ನವದೆಹಲಿ: ದೇಶದ ಚಿನ್ನ ಮತ್ತು ಬೆಳ್ಳಿ ಮಾರುಕಟ್ಟೆಯಲ್ಲಿ ಸ್ಥಿರತೆ ತರಲು ಹಾಗೂ ಪೂರೈಕೆಯಲ್ಲಿನ ಕೊರತೆಯನ್ನು ನೀಗಿಸಲು ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ. 2029ರ ಮಾರ್ಚ್ 31ರವರೆಗೆ ಭಾರತಕ್ಕೆ ಚಿನ್ನ ಮತ್ತು ಬೆಳ್ಳಿಯನ್ನು (Bullion) ಆಮದು ಮಾಡಿಕೊಳ್ಳಲು ದೇಶದ 15 ಪ್ರಮುಖ ಬ್ಯಾಂಕ್‌ಗಳಿಗೆ ಕೇಂದ್ರ ವಾಣಿಜ್ಯ ಸಚಿವಾಲಯದ ಅಧೀನದ ವಿದೇಶಿ ವ್ಯಾಪಾರ ಮಹಾನಿರ್ದೇಶನಾಲಯ (DGFT) ಅಧಿಕೃತ ಅನುಮತಿ ನೀಡಿದೆ.
ಈ ಕುರಿತು ಹೊಸ ಅಧಿಸೂಚನೆಯನ್ನು ಹೊರಡಿಸಿರುವ ಸಚಿವಾಲಯವು, ಆಮದು ಪ್ರಕ್ರಿಯೆಯನ್ನು ಸುಗಮಗೊಳಿಸಲು ಅಧಿಕೃತ ಬ್ಯಾಂಕ್‌ಗಳ ಹೊಸ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಈ ದೀರ್ಘಾವಧಿ ಅನುಮತಿಯಿಂದಾಗಿ ಮಾರುಕಟ್ಟೆಯಲ್ಲಿ ಹಳದಿ ಲೋಹದ ಲಭ್ಯತೆ ಹೆಚ್ಚಾಗಲಿದ್ದು, ಆಭರಣ ಉದ್ಯಮಕ್ಕೆ ದೊಡ್ಡ ಬಲ ಸಿಕ್ಕಂತಾಗಿದೆ. ಪಾರದರ್ಶಕ ಆಮದು ವ್ಯವಸ್ಥೆಯನ್ನು ಬಲಪಡಿಸುವುದು ಸರ್ಕಾರದ ಈ ಮಹತ್ವದ ಕ್ರಮದ ಮುಖ್ಯ ಉದ್ದೇಶವಾಗಿದೆ.
ವರ್ಲ್ಡ್ ಗೋಲ್ಡ್ ಕೌನ್ಸಿಲ್ (WGC) ವರದಿಯ ಪ್ರಕಾರ 2025ರಲ್ಲಿ ಭಾರತದಲ್ಲಿ ಚಿನ್ನಕ್ಕೆ ಇರುವ ಬೇಡಿಕೆಯು 710.9 ಮೆಟ್ರಿಕ್ ಟನ್ಗೆ ಇಳಿಕೆಯಾಗಿದೆ. ಚಿನ್ನದ ಬೆಲೆ ಏರಿಕೆ ಮತ್ತು ಗ್ರಾಹಕರಲ್ಲಿ ಉಂಟಾಗಿರುವ ಖರೀದಿ ನಿರಾಸಕ್ತಿ ಈ ಕುಸಿತಕ್ಕೆ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ.
ಆರ್ಥಿಕತೆಗೆ ಲಾಭ: ಚಿನ್ನದ ಬೇಡಿಕೆ ಕುಸಿದರೆ ದೇಶದ ಆಮದು ವೆಚ್ಚ ಕಡಿಮೆಯಾಗುತ್ತದೆ. ಇದು ಅಂತರಾಷ್ಟ್ರೀಯ ಮಟ್ಟದಲ್ಲಿ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯ ವೃದ್ಧಿಸಲು ಮತ್ತು ದೇಶದ ಆರ್ಥಿಕ ಸ್ಥಿತಿಗತಿ ಸುಧಾರಿಸಲು ಸಹಕಾರಿಯಾಗಲಿದೆ.
ಚಿನ್ನ ಮತ್ತು ಬೆಳ್ಳಿ ಆಮದು ಮಾಡಿಕೊಳ್ಳುವ ಅಧಿಕೃತ ಬ್ಯಾಂಕ್‌ಗಳ ಪಟ್ಟಿ:
ಚಿನ್ನ ಮತ್ತು ಬೆಳ್ಳಿ ಎರಡನ್ನೂ ಆಮದು ಮಾಡಿಕೊಳ್ಳಲು ಕೇಂದ್ರ ಸರ್ಕಾರ ಒಟ್ಟು 15 ಬ್ಯಾಂಕ್‌ಗಳಿಗೆ 2029ರವರೆಗೆ ಅಧಿಕಾರ ನೀಡಿದೆ. ಅವುಗಳೆಂದರೆ:
ಎಕ್ಸಿಸ್ ಬ್ಯಾಂಕ್
ಬ್ಯಾಂಕ್ ಆಫ್ ಇಂಡಿಯಾ
ಡ್ಯೂಶೆ ಬ್ಯಾಂಕ್
ಫೆಡರಲ್ ಬ್ಯಾಂಕ್
ಎಚ್ಡಿಎಫ್ಸಿ ಬ್ಯಾಂಕ್
ಐಸಿಐಸಿಐ ಬ್ಯಾಂಕ್
ಇಂಡಸ್ಇಂಡ್ ಬ್ಯಾಂಕ್
ಇಂಡಿಯನ್ ಓವರ್ಸೀಸ್ ಬ್ಯಾಂಕ್
ಕೋಟಕ್ ಮಹೀಂದ್ರ ಬ್ಯಾಂಕ್
ಕರೂರ್ ವೈಷ್ಯ ಬ್ಯಾಂಕ್
ಪಂಜಾಬ್ ನ್ಯಾಷನಲ್ ಬ್ಯಾಂಕ್
ಆರ್ಬಿಐ ಬ್ಯಾಂಕ್ (RBL)
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI)
ಯೆಸ್ ಬ್ಯಾಂಕ್
ಇಂಡಸ್ಟ್ರಿಯಲ್ ಅಂಡ್ ಕಮರ್ಷಿಯಲ್ ಬ್ಯಾಂಕ್ ಆಫ್ ಚೀನಾ
ಆಮದು ಮಾಡಿಕೊಳ್ಳಲಾದ ಚಿನ್ನ ಮತ್ತು ಬೆಳ್ಳಿಯನ್ನು ಈ ಬ್ಯಾಂಕ್‌ಗಳು ದೇಶೀಯ ಮಾರುಕಟ್ಟೆಯಲ್ಲಿ ರೀಟೇಲ್ ಕ್ಷೇತ್ರಕ್ಕೆ ಪೂರೈಸುತ್ತವೆ. ಪ್ರಮುಖವಾಗಿ:
ಆಭರಣದಂಗಡಿಗಳಿಗೆ ಕಚ್ಚಾ ಚಿನ್ನ ಪೂರೈಕೆ.
ಗೋಲ್ಡ್ ರಿಫೈನರಿಗಳಿಗೆ ರವಾನೆ.
ದೊಡ್ಡ ಮಟ್ಟದ ರೀಟೇಲ್ ಮಾರಾಟಗಾರರಿಗೆ ಮಾರಾಟ.
ಈ ಪ್ರಕ್ರಿಯೆಯ ಮೂಲಕ ದೇಶದ ಆಭರಣ ಮಾರುಕಟ್ಟೆಗೆ ನಿರಂತರವಾಗಿ ಹೊಸ ಚಿನ್ನ ಮತ್ತು ಬೆಳ್ಳಿಯ ಪೂರೈಕೆಯಾಗುತ್ತದೆ.
