ಇಂಡಿಯನ್ ಪ್ರೀಮಿಯರ್ ಲೀಗ್ ಅಖಾಡದಲ್ಲಿ ಐದು ಬಾರಿ ಚಾಂಪಿಯನ್ ಪಟ್ಟಕ್ಕೇರಿಸಿದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ, ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿಯಲ್ಲಿ ಭಾರಿ ಪ್ರಮಾಣದ ಷೇರು ಪಾಲನ್ನು ಕೇಳಿದ್ದರು ಎಂಬ ಸುದ್ದಿ ಕ್ರೀಡಾಲೋಕದಲ್ಲಿ ತೀವ್ರ ಕುತೂಹಲ ಮೂಡಿಸಿತ್ತು. ಆರಂಭದಲ್ಲಿ ಧೋನಿ ಶೇಕಡ 25 ರಷ್ಟು ಪಾಲು ಕೇಳಿ, ನಂತರ ಅದನ್ನು ಶೇಕಡ 20 ಕ್ಕೆ ಇಳಿಸಿಕೊಂಡಿದ್ದರು ಹಾಗೂ ಫ್ರಾಂಚೈಸಿ ಆಡಳಿತ ಮಂಡಳಿ ಅವರಿಗೆ ಶೇಕಡ 5.5 ರಷ್ಟು ಪಾಲು ನೀಡಲು ಮುಂದಾಗಿತ್ತು ಎನ್ನುವ ವರದಿಗಳು ಹರಿದಾಡಿದ್ದವು.
ಈ ಕುರಿತು ಕೊನೆಗೂ ಮೌನ ಮುರಿದಿರುವ ಸಿಎಸ್ ಕೆ ಹಿರಿಯ ಅಧಿಕಾರಿಯೊಬ್ಬರು, ಈ ಸುದ್ದಿಯಲ್ಲಿ ಯಾವುದೇ ಸತ್ಯಾಂಶವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಧೋನಿ ಎಂದಿಗೂ ನಮ್ಮ ಬಳಿ ಇಂತಹ ಬೇಡಿಕೆಯನ್ನು ಇಟ್ಟಿಲ್ಲ ಹಾಗೂ ಈ ವಿಷಯದ ಬಗ್ಗೆ ಯಾವುದೇ ಹಂತದಲ್ಲೂ ಚರ್ಚೆಗಳು ನಡೆದಿಲ್ಲ. ಪ್ರಮುಖ ಮಾಲೀಕರಾದ ಎನ್ ಶ್ರೀನಿವಾಸನ್ ಅವರೊಂದಿಗೂ ಧೋನಿ ಈ ಬಗ್ಗೆ ಮಾತನಾಡಿದ ಯಾವುದೇ ಮಾಹಿತಿ ಲಭ್ಯವಿಲ್ಲ ಎಂದು ಅವರು ಪ್ರಮುಖ ಮಾಧ್ಯಮ ಸಂಸ್ಥೆಗೆ ಖಚಿತಪಡಿಸಿದ್ದಾರೆ.
ಆದಾಗ್ಯೂ, ಧೋನಿ ಸಿಎಸ್ ಕೆ ಸಂಸ್ಥೆಯಲ್ಲಿ ಕೆಲವು ಷೇರುಗಳನ್ನು ಹೊಂದಿದ್ದಾರೆ ಎಂಬುದು ಸತ್ಯ. ಚೆನ್ನೈ ಸೂಪರ್ ಕಿಂಗ್ಸ್ ಮುಕ್ತ ಮಾರುಕಟ್ಟೆಯಲ್ಲಿ ನೋಂದಾಯಿತಗೊಳ್ಳದ ಕಂಪನಿಯಾಗಿರುವುದರಿಂದ (Unlisted Company), ಆಫ್ ಮಾರ್ಕೆಟ್ ವಹಿವಾಟುಗಳ ಮೂಲಕ ಖಾಸಗಿಯಾಗಿ ಇದರ ಷೇರುಗಳನ್ನು ಪಡೆದುಕೊಳ್ಳಲು ಅವಕಾಶವಿದೆ. ಧೋನಿ ಅವರ ಬಳಿ ಪ್ರಸ್ತುತ ಒಂದು ಲಕ್ಷಕ್ಕೂ ಹೆಚ್ಚು ಷೇರುಗಳಿವೆ. ಸಂಸ್ಥೆಯ ಒಟ್ಟು 30 ಕೋಟಿಗೂ ಅಧಿಕ ಸಾರ್ವಜನಿಕ ಷೇರುಗಳ ಪೈಕಿ ಇದು ಅತ್ಯಂತ ಸಣ್ಣ ಪ್ರಮಾಣದ್ದಾಗಿದೆ. ಕಂಪನಿಯ ಶೇಕಡ 55 ಕ್ಕೂ ಹೆಚ್ಚು ಪ್ರಮುಖ ಪಾಲನ್ನು ಎನ್ ಶ್ರೀನಿವಾಸನ್ ಅವರ ಕುಟುಂಬವೇ ನಿರ್ವಹಿಸುತ್ತಿದೆ.
ಐಪಿಎಲ್ ತಂಡಗಳ ಇತ್ತೀಚಿನ ಮೌಲ್ಯಮಾಪನವನ್ನು ಗಮನಿಸಿದರೆ, ಧೋನಿ ಹೊಂದಿರುವ ಷೇರುಗಳ ಮೌಲ್ಯ ಸುಮಾರು 2.6 ರಿಂದ 3 ಕೋಟಿ ರೂಪಾಯಿಗಳಾಗಬಹುದು ಎಂದು ಅಂದಾಜಿಸಲಾಗಿದೆ. ಸುಮಾರು 1,200 ಕೋಟಿ ರೂಪಾಯಿ ಆಸ್ತಿ ಹೊಂದಿರುವ ಧೋನಿ ಅವರಿಗೆ ಇದು ಕೇವಲ ಸಾಂಕೇತಿಕ ಹೂಡಿಕೆಯಾಗಿದೆ.
ಮತ್ತೊಂದೆಡೆ, ಭಾರತ ತಂಡದ ಮಾಜಿ ಆಟಗಾರ ಹಾಗೂ ಕ್ರಿಕೆಟ್ ವಿಶ್ಲೇಷಕ ಆಕಾಶ್ ಚೋಪ್ರಾ ಈ ವರದಿಯನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ. ಯಾರೋ ಉದ್ದೇಶಪೂರ್ವಕವಾಗಿ ಸೃಷ್ಟಿಸಿದ ಸುಳ್ಳು ಸುದ್ದಿ ಇದಾಗಿರಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇತ್ತೀಚೆಗೆ ಆರ್ ಸಿಬಿ ನಂತಹ ತಂಡಗಳ ಮೌಲ್ಯವೇ ಬಿಲಿಯನ್ ಡಾಲರ್ ಗಡಿ ದಾಟಿದೆ. ಜಾಗತಿಕವಾಗಿ ಮಾರುಕಟ್ಟೆ ಹೊಂದಿರುವ ಸಿಎಸ್ ಕೆ ನಂತಹ ಪ್ರಭಾವಿ ಬ್ರಾಂಡ್ ನಲ್ಲಿ ಶೇಕಡ 25 ರಷ್ಟು ಪಾಲು ಅಂದರೆ ನೂರಾರು ಮಿಲಿಯನ್ ಡಾಲರ್ ಹಣವಾಗುತ್ತದೆ. ಇಷ್ಟು ದೊಡ್ಡ ಮೊತ್ತದ ಪಾಲನ್ನು ಯಾರೂ ಸುಲಭವಾಗಿ ನೀಡಲು ಸಾಧ್ಯವಿಲ್ಲ, ಹಾಗಾಗಿ ಧೋನಿ ಇಂತಹ ಬೇಡಿಕೆ ಇಟ್ಟಿದ್ದಾರೆ ಎಂಬುದು ನಂಬಲು ಸಾಧ್ಯವಿಲ್ಲದ ಸಂಗತಿ ಎಂದು ಚೋಪ್ರಾ ವಿಶ್ಲೇಷಿಸಿದ್ದಾರೆ.
