಣಕ್ಕೆ ಕಾನೂನಿನ ರಕ್ಷಣೆ ದೊರೆಯುವ ಸಾಧ್ಯತೆಯಿದೆ. ಆದರೆ, ಆತ ಆ ಹಣದಲ್ಲಿ ₹5 ಲಕ್ಷವನ್ನು ಹಿಂಪಡೆದು ಸಾಮಾನ್ಯ ಬ್ಯಾಂಕ್ ಉಳಿತಾಯ ಖಾತೆಯಲ್ಲಿ ಜಮೆ ಮಾಡಿದರೆ ಪರಿಸ್ಥಿತಿ ಬದಲಾಗಬಹುದು.
ಪಿಪಿಎಫ್ ಖಾತೆಯಲ್ಲಿದ್ದಾಗ ದೊರೆಯುತ್ತಿದ್ದ ಅದೇ ರೀತಿಯ ರಕ್ಷಣೆ ಹಿಂಪಡೆದ ಹಣಕ್ಕೆ ಮುಂದುವರಿಯುತ್ತದೆ ಎಂದು ಭಾವಿಸುವಂತಿಲ್ಲ. ಕಾನೂನಿನ ನಿಯಮಗಳಿಗೆ ಅನುಗುಣವಾಗಿ ಆ ಹಣದ ಮೇಲೂ ತೆರಿಗೆ ವಸೂಲಾತಿ ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ.
ತೆರಿಗೆ ಕಟ್ಟದಿದ್ದರೆ ಸುಮ್ಮನೆ ಬಿಡುತ್ತಾರೆಯೇ?
ಪಿಪಿಎಫ್ ಹಣಕ್ಕೆ ಕಾನೂನಿನ ರಕ್ಷಣೆ ಇದೆ ಎಂದ ಮಾತ್ರಕ್ಕೆ ತೆರಿಗೆ ಬಾಕಿ ಪಾವತಿಸಬೇಕಾದ ಹೊಣೆಗಾರಿಕೆ ಮುಗಿಯುವುದಿಲ್ಲ. ತೆರಿಗೆ ಬಾಕಿ ವಸೂಲಿಗಾಗಿ ಆದಾಯ ತೆರಿಗೆ ಇಲಾಖೆ ಕಾನೂನುಬದ್ಧವಾಗಿ ಇತರ ಆಸ್ತಿಗಳ ಮೇಲೆ ಕ್ರಮ ಕೈಗೊಳ್ಳಬಹುದು.
-
ನಿಮ್ಮ ಬ್ಯಾಂಕ್ ಖಾತೆಯಲ್ಲಿರುವ ಹಣ
-
ವೇತನ ಮತ್ತು ಇತರ ಆದಾಯ
-
ಷೇರು ಮಾರುಕಟ್ಟೆಯಲ್ಲಿನ ಹೂಡಿಕೆ
-
ಮ್ಯೂಚುವಲ್ ಫಂಡ್‌ಗಳಲ್ಲಿರುವ ಹಣ
-
ಇತರ ಆಸ್ತಿಗಳು
ಹೀಗಾಗಿ ಪಿಪಿಎಫ್‌ನಲ್ಲಿ ಹಣವಿದೆ, ಅದಕ್ಕೆ ರಕ್ಷಣೆ ಇದೆ ಎಂದು ತೆರಿಗೆ ಪಾವತಿಸುವುದನ್ನು ನಿರ್ಲಕ್ಷಿಸುವುದು ಸರಿಯಲ್ಲ.
ಪಿಪಿಎಫ್ ಖಾತೆ ಫ್ರೀಜ್ ಆದರೆ ಗಾಬರಿಯಾಗಬೇಡಿ!
ಒಂದು ವೇಳೆ ನಿಮ್ಮ ಪಿಪಿಎಫ್ ಖಾತೆಗೆ ಫ್ರೀಜ್ ಅಥವಾ ಅಟ್ಯಾಚ್‌ಮೆಂಟ್ ಆದೇಶ ಬಂದರೆ ತಕ್ಷಣ ಆತಂಕಪಡುವ ಅಗತ್ಯವಿಲ್ಲ. ಮೊದಲು ಆ ಆದೇಶದ ಪ್ರತಿಯನ್ನು ಪಡೆದುಕೊಳ್ಳಿ. ಯಾವ ಕಾನೂನಿನ ಅಡಿಯಲ್ಲಿ ಕ್ರಮ ಕೈಗೊಳ್ಳಲಾಗಿದೆ ಎಂಬುದನ್ನು ಪರಿಶೀಲಿಸಿ.
ನಿಮ್ಮ ಪಿಪಿಎಫ್ ಖಾತೆಗೆ ಕಾನೂನಿನ ರಕ್ಷಣೆ ಅನ್ವಯಿಸುತ್ತದೆ ಎಂದು ಭಾವಿಸಿದರೆ ಅಗತ್ಯ ದಾಖಲೆಗಳೊಂದಿಗೆ ಸಂಬಂಧಪಟ್ಟ ತೆರಿಗೆ ವಸೂಲಾತಿ ಅಧಿಕಾರಿಗೆ ಲಿಖಿತವಾಗಿ ಆಕ್ಷೇಪಣೆ ಸಲ್ಲಿಸಬಹುದು. ಅಗತ್ಯವಿದ್ದರೆ ತೆರಿಗೆ ತಜ್ಞರು ಅಥವಾ ವಕೀಲರ ಸಲಹೆ ಪಡೆಯಬಹುದು.
ಉಳಿತಾಯದ ಹಣ ಉಳಿಸಿಕೊಳ್ಳಲು ಈ ವಿಚಾರ ನೆನಪಿರಲಿ!
ಜೀವನಪೂರ್ತಿ ದುಡಿದು ಕೂಡಿಟ್ಟ ಹಣಕ್ಕೆ ಭದ್ರತೆ ಇರಬೇಕು ಎಂಬುದು ಪ್ರತಿಯೊಬ್ಬರ ಆಸೆ. ಪಿಪಿಎಫ್ ಯೋಜನೆಯು ಹೂಡಿಕೆದಾರರಿಗೆ ಕೆಲವು ಕಾನೂನಾತ್ಮಕ ರಕ್ಷಣೆ ಒದಗಿಸುತ್ತದೆ. ಆದರೆ, ಇದು ತೆರಿಗೆ ಬಾಕಿಯಿಂದ ಸಂಪೂರ್ಣ ವಿನಾಯಿತಿ ನೀಡುವುದಿಲ್ಲ.
ಆದ್ದರಿಂದ ಆದಾಯ ತೆರಿಗೆ ಇಲಾಖೆಯಿಂದ ನೋಟಿಸ್ ಬಂದರೆ ನಿರ್ಲಕ್ಷಿಸಬೇಡಿ. ಬಾಕಿ ಮೊತ್ತದ ಬಗ್ಗೆ ಆಕ್ಷೇಪಣೆಗಳಿದ್ದರೆ ಸೂಕ್ತ ಸಮಯದಲ್ಲಿ ಮೇಲ್ಮನವಿ ಸಲ್ಲಿಸಿ ಅಥವಾ ಕಾನೂನುಬದ್ಧ ಪರಿಹಾರ ಪಡೆಯಿರಿ. ನಿಮ್ಮ ಉಳಿತಾಯ ಸುರಕ್ಷಿತವಾಗಿರಬೇಕಾದರೆ ಹೂಡಿಕೆಯ ಜೊತೆಗೆ ತೆರಿಗೆ ನಿಯಮಗಳ ಬಗ್ಗೆಯೂ ಅರಿವು ಹೊಂದಿರುವುದು ಅಷ್ಟೇ ಮುಖ್ಯ.
ಹಕ್ಕು ನಿರಾಕರಣೆ: ಈ ವರದಿಯು ಕೇವಲ ಮಾಹಿತಿ ಮತ್ತು ಜಾಗೃತಿ ಉದ್ದೇಶಕ್ಕಾಗಿ ಪ್ರಕಟಿಸಲಾಗಿದೆ. ಪಿಪಿಎಫ್ ಖಾತೆಯ ಹಣಕ್ಕೆ ದೊರೆಯುವ ಕಾನೂನಿನ ರಕ್ಷಣೆ ಹಾಗೂ ಆದಾಯ ತೆರಿಗೆ ವಸೂಲಾತಿಗೆ ಸಂಬಂಧಿಸಿದ ನಿಯಮಗಳು ಪ್ರಕರಣದ ಸಂದರ್ಭ ಮತ್ತು ಅನ್ವಯವಾಗುವ ಕಾನೂನುಗಳನ್ನು ಅವಲಂಬಿಸಿರುತ್ತವೆ. ಹಣಕಾಸು ಅಥವಾ ಕಾನೂನು ನಿರ್ಧಾರ ಕೈಗೊಳ್ಳುವ ಮೊದಲು ಅರ್ಹ ತೆರಿಗೆ ತಜ್ಞರು ಅಥವಾ ಕಾನೂನು ಪರಿಣತರ ಸಲಹೆ ಪಡೆಯಿರಿ. ಈ ವರದಿಯನ್ನು ಕಾನೂನು ಅಥವಾ ತೆರಿಗೆ ಸಲಹೆ ಎಂದು ಪರಿಗಣಿಸಬಾರದು.
