ಬೆಂಗಳೂರು: ಬೆಂಗಳೂರು-ಹೊಸೂರು ಮಾರ್ಗದಲ್ಲಿ ಟ್ರಾಫಿಕ್ ಜಾಮ್ ಸಮಸ್ಯೆಗೆ ಮುಕ್ತಿ ಸಿಗಲಿದೆ. ಈ ನಿಟ್ಟಿನಲ್ಲಿ 48 ಕಿ.ಮೀ ಉದ್ದದ ಬೈಯಪ್ಪನಹಳ್ಳಿ-ಹೊಸೂರು ರೈಲು ಮಾರ್ಗ ದ್ವಿಗುಣಗೊಳಿಸುವ ಯೋಜನೆಯ ಭಾಗವಾಗಿ, ಚಂದಾಪುರ ಬಳಿಯ ರಾಷ್ಟ್ರೀಯ ಹೆದ್ದಾರಿ-44ರಲ್ಲಿರುವ ‘ಮೇಜರ್ ಬ್ರಿಡ್ಜ್ ಸಂಖ್ಯೆ 470’ (Major Bridge No. 470) ರಲ್ಲಿ, ಗರ್ಡರ್ ಗಳನ್ನು ಅಳವಡಿಸಲಾಗಿದೆ.
ತಲಾ ಸುಮಾರು 245 ಟನ್ ತೂಕದ 61 ಮೀಟರ್ ಉದ್ದದ ಎರಡು ಗರ್ಡರ್‌ಗಳನ್ನು ‘ರೈಲ್ ಇನ್ಫ್ರಾಸ್ಟ್ರಕ್ಚರ್ ಡೆವಲಪ್‌ಮೆಂಟ್ ಕಂಪನಿ (ಕರ್ನಾಟಕ) ಲಿಮಿಟೆಡ್’ (K-RIDE) ಅಳವಡಿಸಿದೆ.
ಮೊದಲ ಗರ್ಡರ್ ಅನ್ನು ಅಕ್ಟೋಬರ್ 10 ರಂದು ಮತ್ತು ಎರಡನೆಯದನ್ನು ಬುಧವಾರ ಅಳವಡಿಸಲಾಯಿತು. ಬೆಂಗಳೂರಿನಲ್ಲಿ ರೈಲು ಮಾರ್ಗ ದ್ವಿಗುಣಗೊಳಿಸುವ ಯೋಜನೆಗಾಗಿ ಅಳವಡಿಸಲಾದ ಗರ್ಡರ್‌ಗಳ ಪೈಕಿ ಇವೇ ಅತಿ ಉದ್ದದ ಗರ್ಡರ್‌ಗಳಾಗಿವೆ ಎಂದು K-RIDE ತಿಳಿಸಿದೆ.
ಈ ರಚನೆಯು ಹೆದ್ದಾರಿಯ ವ್ಯಾಪ್ತಿಯಲ್ಲಿ ಯಾವುದೇ ಮಧ್ಯಂತರ ಕಂಬವಿಲ್ಲದೆ, ಒಂದೇ ಆಧಾರ ರಚನೆಯ ಮೇಲೆ ಎರಡೂ ರೈಲು ಮಾರ್ಗಗಳನ್ನು ಒಳಗೊಳ್ಳಲಿದೆ.
ಅನುಮೋದಿತ ವಿನ್ಯಾಸ ಮತ್ತು ಸಂಬಂಧಿತ ಕಾಮಗಾರಿಗಳ ಪೂರ್ಣಗೊಳ್ಳುವಿಕೆಗೆ ಒಳಪಟ್ಟು, ಈ ರಚನೆಯು ರಸ್ತೆ ಸಂಚಾರವನ್ನು ಸುಗಮಗೊಳಿಸಲು ಮತ್ತು ಯೋಜಿತ 12-ಲೇನ್ ಹೆದ್ದಾರಿ ವಿನ್ಯಾಸಕ್ಕೆ ಪೂರಕವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.
K-RIDE ವ್ಯವಸ್ಥಾಪಕ ನಿರ್ದೇಶಕ ಲಕ್ಷ್ಮಣ್ ಸಿಂಗ್ ಮಾತನಾಡಿ, ಈ ‘ಗ್ರೇಡ್-ಸೆಪರೇಟೆಡ್ ಕ್ರಾಸಿಂಗ್’ (ರಸ್ತೆ ಮತ್ತು ರೈಲು ಮಾರ್ಗಗಳನ್ನು ಪ್ರತ್ಯೇಕಿಸುವ ವ್ಯವಸ್ಥೆ) ಮೂಲಕ ರಸ್ತೆ ಮತ್ತು ರೈಲು ಸಂಚಾರಗಳು ಪರಸ್ಪರ ಅಡಚಣೆಯಿಲ್ಲದೆ ಸ್ವತಂತ್ರವಾಗಿ ಸಾಗಲು ಸಾಧ್ಯವಾಗುತ್ತದೆ. ಇದರಿಂದ ರೈಲು ಕಾರ್ಯಾಚರಣೆಗಳಿಂದ ಹೆದ್ದಾರಿ ಸಂಚಾರಕ್ಕೆ ಉಂಟಾಗುವ ಅಡಚಣೆಗಳು ಕಡಿಮೆಯಾಗುತ್ತವೆ ಎಂದು ತಿಳಿಸಿದರು.
ಸಂಬಂಧಿತ ರೈಲ್ವೆ ಮತ್ತು ಇತರ ಕಾಮಗಾರಿಗಳನ್ನು 2027ರ ಜನವರಿಯೊಳಗೆ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆ. ಈ ಯೋಜನೆಯು ಪ್ರಯಾಣಿಕ ಮತ್ತು ಸರಕು ಸಾಗಣೆ ಸೇವೆಗಳಿಗಾಗಿ ರೈಲು ಸಾಮರ್ಥ್ಯವನ್ನು ಹೆಚ್ಚಿಸುವ ಹಾಗೂ ಬೆಂಗಳೂರು ಮತ್ತು ಹೊಸೂರು ನಡುವಿನ ಸಂಪರ್ಕವನ್ನು ಬಲಪಡಿಸುವ ನಿರೀಕ್ಷೆಯಿದೆ.
