ದೇಶದಲ್ಲಿ ಧೂಮಪಾನಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ. ಸಂಸತ್ತಿನಲ್ಲಿ ಅಂಗೀಕಾರವಾಗಿರುವ ‘ಕೇಂದ್ರ ಅಬಕಾರಿ (ತಿದ್ದುಪಡಿ) ವಿಧೇಯಕ 2025’ರ ಪ್ರಕಾರ, ತಂಬಾಕು ಉತ್ಪನ್ನಗಳ ಮೇಲಿನ ಅಬಕಾರಿ ಸುಂಕವನ್ನು ಗಣನೀಯವಾಗಿ ಹೆಚ್ಚಿಸಲು ಉದ್ದೇಶಿಸಲಾಗಿದೆ. ಈ ನಿಯಮ ಜಾರಿಗೆ ಬಂದರೆ, ಸದ್ಯ 18 ರೂಪಾಯಿಗೆ ಸಿಗುವ ಒಂದು ಸಿಗರೇಟ್ ಬೆಲೆ ಬರೋಬ್ಬರಿ 72 ರೂಪಾಯಿಗೆ ಏರಿಕೆಯಾಗುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಯಾವ ಉತ್ಪನ್ನಗಳ ಬೆಲೆ ಎಷ್ಟು ಏರಿಕೆ?
ಹೊಸ ತಿದ್ದುಪಡಿ ವಿಧೇಯಕದ ಅನ್ವಯ, ಸಿಗರೇಟ್ ಮಾತ್ರವಲ್ಲದೆ ವಿವಿಧ ತಂಬಾಕು ಉತ್ಪನ್ನಗಳ ಮೇಲಿನ ಸುಂಕವನ್ನು ಪರಿಷ್ಕರಿಸಲಾಗಿದೆ. ಪ್ರಸ್ತುತ 1,000 ಸಿಗರೇಟ್ ಕಡ್ಡಿಗಳ ಮೇಲೆ ಇರುವ 200 ರಿಂದ 735 ರೂಪಾಯಿ ಸುಂಕವನ್ನು 2,700 ರಿಂದ 11,000 ರೂಪಾಯಿಗಳವರೆಗೆ ಏರಿಸಲು ಪ್ರಸ್ತಾಪಿಸಲಾಗಿದೆ. ಇನ್ನುಳಿದಂತೆ:
- ಮೆಲ್ಲುವ ತಂಬಾಕು (ಚೂಯಿಂಗ್ ಟೊಬ್ಯಾಕೋ): ಸುಂಕವು ಶೇ. 25 ರಿಂದ ಶೇ. 100 ಕ್ಕೆ ಏರಿಕೆ.
- ಹುಕ್ಕಾ ತಂಬಾಕು: ಸುಂಕವು ಶೇ. 25 ರಿಂದ ಶೇ. 40 ಕ್ಕೆ ಏರಿಕೆ.
- ಪೈಪ್ ಮತ್ತು ಸಿಗರೇಟ್ ಸ್ಮೋಕಿಂಗ್ ಮಿಶ್ರಣ: ಸುಂಕವು ಶೇ. 60 ರಿಂದ ಶೇ. 325 ಕ್ಕೆ ಏರಿಕೆ.
ಸಾಮಾಜಿಕ ಜಾಲತಾಣದಲ್ಲಿ ಮಿಶ್ರ ಪ್ರತಿಕ್ರಿಯೆ
ಬೆಲೆ ಏರಿಕೆಯ ಈ ಸುದ್ದಿ ಹೊರಬೀಳುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧ ಚರ್ಚೆಗಳು ಆರಂಭವಾಗಿವೆ. ಸ್ವತಃ ಧೂಮಪಾನಿಗಳೇ ಈ ನಿರ್ಧಾರವನ್ನು ಸ್ವಾಗತಿಸಿದ್ದು, “ಬೆಲೆ ಏರಿಕೆಯ ಕಾರಣದಿಂದಾದರೂ ನಾವು ಧೂಮಪಾನ ಬಿಡಲು ಸಾಧ್ಯವಾಗಬಹುದು” ಎಂದು ಅಭಿಪ್ರಾಯಪಟ್ಟಿದ್ದಾರೆ. ವಿಶೇಷವಾಗಿ ವಿದ್ಯಾರ್ಥಿಗಳು ಮತ್ತು ಯುವಜನತೆಯನ್ನು ಈ ಚಟದಿಂದ ದೂರವಿಡಲು ಇದು ಸಹಕಾರಿ ಎಂಬ ಮಾತುಗಳು ಕೇಳಿಬರುತ್ತಿವೆ.
ಆದರೆ, ಕೆಲವರು ಹಾಸ್ಯದ ರೂಪದಲ್ಲಿ ಪ್ರತಿಕ್ರಿಯಿಸಿದ್ದು, “ದೆಹಲಿಯಂತ ನಗರಗಳಲ್ಲಿ ವಾಸಿಸುವ ನಮಗೆ ಸಿಗರೇಟ್ ಬೇಕಿಲ್ಲ, ಅಲ್ಲಿನ ಗಾಳಿಯೇ ನಮಗೆ ಧೂಮಪಾನದ ಅನುಭವ ನೀಡುತ್ತದೆ” ಎಂದು ವ್ಯಂಗ್ಯವಾಡಿದ್ದಾರೆ. ಇನ್ನು ಕೆಲವರು ಈ ನಿರ್ಧಾರದಿಂದ ಜನರು ‘ವೇಪ್’ (Vape) ಬಳಕೆಯತ್ತ ಅಥವಾ ಅಕ್ರಮವಾಗಿ ಮಾರಾಟವಾಗುವ ನಕಲಿ ಸಿಗರೇಟ್ಗಳತ್ತ ಆಕರ್ಷಿತರಾಗಬಹುದು ಎಂಬ ಆತಂಕ ವ್ಯಕ್ತಪಡಿಸಿದ್ದಾರೆ.
ಒಟ್ಟಾರೆಯಾಗಿ, ಸರ್ಕಾರದ ಈ ಕಠಿಣ ಕ್ರಮವು ತಂಬಾಕು ಮುಕ್ತ ಸಮಾಜದ ನಿರ್ಮಾಣಕ್ಕೆ ಎಷ್ಟು ಸಹಕಾರಿಯಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
