ಬೆಂಗಳೂರು: ಸಿಲಿಕಾನ್ ಸಿಟಿ ಮಂದಿಗೆ ಈಗ ಹೋಟೆಲ್ ಊಟ ಅಷ್ಟೊಂದು ಸುಲಭವಿಲ್ಲ ಕಳೆದ ಒಂದು ತಿಂಗಳಿನಿಂದ ವಾಣಿಜ್ಯ ಬಳಕೆಯ ಗ್ಯಾಸ್ ಸಿಲಿಂಡರ್ ದರ ಗಗನಕ್ಕೇರುತ್ತಿರುವುದರಿಂದ ನಗರದ ಪ್ರಮುಖ ಹೋಟೆಲ್ಗಳು ಹಾಗೂ ದರ್ಶಿನಿಗಳಲ್ಲಿ ತಿಂಡಿ-ತಿನಿಸುಗಳ ದರವನ್ನು ಸದ್ದಿಲ್ಲದೆಯೇ ಹೆಚ್ಚಿಸಲಾಗಿದೆ.
ಗ್ಯಾಸ್ ಬೆಲೆಯಲ್ಲಿ ₹497 ಏರಿಕೆ
ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಪರಿಣಾಮವಾಗಿ ಅಡುಗೆ ಅನಿಲದ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿದೆ. ಕೇವಲ ಒಂದು ತಿಂಗಳ ಅವಧಿಯಲ್ಲಿ 19 ಕೆ.ಜಿ ವಾಣಿಜ್ಯ ಸಿಲಿಂಡರ್ ದರ ಭರ್ತಿ 497 ರೂಪಾಯಿ ಏರಿಕೆಯಾಗಿದೆ. ಮಾರ್ಚ್ 1ರಂದು ₹1,844 ಇದ್ದ ಸಿಲಿಂಡರ್ ಬೆಲೆ ಈಗ ₹2,161ಕ್ಕೆ ತಲುಪಿದೆ. ಈ ಹೊರೆ ತಡೆಯಲಾರದ ಹೋಟೆಲ್ ಮಾಲೀಕರು ಅನಿವಾರ್ಯವಾಗಿ ದರ ಏರಿಕೆಯ ಹಾದಿ ಹಿಡಿದಿದ್ದಾರೆ.
ನಿಮ್ಮ ನೆಚ್ಚಿನ ತಿಂಡಿಗಳ ಹೊಸ ದರ ಪಟ್ಟಿ ಇಲ್ಲಿದೆ:
ನಗರದ ವಿವಿಧ ಭಾಗಗಳಲ್ಲಿ ದರ ಏರಿಕೆ ಹೀಗಿದೆ:
ದೋಸೆ ಮತ್ತು ಇಡ್ಲಿ: ಮಸಾಲ ದೋಸೆ ದರ ₹80 ರಿಂದ ₹90ಕ್ಕೆ ಏರಿಕೆಯಾಗಿದೆ. ರವಾ ಇಡ್ಲಿಗೆ ₹5 ಹಾಗೂ ಮಂಗಳೂರು ಬನ್ಸ್ಗೆ ₹5 ಹೆಚ್ಚುವರಿ ನೀಡಬೇಕು.
ಪೂರಿ ಮತ್ತು ಪುಳಿಯೋಗರೆ: ಮಲ್ಲೇಶ್ವರದ ಕೆಲವು ಪ್ರತಿಷ್ಠಿತ ಹೋಟೆಲ್ಗಳಲ್ಲಿ ಎರಡು ಪೂರಿಯ ಬೆಲೆ ₹80 ರಿಂದ ₹100ಕ್ಕೆ ತಲುಪಿದೆ! ಪುಳಿಯೋಗರೆ ದರ ₹80 ಆಗಿದೆ.
ಕಾಫಿ-ಟೀ: ₹15 ಇದ್ದ ಕಾಫಿ ಬೆಲೆ ಈಗ ₹18 ರಿಂದ ₹22ಕ್ಕೆ ಏರಿಕೆಯಾಗಿದೆ. ಕೆಲವು ಹೋಟೆಲ್ಗಳಲ್ಲಿ ದರ ಹೆಚ್ಚಿಸುವ ಬದಲು ಕಾಫಿ ನೀಡುವ ಪ್ರಮಾಣವನ್ನು (Quantity) ತಗ್ಗಿಸಲಾಗಿದೆ.
ಊಟ: ಸಾಮಾನ್ಯ ಊಟದ ದರದಲ್ಲಿ ₹10 ರಿಂದ ₹20ರಷ್ಟು ಹೆಚ್ಚಳವಾಗಿದ್ದು, ಕನಿಷ್ಠ ₹90 ರಿಂದ ₹150ರವರೆಗೆ ತಲುಪಿದೆ.
ಮಾಂಸಾಹಾರಿಗಳಿಗೂ ತಪ್ಪದ ಬೆಲೆ ಏರಿಕೆ ಬಿಸಿ
ಕೇವಲ ಸಸ್ಯಹಾರಿ ಹೋಟೆಲ್ ಮಾತ್ರವಲ್ಲ ಮಾಂಸಾಹಾರಿ ಹೋಟೆಲ್ಗಳಲ್ಲೂ ದರ ಏರಿಕೆಯಾಗಿದೆ. ಸಣ್ಣ ಹೋಟೆಲ್ಗಳಲ್ಲಿ ಕಬಾಬ್ ಬೆಲೆ ₹100 ರಿಂದ ₹120ಕ್ಕೆ ಏರಿಕೆಯಾದರೆ ಬೀದಿಬದಿಯ ಬಿರಿಯಾನಿ ದರ ₹120 ರಿಂದ ₹140ಕ್ಕೆ ಜಿಗಿದಿದೆ.
ಪಾರ್ಸೆಲ್ ಬೇಕೆಂದರೆ ₹10
ಊಟ-ತಿಂಡಿ ಮಾತ್ರವಲ್ಲ ಪಾರ್ಸೆಲ್ ಪಡೆಯುವುದು ಈಗ ದುಬಾರಿಯಾಗಿದೆ. ಪ್ಲಾಸ್ಟಿಕ್ ಕಂಟೈನರ್ಗಳ ಕಚ್ಚಾ ಸಾಮಗ್ರಿ ಕೊರತೆಯಿಂದಾಗಿ ಪಾರ್ಸೆಲ್ ದರವನ್ನು ಪ್ರತಿ ಐಟಂಗೆ ₹5 ರಿಂದ ₹10ಕ್ಕೆ ಏರಿಸಲಾಗಿದೆ.
