ಹಬ್ಬ ಹರಿದಿನಗಳು ಅಥವಾ ವಿಶೇಷ ಸಮಾರಂಭಗಳಿದ್ದಾಗ ಮನೆಯಲ್ಲೇ ಸಿಹಿ ತಿಂಡಿಗಳನ್ನು ಮಾಡಲು ಹಲವರು ಇಷ್ಟಪಡುತ್ತಾರೆ. ಬೇಕರಿಗಳಲ್ಲಿ ಸಿಗುವಂತೆ ಮೇಲ್ಭಾಗದಲ್ಲಿ ಗರಿಗರಿಯಾಗಿ, ಒಳಗೆ ಜ್ಯೂಸಿಯಾಗಿರುವ ಬಾದುಶಾವನ್ನು ಮನೆಯಲ್ಲೇ ಅತ್ಯಂತ ಸುಲಭವಾಗಿ ತಯಾರಿಸಬಹುದು. ಹದವಾದ ಪಾಕ ಮತ್ತು ಸರಿಯಾದ ಕ್ರಮವನ್ನು ಅನುಸರಿಸಿದರೆ ಯಾವುದೇ ಕಷ್ಟವಿಲ್ಲದೆ ರುಚಿಕರವಾದ ಬಾದುಶಾ ನಿಮ್ಮದಾಗುತ್ತದೆ. ಇದನ್ನು ಮಾಡುವ ಸರಳ ವಿಧಾನ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು: ಮೈದಾ ಹಿಟ್ಟು – ಎರಡು ಕಪ್ ತುಪ್ಪ ಅಥವಾ ಬೆಣ್ಣೆ – ಅರ್ಧ ಕಪ್ ಮೊಸರು – ಮೂರು ಚಮಚ ಅಡುಗೆ ಸೋಡಾ – ಅರ್ಧ ಚಮಚ ಸಕ್ಕರೆ – ಎರಡು ಕಪ್ ಏಲಕ್ಕಿ ಪುಡಿ – ಒಂದು ಚಮಚ ಕರಿಯಲು ಎಣ್ಣೆ ಅಥವಾ ತುಪ್ಪ
ಮಾಡುವ ವಿಧಾನ: ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೈದಾ ಹಿಟ್ಟು, ಅಡುಗೆ ಸೋಡಾ ಮತ್ತು ಕರಗಿಸಿದ ತುಪ್ಪವನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಇದಕ್ಕೆ ಮೊಸರನ್ನು ಸೇರಿಸಿ ಮಿಶ್ರಣ ಮಾಡಿಕೊಳ್ಳಿ. ಅಗತ್ಯವಿದ್ದರೆ ಸ್ವಲ್ಪ ನೀರನ್ನು ಚಿಮುಕಿಸಿಕೊಂಡು ಮೃದುವಾದ ಹಿಟ್ಟನ್ನು ಸಿದ್ಧಪಡಿಸಿಕೊಳ್ಳಿ. ಹಿಟ್ಟನ್ನು ಅತಿಯಾಗಿ ಕಿವುಚಬಾರದು, ಕೇವಲ ಎಲ್ಲವನ್ನೂ ಒಟ್ಟಿಗೆ ಸೇರಿಸಿ ಮುಚ್ಚಿಟ್ಟು ಅರ್ಧ ಗಂಟೆ ನೆನೆಯಲು ಬಿಡಿ. ಇದರಿಂದ ಬಾದುಶಾ ಮೃದುವಾಗಿ ಬರುತ್ತದೆ.
ಮತ್ತೊಂದೆಡೆ ಸಕ್ಕರೆ ಪಾಕವನ್ನು ಸಿದ್ಧಪಡಿಸಿಕೊಳ್ಳಿ. ಒಂದು ಪಾತ್ರೆಗೆ ಸಕ್ಕರೆ ಮತ್ತು ಅದು ಮುಳುಗುವಷ್ಟು ನೀರನ್ನು ಹಾಕಿ ಕುದಿಯಲು ಬಿಡಿ. ಇದು ಒಂದು ಎಳೆ ಪಾಕ ಬರುವ ಹಂತಕ್ಕೆ ಬಂದಾಗ ಏಲಕ್ಕಿ ಪುಡಿಯನ್ನು ಸೇರಿಸಿ ಒಲೆಯಿಂದ ಕೆಳಗಿಳಿಸಿ. ಪಾಕ ಗಟ್ಟಿಯಾಗದಂತೆ ಇರಲು ಇದಕ್ಕೆ ಕೆಲವು ಹನಿ ನಿಂಬೆ ರಸವನ್ನು ಸೇರಿಸಬಹುದು.
ಈಗ ನೆನೆದಿರುವ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿಕೊಂಡು, ಅಂಗೈ ಮಧ್ಯೆ ಇಟ್ಟು ಲಘುವಾಗಿ ಒತ್ತಿ. ಅದರ ಮಧ್ಯಭಾಗದಲ್ಲಿ ಹೆಬ್ಬೆರಳಿನಿಂದ ಸಣ್ಣದಾಗಿ ಒತ್ತಿ ಹೊಂಡದಂತೆ ಆಕಾರ ನೀಡಿ.
ಬಾಣಲೆಯಲ್ಲಿ ಎಣ್ಣೆಯನ್ನು ಕಡಿಮೆ ಉರಿಯಲ್ಲಿ ಕಾಯಲು ಇಡಿ. ಎಣ್ಣೆ ಅತಿಯಾಗಿ ಕಾಯಬಾರದು. ಸಿದ್ಧಪಡಿಸಿದ ಬಾದುಶಾಗಳನ್ನು ಎಣ್ಣೆಗೆ ಹಾಕಿ, ಅವು ತಾವಾಗಿಯೇ ಮೇಲಕ್ಕೆ ಬರುವವರೆಗೆ ಕಾಯಬೇಕು. ನಂತರ ಉರಿಯನ್ನು ಮಧ್ಯಮ ಹಂತಕ್ಕೆ ತಂದು, ಎರಡು ಕಡೆ ಚಿನ್ನದ ಬಣ್ಣ ಬರುವವರೆಗೆ ನಿಧಾನವಾಗಿ ಕರಿದು ತೆಗೆದುಕೊಳ್ಳಿ. ನಿಧಾನವಾಗಿ ಕರಿಯುವುದರಿಂದ ಒಳಭಾಗದವರೆಗೂ ಚೆನ್ನಾಗಿ ಬೇಯುತ್ತದೆ.
ಹೀಗೆ ಕರಿದ ತಕ್ಷಣವೇ ಬಿಸಿ ಬಾದುಶಾಗಳನ್ನು ಸಕ್ಕರೆ ಪಾಕಕ್ಕೆ ಹಾಕಿ. ಕನಿಷ್ಠ 15 ರಿಂದ 20 ನಿಮಿಷಗಳ ಕಾಲ ಪಾಕದಲ್ಲಿ ನೆನೆಯಲು ಬಿಟ್ಟರೆ, ಬಾದುಶಾ ಸಕ್ಕರೆ ರಸವನ್ನು ಚೆನ್ನಾಗಿ ಹೀರಿಕೊಳ್ಳುತ್ತದೆ. ಈಗ ಅತ್ಯಂತ ರುಚಿಕರವಾದ ಬೇಕರಿ ಶೈಲಿಯ ಬಾದುಶಾ ಸವಿಯಲು ಸಿದ್ಧ.
