ಪತಿಯ ಆಯುಷ್ಯ ವೃದ್ಧಿಗಾಗಿ ಪತ್ನಿ ಉಪವಾಸ ಮಾಡುವ ಹಬ್ಬವೇ ಕರವಾಚೌತ್. ಪತಿಯ ಮುಖವನ್ನು ನೋಡಿ ಉಪವಾಸ ಮುರಿಯುವ ಸಂಪ್ರದಾಯ ಈ ಹಬ್ಬದ ವಿಶೇಷ. ಆದರೆ ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಈ ಬಾರಿಯ ಕರವಾಚೌತ್ ಹಬ್ಬ ಮಾತ್ರ ವಿಚಿತ್ರ ಕೌಟುಂಬಿಕ ಹೈಡ್ರಾಮಾಕ್ಕೆ ಸಾಕ್ಷಿಯಾಗಿದೆ. ಒಬ್ಬನೇ ಪತಿಗಾಗಿ ಮೂವರು ಪತ್ನಿಯರು ಉಪವಾಸ ಮಾಡಿದ್ದಲ್ಲದೆ, ಪತಿಯೊಂದಿಗೆ ಮೊದಲು ಪೂಜೆ ಸಲ್ಲಿಸುವವರು ಯಾರು ಎಂಬ ವಿಚಾರಕ್ಕೆ ಪರಸ್ಪರ ಜಗಳವಾಡಿಕೊಂಡಿದ್ದಾರೆ. ಕೊನೆಗೆ ಮನೆಯೊಳಗಿನ ವಿವಾದ ಪೊಲೀಸ್ ಠಾಣೆಯ ಮೆಟ್ಟಿಲೇರಿದೆ!
ಒಬ್ಬ ಪತಿ, ಮೂವರು ಪತ್ನಿಯರು; ಪೂಜೆಯ ವಿಚಾರಕ್ಕೆ ಪೈಪೋಟಿ!
ಕಾನ್ಪುರದ ಬಿಠೂರ್ ಪ್ರದೇಶದ ಗ್ರಾಮವೊಂದರಲ್ಲಿ ಈ ವಿಚಿತ್ರ ಘಟನೆ ನಡೆದಿದೆ ಎನ್ನಲಾಗಿದೆ. ಯುವಕನಿಗೆ ಮೊದಲಿಗೆ ಮದುವೆಯಾಗಿತ್ತು. ಆದರೆ ಹಲವು ವರ್ಷಗಳಾದರೂ ದಂಪತಿಗೆ ಮಕ್ಕಳಾಗಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಮೊದಲ ಪತ್ನಿಯೇ ತನ್ನ ಸ್ನೇಹಿತೆಯನ್ನು ಪತಿಗೆ ಎರಡನೇ ಮದುವೆ ಮಾಡಿಸಿದ್ದಳು. ಎರಡನೇ ಪತ್ನಿಗೆ ಹೆಣ್ಣು ಮಗುವೂ ಜನಿಸಿತ್ತು.
ಎಲ್ಲವೂ ಸುಸೂತ್ರವಾಗಿ ನಡೆಯುತ್ತಿದೆ ಎನ್ನುವಷ್ಟರಲ್ಲಿ ಪತಿ ಮೂರನೇ ಮದುವೆಯನ್ನೂ ಮಾಡಿಕೊಂಡಿದ್ದ. ಹೀಗೆ ಒಬ್ಬನೇ ವ್ಯಕ್ತಿಯ ಜೀವನದಲ್ಲಿ ಮೂವರು ಪತ್ನಿಯರು ಬಂದಿದ್ದರು. ಆದರೆ ಕರವಾಚೌತ್ ಹಬ್ಬದ ದಿನ ಈ ಮೂವರ ನಡುವೆ ಹೊಸ ವಿವಾದ ಶುರುವಾಗಿದೆ. ಪತಿಯೊಂದಿಗೆ ಮೊದಲು ಪೂಜೆ ಸಲ್ಲಿಸುವವರು ಯಾರು? ಎಂಬ ಪ್ರಶ್ನೆಯೇ ದೊಡ್ಡ ಜಗಳಕ್ಕೆ ಕಾರಣವಾಗಿದೆ. ಪತಿಯ ಪ್ರೀತಿ ಮತ್ತು ಗಮನ ಪಡೆಯುವ ವಿಚಾರದಲ್ಲಿ ಮೂವರ ನಡುವೆ ಮಾತಿನ ಚಕಮಕಿ ನಡೆದಿದೆ ಎನ್ನಲಾಗಿದೆ.
ಮನೆಯ ಜಗಳ ಪೊಲೀಸ್ ಠಾಣೆಗೆ!
ವಿವಾದ ತೀವ್ರ ಸ್ವರೂಪ ಪಡೆದುಕೊಂಡಿದ್ದರಿಂದ ಮೊದಲ ಮತ್ತು ಎರಡನೇ ಪತ್ನಿಯರು ಮಂಧನಾ ಪೊಲೀಸ್ ಠಾಣೆಗೆತೆರಳಿದ್ದಾರೆ. ಮೂರನೇ ಪತ್ನಿಯೂ ಅಲ್ಲಿಗೆ ಬಂದಿದ್ದಾಳೆ. ಪೊಲೀಸರು ಮೂವರನ್ನು ಸಮಾಧಾನಪಡಿಸಲು ಸಾಕಷ್ಟು ಸಮಯ ಮಾತುಕತೆ ನಡೆಸಿದ್ದಾರೆ. ಕೊನೆಗೆ ಮೂವರೂ ಒಟ್ಟಿಗೆ ಕರವಾಚೌತ್ ವ್ರತ ಆಚರಿಸಿ, ಪೂಜೆ ಸಲ್ಲಿಸಲು ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ.
ಆದರೆ ಪೊಲೀಸ್ ಠಾಣೆಯಿಂದ ಹೊರಬಂದ ಬಳಿಕವೂ ವಾಗ್ವಾದ ಮುಂದುವರಿದಿದೆ. ರಸ್ತೆಯಲ್ಲೇ ಮತ್ತೆ ಮಾತಿನ ಚಕಮಕಿ ನಡೆದಿದ್ದು, ಕೊನೆಗೂ ಮೂವರು ಒಟ್ಟಿಗೆ ಪೂಜೆ ಮಾಡಲು ನಿರ್ಧರಿಸಿದ್ದಾರೆ.
ಪ್ರೀತಿಗಾಗಿ ಮತ್ತೊಂದು ಹೋರಾಟ; ಪ್ರಿಯಕರನ ಮನೆಯಲ್ಲೇ ವ್ರತ ಮುರಿಯುವ ಹಠ!
ಇದೇ ಕಾನ್ಪುರದಲ್ಲಿ ಕರವಾಚೌತ್ ದಿನ ಮತ್ತೊಂದು ಪ್ರೇಮದ ಕಥೆಯೂ ಗಮನ ಸೆಳೆದಿದೆ. ಬಿಠೂರ್ ಪ್ರದೇಶದ ಯುವತಿಯೊಬ್ಬಳು ತನ್ನ ಪ್ರಿಯಕರನ ಮನೆಯಲ್ಲೇ ಉಪವಾಸ ಮುರಿಯಬೇಕು ಎಂದು ಹಠ ಹಿಡಿದಿದ್ದಾಳೆ.
ಯುವಕ ಮತ್ತು ಯುವತಿ ಹಲವು ವರ್ಷಗಳಿಂದ ಪ್ರೀತಿಸುತ್ತಿದ್ದರು ಎನ್ನಲಾಗಿದೆ. ಇಬ್ಬರ ಮನೆಗಳೂ ಎದುರುಬದುರಾಗಿವೆ. ಅಪ್ರಾಪ್ತರಾಗಿದ್ದಾಗ ಕುಟುಂಬದ ವಿರೋಧದ ಹಿನ್ನೆಲೆಯಲ್ಲಿ ಇಬ್ಬರೂ ಬಾಡಿಗೆ ಮನೆಯಲ್ಲಿ ಒಟ್ಟಿಗೆ ವಾಸವಿದ್ದರು ಎಂದು ವರದಿಯಾಗಿದೆ. ವಯಸ್ಕರಾದ ಬಳಿಕ ಯುವಕ ತನ್ನ ಪ್ರೀತಿಯ ವಿಚಾರವನ್ನು ಮನೆಯವರಿಗೆ ತಿಳಿಸಿ ಮದುವೆಗೆ ಒಪ್ಪಿಗೆ ಕೇಳಿದ್ದ. ಆದರೆ ಕುಟುಂಬದವರು ನಿರಾಕರಿಸಿದ್ದರು.
ಇದರಿಂದ ಕರವಾಚೌತ್ ದಿನ ಯುವತಿ ಉಪವಾಸವಿದ್ದು, ತನ್ನ ಪ್ರಿಯಕರನೊಂದಿಗೆ ಪೊಲೀಸ್ ಠಾಣೆಗೆ ಬಂದಿದ್ದಾಳೆ. ಪ್ರಿಯಕರನ ಮನೆಗೆ ತೆರಳಿಯೇ ವ್ರತ ಮುರಿಯುತ್ತೇನೆ ಎಂದು ಪಟ್ಟು ಹಿಡಿದಿದ್ದಾಳೆ. ಯುವಕ ಕೂಡ ಆಕೆಯನ್ನು ಮನೆಗೆ ಕರೆದೊಯ್ಯಲು ಪೊಲೀಸರಿಂದ ರಕ್ಷಣೆ ಕೋರಿದ್ದಾನೆ.
ಎರಡೂ ಕುಟುಂಬಗಳ ನಡುವೆ ಗಂಟೆಗಟ್ಟಲೆ ಮಾತುಕತೆ ನಡೆದ ಬಳಿಕ ಯುವಕನ ಮನೆಯವರು ಮದುವೆಗೆ ಒಪ್ಪಿಗೆ ಸೂಚಿಸಿದ್ದಾರೆ. ಇದರಿಂದ ಸಂತಸಗೊಂಡ ಯುವತಿ ಪ್ರಿಯಕರನ ಮನೆಗೆ ತೆರಳಿ ಅಲ್ಲಿಯೇ ತನ್ನ ಉಪವಾಸ ಮುರಿದಿದ್ದಾಳೆ.
ಒಂದೇ ಹಬ್ಬ, ಎರಡು ವಿಭಿನ್ನ ಕಥೆಗಳು!
ಒಂದೆಡೆ ಪತಿಯೊಂದಿಗೆ ಮೊದಲು ಪೂಜೆ ಸಲ್ಲಿಸಲು ಮೂವರು ಪತ್ನಿಯರ ನಡುವೆ ಪೈಪೋಟಿ, ಮತ್ತೊಂದೆಡೆ ಪ್ರೀತಿಸಿದವನ ಮನೆಯಲ್ಲೇ ಉಪವಾಸ ಮುರಿಯಬೇಕೆಂದು ಯುವತಿಯ ಹಠ! ಕರವಾಚೌತ್ ಹಬ್ಬದಂದು ಕಾನ್ಪುರದಲ್ಲಿ ನಡೆದ ಈ ಎರಡು ಘಟನೆಗಳು ಸ್ಥಳೀಯರ ಗಮನ ಸೆಳೆದಿವೆ.
