ಮಲೆಯಾಳಿ ನಟಿಗೆ ಮಾಲ್ ನಲ್ಲಿ ಲೈಂಗಿಕ ಕಿರುಕುಳ ನೀಡಿದ್ದವರು ಅಂದರ್

ಕೊಚ್ಚಿ: ಪ್ರಸಿದ್ಧ ಮಲೆಯಾಳಿ ನಟಿಗೆ ಮಾಲ್ ನಲ್ಲಿ ಇಬ್ಬರು ವ್ಯಕ್ತಿಗಳು ಲೈಂಗಿಕ ಕಿರುಕುಳ ನೀಡಿದ ಘಟನೆ ನಡೆದಿದ್ದು, ಘಟನೆಯ‌ ಸಿಸಿ ಟಿವಿ ಚಿತ್ರಗಳು ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.

ಕೊಚ್ಚಿಯ‌ ಲುಲು ಮಾಲ್‌ನಲ್ಲಿ ಈ ಘಟನೆ ನಡೆದಿದೆ. ನಟಿ ತಮ್ಮ ಸಹೋದರ, ಸಹೋದರಿ ಹಾಗೂ ತಾಯಿಯ ಜತೆ ಶಾಪಿಂಗ್ ಗೆ ತೆರಳಿದ್ದರು. ಆ ಸಂದರ್ಭದಲ್ಲಿ ಅವರಿಗೆ ಈ ಕೆಟ್ಟ ಅನುಭವವಾಗಿದೆ. ಅದನ್ನು ಅವರು ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ನಂತರ ಪೊಲೀಸರು ಸಿಸಿ ಟಿವಿ ಫುಟೇಜ್ ಆಧರಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಆರೋಪಿಗಳನ್ನು ಇರ್ಶಾದ್ ಹಾಗೂ ಆದಿಲ್ ಎಂದು ಗುರುತಿಸಲಾಗಿದೆ. “ನಾನು ಸಾಮಾನ್ಯವಾಗಿ ಜಾಲತಾಣಗಳಲ್ಲಿ ಹೆಚ್ಚು ವಿಷಯ‌ ಚರ್ಚಿಸುವುದಿಲ್ಲ. ಆದರೆ, ಈ ಘಟನೆ ಮತ್ಯಾರಿಗೂ ಆಗಬಾರದು. ಇದರಿಂದ ಹೊರ ಹಾಕುತ್ತಿದ್ದೇನೆ. ಮಾಲ್ ನ ಹಾಲ್ ನಲ್ಲಿ ನಾನು ಹೋಗುತ್ತಿದ್ದಂತೆ ಜನ‌ ಸೇರಿದರು. ನೂಕು ನುಗ್ಗಲಲ್ಲಿ ನನ್ನ‌ ಮೈ ಮೇಲೆ ಒಬ್ಬ ಕೈ ಹಾಕಿದ‌‌. ತಳ್ಳಾಟದಲ್ಲಿ ಅಕಸ್ಮಾತ್ ಆಗಿರಬಹುದು ಎಂದುಕೊಂಡೆ. ಆದರೆ, ಇನ್ನೊಬ್ಬ ನನ್ನ ಹಿಂಭಾಗವನ್ನು‌ ಮುಟ್ಟಿದ. ನನ್ನ ಸಹೋದರಿ ಅದನ್ನು ನೋಡಿದಳು” ಎಂದು ನಟಿ ಬರೆದುಕೊಂಡಿದ್ದಾರೆ.