ತುಮಕೂರು: ತುಮಕೂರು ಜಿಲ್ಲೆಯ ತಿಪಟೂರು ಎಪಿಎಂಸಿ ಮಾರುಕಟ್ಟೆಯಲ್ಲಿ ಸೋಮವಾರ ಒಣ ಕೊಬ್ಬರಿ ದರ ಕ್ವಿಂಟಾಲ್ ಗೆ 20900 ರೂ.ಗೆ ತಲುಪಿದ್ದು ರೈತರಲ್ಲಿ ಹರ್ಷ ತಂದಿದೆ.
ಇತ್ತೀಚಿನ ವರ್ಷಗಳಲ್ಲಿ ಒಣ ಕೊಬ್ಬರಿ ದರ ಕುಸಿದು ತೆಂಗು ಬೆಳೆಗಾರರಲ್ಲಿ ಆತಂಕ ತಂದಿದ್ದು, 2024ರ ಮಧ್ಯ ಭಾಗದಿಂದ ನಿಧಾನವಾಗಿ ಬೆಲೆ ಏರಿಕೆ ಕಾಣುತ್ತಿತ್ತು. ಕಳೆದ ಗುರುವಾರ ಎಪಿಎಂಸಿ ಕೊಬ್ಬರಿ ಮಾರುಕಟ್ಟೆಯಲ್ಲಿ ಹರಾಜಿನಲ್ಲಿ ಕ್ವಿಂಟಲ್ ಗೆ 19,566 ರೂಪಾಯಿಗೆ ತಲುಪಿದ್ದು, ಸೋಮವಾರ 20900 ರೂ.ಗೆ ಮಾರಾಟವಾಗಿದೆ.
ಬೆಳೆಗಾರರಲ್ಲಿ ಈ ದರ ಏರಿಕೆ ಸಂತಸ ತಂದಿದೆ. ಇದು ಇದುವರೆಗಿನ ದಾಖಲೆಯ ಬೆಲೆಯಾಗಿದೆ. ಏಳೆಂಟು ವರ್ಷಗಳ ಹಿಂದೆ ಕ್ವಿಂಟಾಲ್ ಕೊಬ್ಬರಿ ದರ 18 ಸಾವಿರ ರೂ. ಸಮೀಪಕ್ಕೆ ಬಂದಿತ್ತು. ನಂತರ ದರ ಹಠಾತ್ ಕುಸಿತ ಕಂಡು ಕ್ವಿಂಟಾಲ್ ಗೆ 8 ಸಾವಿರ ರೂ. ಆಸುಪಾಸಿನಲ್ಲಿತ್ತು, ಇದೀಗ 20 ಸಾವಿರ ರೂಪಾಯಿ ಗಡಿ ದಾಟಿರುವುದು ರೈತರಲ್ಲಿ ಸಂತಸ ಮೂಡಿಸಿದೆ.
