ಉದ್ಯಾನನಗರಿ ಬೆಂಗಳೂರಿನಲ್ಲಿ ಈ ಬಾರಿ ಬಿಸಿಲು ಹಿಂದೆಂದೂ ಕಾಣದ ರೀತಿಯಲ್ಲಿ ಏರಿಕೆಯಾಗಿದೆ. ಸಾಧಾರಣವಾಗಿ ತಂಪಾದ ಹವಾಮಾನಕ್ಕೆ ಹೆಸರಾಗಿದ್ದ ನಗರದಲ್ಲಿ ಈಗ ಎಸಿ ಅಥವಾ ಕೂಲರ್ ಇಲ್ಲದೆ ಇರಲು ಸಾಧ್ಯವಿಲ್ಲದ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಕಡುಬಿಸಿಲಿನಿಂದ ರಕ್ಷಣೆ ಪಡೆಯಲು ಬೆಂಗಳೂರಿನ ಪ್ರಿಯಾ ಪಾಲ್ ಎಂಬ ಯುವತಿ ಮಾಡಿದ ಕೆಲಸ ಈಗ ಇಂಟರ್ನೆಟ್ನಲ್ಲಿ ಭಾರಿ ವೈರಲ್ ಆಗುತ್ತಿದೆ.
ಮನೆಯಲ್ಲೇ ಇರಲಾಗದೆ ಹೋಟೆಲ್ ಮೊರೆ ಪ್ರಿಯಾ ಪಾಲ್ ಅವರು ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿದ್ದು, “ನಾವು ಕೇವಲ ಎಸಿ ಗಾಳಿಗಾಗಿ ನಮ್ಮ ಮನೆಯ ಪಕ್ಕದ ಹೋಟೆಲ್ ಬುಕ್ ಮಾಡಿದ್ದೇವೆ” ಎಂದು ಬರೆದುಕೊಂಡಿದ್ದಾರೆ. ಮನೆಯಲ್ಲಿ ಎಸಿ ಇಲ್ಲದೆ ಸೆಖೆ ತಡೆಯಲು ಸಾಧ್ಯವಾಗದ ಕಾರಣ, ಅವರು ಈ ನಿರ್ಧಾರಕ್ಕೆ ಬಂದಿದ್ದಾರೆ. ವಿಡಿಯೋದಲ್ಲಿ ಅವರು ಹೋಟೆಲ್ ರೂಮ್ನಲ್ಲಿ ಆರಾಮವಾಗಿ ಎಸಿ ಗಾಳಿ ಸೇವಿಸುತ್ತಾ ರಿಲ್ಯಾಕ್ಸ್ ಆಗುತ್ತಿರುವುದನ್ನು ಕಾಣಬಹುದು.
ಎಸಿ, ಕೂಲರ್ ಗೆ ಭಾರಿ ಡಿಮ್ಯಾಂಡ್ ತಮ್ಮ ಈ ವಿಚಿತ್ರ ನಿರ್ಧಾರಕ್ಕೆ ಕಾರಣವನ್ನೂ ಪ್ರಿಯಾ ವಿವರಿಸಿದ್ದಾರೆ. “ಶೀಘ್ರದಲ್ಲೇ ಮಳೆಯಾಗಬಹುದು ಎಂದು ನಾವು ಕಾಯುತ್ತಿದ್ದೆವು, ಆದರೆ ಮಳೆ ಬರಲಿಲ್ಲ. ಮನೆಯಲ್ಲಿ ಕೂಲರ್ ಅಥವಾ ಎಸಿ ಅಳವಡಿಸೋಣ ಎಂದರೆ ಎಲ್ಲಿಯೂ ಸ್ಟಾಕ್ ಇಲ್ಲ. ಆನ್ಲೈನ್ನಲ್ಲಿ ಬುಕ್ ಮಾಡಿದರೂ ಡೆಲಿವರಿ ನೀಡಲು 7 ದಿನಗಳ ಸಮಯ ಕೇಳುತ್ತಿದ್ದಾರೆ. ರೆಂಟ್ಗೆ ಕೂಲರ್ ಪಡೆಯೋಣವೆಂದರೆ ಅದಕ್ಕೂ ಭಾರಿ ಬೇಡಿಕೆ ಇದೆ. ಹೀಗಾಗಿ ಒಂದು ದಿನ ಹೋಟೆಲ್ನಲ್ಲಿ ನೆಟ್ಫ್ಲಿಕ್ಸ್ ನೋಡುತ್ತಾ ಕಾಲ ಕಳೆಯಲು ನಿರ್ಧರಿಸಿದೆವು. ಇದು ಒಳ್ಳೆಯ ನಿರ್ಧಾರ ಎಂದು ನನಗನ್ನಿಸುತ್ತದೆ” ಎಂದು ಅವರು ಹೇಳಿದ್ದಾರೆ.
ನೆಟ್ಟಿಗರ ಪ್ರತಿಕ್ರಿಯೆ ಪ್ರಿಯಾ ಅವರ ಈ ಐಡಿಯಾಕ್ಕೆ ನೆಟ್ಟಿಗರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. “ಈ ಸಮಯಕ್ಕೆ ಇದು ನಿಜಕ್ಕೂ ಬುದ್ಧಿವಂತಿಕೆಯ ಕೆಲಸ” ಎಂದು ಕೆಲವರು ಮೆಚ್ಚುಗೆ ವ್ಯಕ್ತಪಡಿಸಿದರೆ, ಇನ್ನು ಕೆಲವರು “ಬೆಂಗಳೂರಿನ ಹವಾಮಾನ ಈ ವರ್ಷ ಎಲ್ಲರಿಗೂ ಶಾಕ್ ನೀಡಿದೆ” ಎಂದು ಕಾಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಬೆಂಗಳೂರಿನ ಬಿಸಿಲಿನ ತಾಪ ಎಷ್ಟಿದೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿಯಾಗಿದೆ.
