ಸಾರ್ವಜನಿಕ ಸೇವೆಯಲ್ಲಿರುವ ಅಧಿಕಾರಿಗಳು ಜನರೊಂದಿಗೆ ಹೇಗೆ ವರ್ತಿಸಬೇಕು ಎಂಬುದಕ್ಕೆ ವಿರುದ್ಧವಾಗಿ ನಡೆದ ಘಟನೆಯೊಂದು ಈಗ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಮಧ್ಯಪ್ರದೇಶದ ನರಸಿಂಗಪುರದ ಬರ್ಮನ್ ಸ್ಯಾಂಡ್ ಘಾಟ್‌ನಲ್ಲಿ ಐಎಎಸ್ ಅಧಿಕಾರಿ ಗಜೇಂದ್ರ ನಾಗೇಶ್ ಎನ್ನಲಾದ ವ್ಯಕ್ತಿಯೊಬ್ಬರು ಸಾರ್ವಜನಿಕವಾಗಿ ಯುವಕನಿಗೆ ಹೊಡೆದು, ವೃದ್ಧ ಅರ್ಚಕರೊಬ್ಬರಿಗೆ ಅಸಭ್ಯವಾಗಿ ಬೈದಿರುವ ವಿಡಿಯೋ ಈಗ ವೈರಲ್ ಆಗಿದೆ.
ಘಟನೆಯ ಹಿನ್ನೆಲೆ ಏನು? ವರದಿಗಳ ಪ್ರಕಾರ, ಘಾಟ್ ಬಳಿ ಅರ್ಚಕರೊಬ್ಬರು ಬಹಿರ್ದೆಶೆ ಮಾಡುತ್ತಿದ್ದಾಗ ಅಧಿಕಾರಿ ಅವರನ್ನು ತಡೆದಿದ್ದಾರೆ. ಈ ವೇಳೆ ಅರ್ಚಕರು, “ಸರ್, ಇಲ್ಲಿ ಸಾರ್ವಜನಿಕ ಶೌಚಾಲಯಗಳೇ ಇಲ್ಲ, ಹಾಗಾಗಿ ಅನಿವಾರ್ಯವಾಗಿ ಇಲ್ಲಿಗೆ ಬರಬೇಕಾಯಿತು” ಎಂದು ವಿನಂತಿಸಿಕೊಂಡಿದ್ದಾರೆ. ಈ ಮಾತಿನಿಂದ ಕುಪಿತರಾದ ಅಧಿಕಾರಿ, ಪಕ್ಕದಲ್ಲೇ ನಿಂತಿದ್ದ ಯುವಕನೊಬ್ಬನ ಕೆನ್ನೆಗೆ ಬಲವಾಗಿ ಬಾರಿಸಿದ್ದಾರೆ. ಜೊತೆಗೆ ಅಲ್ಲಿದ್ದ ಪೊಲೀಸರಿಗೂ ಆತನಿಗೆ ಹೊಡೆಯುವಂತೆ ಸೂಚಿಸಿದ್ದಾರೆ.
‘ನಿನ್ನನ್ನು ಮರಳಿನಲ್ಲಿ ಹೂತು ಹಾಕುವೆ’ ಶೌಚಾಲಯದ ಕೊರತೆಯ ಬಗ್ಗೆ ದೂರು ನೀಡಿದ ವೃದ್ಧ ಅರ್ಚಕರಿಗೆ ಅಧಿಕಾರಿ ಅತಿ ಕೆಟ್ಟದಾಗಿ ಧಮಕಿ ಹಾಕಿದ್ದಾರೆ. “ನಿನ್ನನ್ನು ಇಲ್ಲೇ ಮರಳಿನಲ್ಲಿ ಹೂತು ಹಾಕುತ್ತೇನೆ, ಎಷ್ಟು ಆಳಕ್ಕೆ ಬೇಕೋ ಅಷ್ಟು ಆಳಕ್ಕೆ ತುಳಿಯುತ್ತೇನೆ” ಎಂದು ಕೂಗಾಡಿದ್ದಾರೆ. ಅಷ್ಟೇ ಅಲ್ಲದೆ, ಹೊಡೆತ ತಿಂದ ಯುವಕನ ಅಂಗಡಿಯನ್ನು ಅಲ್ಲಿಂದ ತೆರವುಗೊಳಿಸುವಂತೆ ಅಧಿಕಾರಿ ಆದೇಶಿಸಿದ್ದಾರೆ. ತಂದೆಯ ಸಮಾನ ವಯಸ್ಸಿನ ಅರ್ಚಕರೊಂದಿಗೆ ಇಂತಹ ಭಾಷೆ ಬಳಸಿರುವುದು ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ.
ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ ಪತ್ರಕರ್ತ ಶುಭಂ ಶುಕ್ಲಾ ಈ ವಿಡಿಯೋವನ್ನು ಹಂಚಿಕೊಂಡಿದ್ದು, “ಒಬ್ಬ ಐಎಎಸ್ ಅಧಿಕಾರಿ ರೌಡಿಗಳಂತೆ ವರ್ತಿಸುವುದು ಸರಿಯೇ?” ಎಂದು ಪ್ರಶ್ನಿಸಿದ್ದಾರೆ. ವಿಡಿಯೋ ವೀಕ್ಷಿಸಿದ ಜನರು, “ಅಧಿಕಾರಿಗಳಿಗೆ ಹೊಡೆಯುವ ಹಕ್ಕು ಕೊಟ್ಟವರು ಯಾರು? ಕಾನೂನು ಪಾಲನೆ ಮಾಡುವುದು ಅವರ ಕೆಲಸವೇ ಹೊರತು ದೌರ್ಜನ್ಯ ಮಾಡುವುದಲ್ಲ. ಶೌಚಾಲಯ ಕಟ್ಟಿಸಿಕೊಡುವುದು ಅವರ ಜವಾಬ್ದಾರಿಯಲ್ಲವೇ?” ಎಂದು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ನಿಯಮ ಉಲ್ಲಂಘಿಸುವವರಿಗೆ ದಂಡ ಹಾಕುವ ಅಥವಾ ಕಾನೂನು ಕ್ರಮ ಜರುಗಿಸುವ ಅಧಿಕಾರ ಅಧಿಕಾರಿಗಳಿಗಿದೆ. ಆದರೆ, ಸಾರ್ವಜನಿಕವಾಗಿ ದೈಹಿಕವಾಗಿ ಹಲ್ಲೆ ಮಾಡುವುದು ಮತ್ತು ಅಸಭ್ಯವಾಗಿ ವರ್ತಿಸಿರುವುದು ಸಾರ್ವಜನಿಕ ಸೇವೆಯ ಘನತೆಗೆ ಕುಂದು ತಂದಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ.
