ಇಂದು ಫೆಬ್ರವರಿ 14, ಜಗತ್ತಿನಾದ್ಯಂತ ಪ್ರೇಮಿಗಳ ದಿನದ (Valentine’s Day) ಸಂಭ್ರಮ ಮನೆಮಾಡಿದೆ. ಪ್ರೀತಿಯನ್ನು ವ್ಯಕ್ತಪಡಿಸಲು ಕಾತರದಿಂದ ಕಾಯುತ್ತಿದ್ದ ಜೋಡಿಗಳು ಇಂದು ಪರಸ್ಪರ ಉಡುಗೊರೆಗಳನ್ನು ನೀಡುವ ಮೂಲಕ ಸಂಭ್ರಮಿಸುತ್ತಿದ್ದಾರೆ. ನಗರದ ಮಾಲ್‌ಗಳು, ಪಾರ್ಕ್‌ಗಳು ಮತ್ತು ರೆಸ್ಟೋರೆಂಟ್‌ಗಳು ಈಗಾಗಲೇ ಪ್ರೇಮಿಗಳ ಸ್ವಾಗತಕ್ಕೆ ಸಜ್ಜಾಗಿವೆ.
ನಾವು ಟಾಲಿವುಡ್, ಬಾಲಿವುಡ್, ಹಾಲಿವುಡ್ ಹೀಗೆ ಹಲವು ಪ್ರೇಮಕಥೆಗಳನ್ನು ನೋಡುತ್ತಾ ಬೆಳೆದಿದ್ದೇವೆ. ಪುಸ್ತಕಗಳು, ಹಾಡುಗಳೆಲ್ಲವೂ ಗಾಢವಾದ ಪ್ರೀತಿಯ ಬಗ್ಗೆ ಬಹಳ ದೊಡ್ಡದಾಗಿ ಹೇಳುತ್ತವೆ. ಆ ಫೀಲಿಂಗ್, ನಿದ್ರೆಯಿಲ್ಲದ ರಾತ್ರಿಗಳು, ಅದೊಂತರ ಮಸುಕಾದ ಅಮಲು.. ಎಲ್ಲವೂ ಮ್ಯಾಜಿಕ್‌ನಂತೆ ಅನಿಸುತ್ತದೆ. ಆದರೆ ನಿಜವಾಗಿ ಅಂತಹ ಪ್ರೀತಿಯ ಅನುಭವ ನಮಗೆ ಎಷ್ಟು ಬಾರಿ ಉಂಟಾಗುತ್ತದೆ? ಕಿನ್ಸೆ ಇನ್‌ಸ್ಟಿಟ್ಯೂಟ್ ನಡೆಸಿದ ಹೊಸ ಅಧ್ಯಯನವೊಂದು ಈ ಪ್ರಶ್ನೆಗೆ ಉತ್ತರ ನೀಡುವ ಪ್ರಯತ್ನ ಮಾಡಿದೆ. ಆ ಫಲಿತಾಂಶಗಳು ಅನೇಕರನ್ನು ಆಶ್ಚರ್ಯಗೊಳಿಸಬಹುದು.
ಸಂಶೋಧನೆ ಏನು ಹೇಳುತ್ತದೆ?
ಕಿನ್ಸೆ ಇನ್‌ಸ್ಟಿಟ್ಯೂಟ್‌ನ ಸಂಶೋಧಕರು 18 ರಿಂದ 99 ವರ್ಷ ವಯಸ್ಸಿನ 10,036 ಅಮೆರಿಕನ್ ಸಿಂಗಲ್ಸ್‌ಗಳ ಮೇಲೆ ಸಮಗ್ರ ಸಮೀಕ್ಷೆ ನಡೆಸಿದರು. “ನಿಮ್ಮ ಜೀವಿತಾವಧಿಯಲ್ಲಿ ನೀವು ಎಷ್ಟು ಬಾರಿ ಗಾಢವಾದ ಪ್ರೀತಿಯಲ್ಲಿ ಬಿದ್ದಿದ್ದೀರಿ?” ಎಂಬ ನೇರ ಪ್ರಶ್ನೆಯನ್ನು ಅವರನ್ನು ಕೇಳಲಾಯಿತು. ಈ ಸಮೀಕ್ಷೆಯಲ್ಲಿ ತಿಳಿದುಬಂದ ಸರಾಸರಿ ಉತ್ತರ 2.05. ಅಂದರೆ, ಒಬ್ಬ ಸಾಮಾನ್ಯ ಮನುಷ್ಯ ತನ್ನ ಜೀವನದಲ್ಲಿ ಕೇವಲ ಎರಡು ಬಾರಿ ಮಾತ್ರ ನಿಜವಾದ ಮತ್ತು ಗಾಢವಾದ ಪ್ರೀತಿಯನ್ನು ಅನುಭವಿಸುತ್ತಾನೆ ಎಂದು ಈ ಅಧ್ಯಯನ ಬಹಿರಂಗಪಡಿಸಿದೆ.
ಈ ಸಮೀಕ್ಷೆಯ ಅಂಕಿಅಂಶಗಳು ಹೀಗಿವೆ:
- 14% ಜನ: ತಾವು ಇದುವರೆಗೆ ಒಂದೇ ಒಂದು ಬಾರಿಯೂ ಪ್ರೀತಿಯಲ್ಲಿ ಬಿದ್ದಿಲ್ಲ ಎಂದು ಹೇಳಿದ್ದಾರೆ.
- 28% ಜನ: ಕೇವಲ ಒಂದು ಬಾರಿ ಮಾತ್ರ ಪ್ರೀತಿಯಲ್ಲಿ ಬಿದ್ದಿರುವುದಾಗಿ ತಿಳಿಸಿದ್ದಾರೆ.
- 30% ಜನ: ಎರಡು ಬಾರಿ ಪ್ರೀತಿಯ ರುಚಿ ನೋಡಿದ್ದೇವೆ ಎಂದು ಹೇಳಿದ್ದಾರೆ.
- 17% ಜನ: ಮೂರು ಬಾರಿ ಪ್ರೀತಿಯಲ್ಲಿ ಬಿದ್ದಿರುವುದಾಗಿ ಬಹಿರಂಗಪಡಿಸಿದ್ದಾರೆ.
- 11% ಜನ: ನಾಲ್ಕು ಅಥವಾ ಅದಕ್ಕಿಂತ ಹೆಚ್ಚು ಬಾರಿ ಪ್ರೀತಿಯಲ್ಲಿ ಬಿದ್ದಿರುವುದಾಗಿ ತಿಳಿಸಿದ್ದಾರೆ.
ಈ ಅಧ್ಯಯನದ ನೇತೃತ್ವ ವಹಿಸಿದ್ದ ಡಾ. ಅಮಂಡಾ ಗೆಸೆಲ್‌ಮನ್ ಮಾತನಾಡಿ, “ಮನುಷ್ಯರು ಗಾಢವಾದ ಪ್ರೀತಿಯ ಬಗ್ಗೆ ನಿರಂತರವಾಗಿ ಮಾತನಾಡಿಕೊಂಡರೂ, ಅಂತಹ ತೀವ್ರವಾದ ಅನುಭವ ಜೀವನದಲ್ಲಿ ಕೆಲವು ಬಾರಿ ಮಾತ್ರ ಸಂಭವಿಸುತ್ತದೆ” ಎಂದು ವಿವರಿಸಿದ್ದಾರೆ.
ಪ್ರೀತಿಯ ಅನುಭವ ಎಲ್ಲರಿಗೂ ಒಂದೇ ರೀತಿ ಇರುತ್ತದೆ
ಈ ಅಧ್ಯಯನದ ಮತ್ತೊಂದು ಮುಖ್ಯ ವಿಷಯವೆಂದರೆ, ಪ್ರೀತಿ ಎಂಬ ಭಾವನೆ ಎಲ್ಲರಿಗೂ ಸಮಾನವಾಗಿರುತ್ತದೆ. ಸ್ಟ್ರೈಟ್, ಗೇ, ಲೆಸ್ಬಿಯನ್ ಅಥವಾ ಬೈಸೆಕ್ಷುವಲ್.. ಹೀಗೆ ಯಾವುದೇವರ್ಗಕ್ಕೆ ಸೇರಿದವರಾದರೂ ಸರಿ, ಪ್ರೀತಿಯನ್ನು ಅನುಭವಿಸುವ ವಿಧಾನದಲ್ಲಿ ದೊಡ್ಡ ವ್ಯತ್ಯಾಸಗಳಿಲ್ಲ. ವಯಸ್ಸು ಹೆಚ್ಚಾದಂತೆ ಪ್ರೀತಿಯ ಅನುಭವಗಳ ಸಂಖ್ಯೆ ಸ್ವಲ್ಪ ಹೆಚ್ಚಾಗಿರುವುದು ಕಂಡುಬಂದಿದೆ, ಅಂದರೆ ಪ್ರೀತಿಗೆ ವಯಸ್ಸಿನ ಮಿತಿಯಿಲ್ಲ ಎಂಬುದನ್ನು ಇದು ಸಾಬೀತುಪಡಿಸುತ್ತದೆ. ಇನ್ನು ಸ್ತ್ರೀ-ಪುರುಷರ ವಿಷಯಕ್ಕೆ ಬಂದರೆ, ಪುರುಷರು ಮಹಿಳೆಯರಿಗಿಂತ ಸ್ವಲ್ಪ ಹೆಚ್ಚು ಬಾರಿ ಪ್ರೀತಿಯಲ್ಲಿ ಬಿದ್ದಿರುವುದಾಗಿ ಹೇಳಿಕೊಂಡಿದ್ದಾರೆ. ಆದರೆ ಈ ವ್ಯತ್ಯಾಸ ಬಹಳ ಕಡಿಮೆ ಇದೆ.
ಗಾಢವಾದ ಪ್ರೀತಿ vs ಸ್ಥಿರವಾದ ಪ್ರೀತಿ
ಪ್ರೀತಿ ಎನ್ನಲೆಕ್ಷಣ ನಮಗೆ ನೆನಪಾಗುವುದು ಆರಂಭದಲ್ಲಿರುವ ಉತ್ಸಾಹ, ನಿದ್ರೆಯಿಲ್ಲದ ರಾತ್ರಿಗಳು ಮತ್ತು ನಿರಂತರವಾಗಿ ಆ ವ್ಯಕ್ತಿಯ ಬಗ್ಗೆ ಆಲೋಚಿಸುವುದು. ಇದನ್ನು ಸಂಶೋಧಕರು ‘ಪ್ಯಾಶನೇಟ್ ಲವ್’ (Passionate Love) ಎಂದು ಕರೆಯುತ್ತಾರೆ. ಆದರೆ ಇದು ಹೆಚ್ಚು ಕಾಲ ಉಳಿಯುವುದಿಲ್ಲ. ಜವಾಬ್ದಾರಿಗಳು ಹೆಚ್ಚಾದಂತೆ ಮತ್ತು ಜೀವನದಲ್ಲಿ ಬದಲಾವಣೆಗಳು ಬಂದಂತೆ ಈ ತೀವ್ರತೆ ಕಡಿಮೆಯಾಗುತ್ತದೆ. ಇದರ ಬದಲಾಗಿ ‘ಕಂಪಾನಿಯೇಟ್ ಲವ್’ (Companionate Love) ಅಂದರೆ ‘ಸಹವರ್ತಿ ಪ್ರೀತಿ’ ಪ್ರಾಮುಖ್ಯತೆ ಪಡೆಯುತ್ತದೆ. ಇದು ನಂಬಿಕೆ, ಸಮಾಧಾನ ಮತ್ತು ಒಬ್ಬರಿಗೊಬ್ಬರು ತೋಡಾಗಿರುವುದರ ಮೇಲೆ ಆಧಾರಿತವಾಗಿರುತ್ತದೆ. ದೀರ್ಘಕಾಲದ ಸಂಬಂಧಗಳು ಗಟ್ಟಿಯಾಗಿರಲು ಈ ಸ್ಥಿರವಾದ ಪ್ರೇಮವೇ ಕಾರಣ ಎಂದು ತಜ್ಞರು ಹೇಳುತ್ತಾರೆ.
2026ರಲ್ಲಿ ಬದಲಾಗುತ್ತಿರುವ ಪ್ರೀತಿಯ ದೃಷ್ಟಿಕೋನ
ಇಂದಿನ ಸೋಶಿಯಲ್ ಮೀಡಿಯಾ ಮತ್ತು ಡೇಟಿಂಗ್ ಆ್ಯಪ್‌ಗಳ ಯುಗದಲ್ಲಿ ಪ್ರೀತಿಯ ಮೇಲಿನ ನಿರೀಕ್ಷೆಗಳು ಆಕಾಶ ಮುಟ್ಟುತ್ತಿವೆ. ಕಿನ್ಸೆ ನಡೆಸಿದ ‘ಸಿಂಗಲ್ಸ್ ಇನ್ ಅಮೆರಿಕಾ’ ಸಮೀಕ್ಷೆಯ ಪ್ರಕಾರ:
- 60% ಜನ ಸಿಂಗಲ್ಸ್‌ಗಳು ತಮ್ಮನ್ನು ತಾವು ‘ವೆರಿ ರೊಮ್ಯಾಂಟಿಕ್’ ಎಂದು ಕರೆದುಕೊಳ್ಳುತ್ತಾರೆ.
- 51% ಜನ ಕಳೆದ ತಲೆಮಾರುಗಳಿಗಿಂತ ಈಗ ಸಂಗಾತಿಯನ್ನು ಹುಡುಕುವ ವಿಷಯದಲ್ಲಿ ಹೆಚ್ಚು ಒತ್ತಡ ಅನುಭವಿಸುತ್ತಿದ್ದಾರೆ.
- 73% ಜನ ಸಿನಿಮಾಗಳಿಂದಾಗಿ ಪ್ರೀತಿಯ ಬಗ್ಗೆ ಅವಾಸ್ತವಿಕ ನಿರೀಕ್ಷೆಗಳು ಉಂಟಾಗುತ್ತಿವೆ ಎಂದು ನಂಬುತ್ತಾರೆ.
ಸೋಶಿಯಲ್ ಮೀಡಿಯಾದಲ್ಲಿ ಇತರರ ಕೃತಕ ಸಂತೋಷವನ್ನು ನೋಡಿ, ತಮ್ಮ ನಿಜ ಜೀವನ ಅಷ್ಟು ಚೆನ್ನಾಗಿಲ್ಲ ಎಂದು ಅನೇಕರು ನಿರಾಶೆಗೊಳ್ಳುತ್ತಿದ್ದಾರೆ. ಆದರೆ ಈ ಸಮೀಕ್ಷೆಯ ಫಲಿತಾಂಶಗಳು, ಗಾಢವಾದ ಪ್ರೀತಿ ಎಂಬುದು ಅಪರೂಪವಾಗಿ ಬರುವ ಒಂದು ವಿಶೇಷ ಅನುಭವ ಎಂದು ನೆನಪಿಸುತ್ತಿವೆ.
