ಡೇಟಿಂಗ್ ಆ್ಯಪ್‌ನಲ್ಲಿ ಸ್ನೇಹ ಬೆಳೆಸಿ ಮಹಿಳೆಯೆಂದು ನಂಬಿ ಮನೆಗೆ ಆಹ್ವಾನಿಸಿದ ಯುವಕ; ಬಂದವಳ ಅಸಲಿ ರೂಪ ಕಂಡು ಶಾಕ್!

ಬೆಂಗಳೂರು: ಆನ್‌ಲೈನ್ ಜಗತ್ತಿನಲ್ಲಿ ಬೆಳೆಸುವ ಪ್ರತಿಯೊಂದು ಸ್ನೇಹವೂ ನಂಬಿಕೆಗೆ ಅರ್ಹವಾಗಿರುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಕೆಲವೊಮ್ಮೆ ಕ್ಷಣಾರ್ಧದಲ್ಲಿ ಸಿಹಿ ಅನುಭವ ನೀಡುವ ಪರಿಚಯವೇ ಭಯಾನಕ ಘಟನೆಯಾಗಿ ಬದಲಾಗಬಹುದು. ಬೆಂಗಳೂರಿನ ಯುವಕನೊಬ್ಬನಿಗೂ ಇಂತಹದ್ದೇ ಅನುಭವವಾಗಿದೆ. ಡೇಟಿಂಗ್ ಆ್ಯಪ್‌ನಲ್ಲಿ ಪರಿಚಯವಾದ ವ್ಯಕ್ತಿಯನ್ನು ಮಹಿಳೆಯೆಂದು ನಂಬಿ ಸ್ನೇಹಿತನ ಖಾಲಿ ಮನೆಗೆ ಆಹ್ವಾನಿಸಿದ್ದಾನೆ. ಆದರೆ ಮನೆಗೆ ಬಂದ ವ್ಯಕ್ತಿ ಮಾಸ್ಕ್ ತೆಗೆದಾಗ ಯುವಕನಿಗೆ ಎದುರಾಗಿದ್ದು ಅನಿರೀಕ್ಷಿತ ಆಘಾತ! ಅಷ್ಟೇ ಅಲ್ಲ, ಕೆಲವೇ ನಿಮಿಷಗಳಲ್ಲಿ ಮತ್ತೊಂದು ವ್ಯಕ್ತಿಯ ಆಗಮನದೊಂದಿಗೆ ಇಡೀ ಘಟನೆ ದರೋಡೆಯ ರೂಪ ಪಡೆದುಕೊಂಡಿದೆ. ಅಂದು ಆ ಮನೆಯಲ್ಲಿ ನಡೆದಿದ್ದೇನು? ₹20 ಲಕ್ಷ ಮೌಲ್ಯದ ಚಿನ್ನಾಭರಣ ಹೇಗೆ ಕಳವಾಯಿತು? ಈ ಕುತೂಹಲಕಾರಿ ಘಟನೆಯ ಸಂಪೂರ್ಣ ವಿವರ ಇಲ್ಲಿದೆ.

ಬೆಂಗಳೂರಿನಲ್ಲಿ ಆನ್‌ಲೈನ್ ಡೇಟಿಂಗ್ ಆ್ಯಪ್ ಮೂಲಕ ಪರಿಚಯವಾದ ವ್ಯಕ್ತಿಯನ್ನು ಮನೆಗೆ ಆಹ್ವಾನಿಸಿದ ಯುವಕನೊಬ್ಬನಿಗೆ ಆಘಾತ ಎದುರಾಗಿದೆ. ಮಹಿಳೆಯೆಂದು ಭಾವಿಸಿ ಮನೆಗೆ ಆಹ್ವಾನಿಸಿದ್ದ ವ್ಯಕ್ತಿ ಟ್ರಾನ್ಸ್‌ಜೆಂಡರ್ ಆಗಿದ್ದು, ಬಳಿಕ ಮತ್ತೊಬ್ಬರೊಂದಿಗೆ ಸೇರಿ ಚಾಕು ತೋರಿಸಿ ಸುಮಾರು ₹20 ಲಕ್ಷ ಮೌಲ್ಯದ ಚಿನ್ನಾಭರಣ ದೋಚಿರುವ ಘಟನೆ ನಡೆದಿದೆ.ಅಕ್ಟೋಬರ್ 22ರಂದು ಬೆಂಗಳೂರಿನ ಚಂದ್ರಾ ಲೇಔಟ್‌ನ ಮನೆಯೊಂದರಲ್ಲಿ ಈ ಘಟನೆ ನಡೆದಿದೆ.

ಮನೆಯ ಮಾಲೀಕ ಹಾಗೂ ಅವರ ಪತ್ನಿ ಊರಿಗೆ ತೆರಳಿದ್ದ ಹಿನ್ನೆಲೆಯಲ್ಲಿ, ಮನೆಯ ಕೀಲಿಯನ್ನು ತಮ್ಮ ಸ್ನೇಹಿತನ ಬಳಿ ನೀಡಿದ್ದರು. ಸ್ನೇಹಿತ ಅದೇ ಮನೆಯಲ್ಲಿ ವಾಸವಾಗಿದ್ದನು. ಈ ನಡುವೆ ಆತ ಆನ್‌ಲೈನ್ ಡೇಟಿಂಗ್ ಆ್ಯಪ್ ಮೂಲಕ ಮಹಿಳೆಯೊಬ್ಬರಂತೆ ಪರಿಚಯ ಮಾಡಿಕೊಂಡಿದ್ದ ವ್ಯಕ್ತಿಯೊಂದಿಗೆ ಸ್ನೇಹ ಬೆಳೆಸಿದ್ದಾನೆ. ಬಳಿಕ ಆಕೆಯನ್ನು ಮನೆಗೆ ಆಹ್ವಾನಿಸಿದ್ದಾನೆ.

ಆದರೆ ಮನೆಗೆ ಬಂದ ವ್ಯಕ್ತಿ ಮುಖದಲ್ಲಿದ್ದ ಮಾಸ್ಕ್ ತೆಗೆದಾಗ ಆತ ಮಹಿಳೆಯಲ್ಲ, ಟ್ರಾನ್ಸ್‌ಜೆಂಡರ್ ಎಂಬುದು ಯುವಕನಿಗೆ ತಿಳಿದು ಆಘಾತಕ್ಕೊಳಗಾಗಿದ್ದಾನೆ.

ಇದಾದ ಸುಮಾರು 10 ನಿಮಿಷಗಳ ಬಳಿಕ ಮತ್ತೊಬ್ಬ ಟ್ರಾನ್ಸ್‌ಜೆಂಡರ್ ವ್ಯಕ್ತಿ ಕೂಡ ಮನೆಗೆ ಬಂದಿದ್ದಾನೆ. ಇಬ್ಬರೂ ಸೇರಿ ಯುವಕನಿಗೆ ಚಾಕು ತೋರಿಸಿ ಬೆದರಿಕೆ ಹಾಕಿದ್ದಾರೆ. ಬಳಿಕ ಮನೆಯ ಬೆಡ್‌ರೂಂ ಬಾಗಿಲನ್ನು ಒಡೆದು, ಬೀರುವಿನಲ್ಲಿಟ್ಟಿದ್ದ ಚಿನ್ನಾಭರಣಗಳನ್ನು ದೋಚಿದ್ದಾರೆ ಎನ್ನಲಾಗಿದೆ.

226 ಗ್ರಾಂ ಚಿನ್ನಾಭರಣ ದೋಚಿ ಪರಾರಿ

ಆರೋಪಿಗಳು ಸುಮಾರು 226 ಗ್ರಾಂ ತೂಕದ ಚಿನ್ನಾಭರಣಗಳನ್ನು ಕದ್ದೊಯ್ದಿದ್ದಾರೆ. ಇವುಗಳ ಮೌಲ್ಯ ಅಂದಾಜು ₹20 ಲಕ್ಷ ಎಂದು ತಿಳಿದುಬಂದಿದೆ. ಘಟನೆ ಕುರಿತು ಮಾಹಿತಿ ತಿಳಿದ ಮನೆಯ ಮಾಲೀಕರು ಊರಿನಿಂದ ವಾಪಸ್ ಬಂದು ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದ್ದಾರೆ.

ದೂರಿನ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ನಾಜಿಯಾ ಮತ್ತು ಸೈಯದ್ ಮೊಹ್ಸಿನ್ ಎಂಬ ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ.

ಯುವಕರಿಗೆ ಎಚ್ಚರಿಕೆ ಸಂದೇಶ

• ಆನ್‌ಲೈನ್ ಡೇಟಿಂಗ್ ಆ್ಯಪ್‌ಗಳಲ್ಲಿ ಪರಿಚಯವಾಗುವ ಅಪರಿಚಿತರನ್ನು ನಂಬಬೇಡಿ. ಸ್ನೇಹ ಬೆಳೆಸುವ ಮುನ್ನ ಅವರ ಹಿನ್ನೆಲೆ ತಿಳಿದುಕೊಳ್ಳಿ.

• ಅಪರಿಚಿತರನ್ನು ಏಕಾಂತ ಸ್ಥಳಗಳಿಗೆ ಅಥವಾ ಮನೆಗೆ ಆಹ್ವಾನಿಸುವ ಮುನ್ನ ಎಚ್ಚರಿಕೆ ವಹಿಸಿ.

• ವೈಯಕ್ತಿಕ ಮಾಹಿತಿ, ಮನೆಯ ವಿಳಾಸ, ಹಣಕಾಸಿನ ವಿವರಗಳನ್ನು ಅಪರಿಚಿತರೊಂದಿಗೆ ಹಂಚಿಕೊಳ್ಳಬೇಡಿ.

• ಮೊದಲ ಭೇಟಿಯನ್ನು ಸಾರ್ವಜನಿಕ ಸ್ಥಳದಲ್ಲಿ, ಸ್ನೇಹಿತರು ಅಥವಾ ಕುಟುಂಬದವರಿಗೆ ಮಾಹಿತಿ ನೀಡಿ ಆಯೋಜಿಸಿ.

• ಅನುಮಾನಾಸ್ಪದ ವರ್ತನೆ ಕಂಡುಬಂದರೆ ತಕ್ಷಣ ಎಚ್ಚೆತ್ತುಕೊಳ್ಳಿ. ಬೆದರಿಕೆ ಅಥವಾ ವಂಚನೆ ಎದುರಾದರೆ ಪೊಲೀಸರನ್ನು ಸಂಪರ್ಕಿಸಿ.