ವಿಳಾಸವಿಲ್ಲದಿದ್ದರೂ ಹಳೇ ಸ್ನೇಹಿತನನ್ನು ಹುಡುಕಿಕೊಂಡು ಹೋದ ಇಸ್ಮಾಯಿಲ್: ಮೂರೂವರೆ ದಶಕಗಳ ಹಿಂದಿನ ಸಾಲ ತೀರಿಸಿದ ಅಪರೂಪದ ಕಥೆ

ನಾವು ಯಾರಿಗಾದರೂ ಹಣ ಸಾಲ ಕೊಟ್ಟರೆ ಅಥವಾ ಸಾಲ ತೀರಿಸಬೇಕಿದ್ದರೆ ಕೆಲವೇ ದಿನಗಳಲ್ಲಿ ಮರೆತುಬಿಡುವ ಈ ಕಾಲದಲ್ಲಿ, ಕೇರಳದ ವ್ಯಕ್ತಿಯೊಬ್ಬರು ಬರೋಬ್ಬರಿ ಮೂರೂವರೆ ದಶಕಗಳ ಹಿಂದೆ ತಾವು ಪಡೆದಿದ್ದ ಸಣ್ಣ ಮೊತ್ತದ ಸಾಲವನ್ನು ನೆನಪಿನಲ್ಲಿಟ್ಟುಕೊಂಡು, ಆ ಗೆಳೆಯನನ್ನು ಹುಡುಕಿ ಹೋಗಿ ಹಣವನ್ನು ಬಡ್ಡಿ ಸಮೇತ ಹಿಂತಿರುಗಿಸಿ ಮಾನವೀಯತೆ ಮೆರೆದಿದ್ದಾರೆ. ಕೇವಲ ಒಂದು ಹಳೆಯ ನೆನಪನ್ನು ಮಾತ್ರ ನೆಚ್ಚಿಕೊಂಡು, ಯಾವುದೇ ಫೋನ್ ನಂಬರ್ ಅಥವಾ ವಿಳಾಸ ಇಲ್ಲದಿದ್ದರೂ ತಮಿಳುನಾಡು ಮತ್ತು ತೆಲಂಗಾಣದ ಗಡಿಗಳನ್ನೆಲ್ಲ ದಾಟಿ ಬಂದು ತಮ್ಮ ಭರವಸೆಯನ್ನು ಈಡೇರಿಸಿದ್ದಾರೆ.

ಸೌದಿ ಅರೇಬಿಯಾದಲ್ಲಿ ಚಿಗುರಿದ ಸ್ನೇಹ

ಕೇರಳ ಮೂಲದ ಇಸ್ಮಾಯಿಲ್ ಮತ್ತು ತೆಲಂಗಾಣದ ಜಗತಿಯಾಲ ಜಿಲ್ಲೆಯ ಧರ್ಮಪುರಿ ನಿವಾಸಿ ಎಡ್ಲಾ ಲಚ್ಚಣ್ಣ 1991ರಲ್ಲಿ ಸೌದಿ ಅರೇಬಿಯಾದ ಅಬ್ಕೈಕ್‌ನಲ್ಲಿ ಕೆಲಸ ಮಾಡುತ್ತಿದ್ದಾಗ ಸ್ನೇಹಿತರಾಗಿದ್ದರು. ಇತರ ಮೂವರು ಕಾರ್ಮಿಕರೊಂದಿಗೆ ಒಂದೇ ಕೋಣೆಯಲ್ಲಿದ್ದ ಇವರು ಸುಮಾರು ಐದು ವರ್ಷಗಳ ಕಾಲ ಒಟ್ಟಿಗೆ ವಾಸಿಸುತ್ತಿದ್ದರು. ಆ ಸಮಯದಲ್ಲಿ ಇಸ್ಮಾಯಿಲ್ ಅವರು ಲಚ್ಚಣ್ಣ ಅವರಿಂದ 120 ಸೌದಿ ರಿಯಾಲ್ ಸಾಲ ಪಡೆದಿದ್ದರು. ಅಂದಿನ ಭಾರತೀಯ ಕರೆನ್ಸಿ ಮೌಲ್ಯದಲ್ಲಿ ಅದು ಕೇವಲ 1,000 ರೂಪಾಯಿ ಆಗಿತ್ತು. ಪರಿಸ್ಥಿತಿ ಸರಿಯಾದಾಗ ಹಣವನ್ನು ಹಿಂತಿರುಗಿಸುವುದಾಗಿ ಇಸ್ಮಾಯಿಲ್ ಮಾತು ಕೊಟ್ಟಿದ್ದರು.

ಆದರೆ ಕೆಲವೇ ದಿನಗಳಲ್ಲಿ ಲಚ್ಚಣ್ಣ ಭಾರತಕ್ಕೆ ಮರಳಿದರು. ಆ ಕಾಲದಲ್ಲಿ ಮೊಬೈಲ್ ಫೋನ್‌ಗಳಾಗಲಿ ಅಥವಾ ಸಾಮಾಜಿಕ ಜಾಲತಾಣಗಳಾಗಲಿ ಇಲ್ಲದ ಕಾರಣ ಇಬ್ಬರ ನಡುವಿನ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿತು.

ವಿಳಾಸವಿಲ್ಲದಿದ್ದರೂ ಹುಡುಕಾಟ

ಹಣ ಸಣ್ಣದಾಗಿದ್ದರೂ ಇಸ್ಮಾಯಿಲ್ ತಮಗೆ ಲಚ್ಚಣ್ಣ ಮಾಡಿದ ಸಹಾಯವನ್ನು ಎಂದಿಗೂ ಮರೆಯಲಿಲ್ಲ. ಇತ್ತೀಚೆಗೆ ತಮ್ಮ ಹಳೆಯ ಸ್ನೇಹಿತನನ್ನು ಪತ್ತೆಹಚ್ಚಿ ಸಾಲ ತೀರಿಸಲು ಅವರು ನಿರ್ಧರಿಸಿದರು. ಇದು ಅಷ್ಟು ಸುಲಭವಾಗಿರಲಿಲ್ಲ. ಅವರ ಬಳಿ ಲಚ್ಚಣ್ಣನ ಯಾವುದೇ ಸಂಪರ್ಕ ವಿವರ ಇರಲಿಲ್ಲ. ಲಚ್ಚಣ್ಣ ಧರ್ಮಪುರಿ ಗ್ರಾಮದವರು ಎಂಬ ಒಂದೇ ಒಂದು ಮಾಹಿತಿ ಅವರ ನೆನಪಿನಲ್ಲಿತ್ತು. ಅಂತರ್ಜಾಲದಲ್ಲಿ ಹುಡುಕಾಟ ನಡೆಸಿ ಆ ಊರನ್ನು ಪತ್ತೆಹಚ್ಚಿದ ಇಸ್ಮಾಯಿಲ್, ಕೇರಳದಿಂದ ನೇರವಾಗಿ ತೆಲಂಗಾಣದ ಆ ಹಳ್ಳಿಗೆ ತಲುಪಿದರು. ಅಲ್ಲಿ ಸ್ಥಳೀಯರ ಸಹಾಯದಿಂದ ಕೊನೆಗೂ ಲಚ್ಚಣ್ಣ ಅವರ ಮನೆಯನ್ನು ಪತ್ತೆಹಚ್ಚುವಲ್ಲಿ ಯಶಸ್ವಿಯಾದರು.

ಜುಲೈ 9 ರಂದು ಲಚ್ಚಣ್ಣ ಅವರ ಮನೆಗೆ ಭೇಟಿ ನೀಡಿದ ಇಸ್ಮಾಯಿಲ್, ಅವರ ಕುಟುಂಬಸ್ಥರಿಗೆ 25,000 ರೂಪಾಯಿ ನಗದು ಹಸ್ತಾಂತರಿಸಿದರು. ಆ ಸಮಯದಲ್ಲಿ ಲಚ್ಚಣ್ಣ ಪ್ರಸ್ತುತ ಗಲ್ಫ್ ದೇಶದಲ್ಲಿ ಕೆಲಸ ಮಾಡುತ್ತಿದ್ದರಿಂದ, ಇಬ್ಬರೂ ವಾಟ್ಸಾಪ್ ವಿಡಿಯೋ ಕಾಲ್ ಮೂಲಕ ಮಾತನಾಡಿ ಹಳೆಯ ದಿನಗಳನ್ನು ನೆನೆದು ಭಾವುಕರಾದರು.

ಇಂತಹ ಪ್ರಾಮಾಣಿಕ ವ್ಯಕ್ತಿಯನ್ನು ನೋಡಿಲ್ಲ ಎಂದ ಲಚ್ಚಣ್ಣ

ಸುಮಾರು 35 ವರ್ಷಗಳ ಹಿಂದೆ ನೀಡಿದ್ದ 120 ರಿಯಾಲ್ ಸಾಲಕ್ಕೆ ಇಸ್ಮಾಯಿಲ್ 25,000 ರೂಪಾಯಿ ತಂದುಕೊಟ್ಟಾಗ ಲಚ್ಚಣ್ಣ ಮತ್ತು ಅವರ ಕುಟುಂಬ ಆಶ್ಚರ್ಯಚಕಿತರಾದರು. ಇಸ್ಮಾಯಿಲ್ ಅವರ ಪ್ರಾಮಾಣಿಕತೆ ಮತ್ತು ಸದ್ಗುಣವನ್ನು ಕೊಂಡಾಡಿದ ಲಚ್ಚಣ್ಣ, “ನಾವು ಸೌದಿಯಲ್ಲಿದ್ದಾಗ ಪ್ರತಿದಿನ ಸಂಜೆ ಒಟ್ಟಿಗೆ ಅಡುಗೆ ಮಾಡಿ ಊಟ ಮಾಡುತ್ತಿದ್ದೆವು. ಹಾಗೆ ನಮ್ಮ ಸ್ನೇಹ ಗಟ್ಟಿಯಾಯಿತು. ಅಂದು ನಾನು ನೀಡಿದ 1,000 ರೂಪಾಯಿಗೆ ಅವರು ಇಂದು 25,000 ರೂಪಾಯಿ ಹೇಗೆ ಲೆಕ್ಕ ಹಾಕಿದ್ದಾರೋ ನನಗಂತೂ ತಿಳಿಯುತ್ತಿಲ್ಲ. ಬಹುಶಃ ಇಷ್ಟು ವರ್ಷಗಳ ಬಡ್ಡಿಯನ್ನು ಸೇರಿಸಿ ಕೊಟ್ಟಿದ್ದಾರೆ ಎನಿಸುತ್ತದೆ. ಇಷ್ಟು ವರ್ಷಗಳ ನಂತರವೂ ಅವರು ತಮ್ಮ ಮಾತನ್ನು ಉಳಿಸಿಕೊಂಡಿರುವುದು ನಮ್ಮ ಸ್ನೇಹದ ಶಕ್ತಿಗೆ ಸಾಕ್ಷಿ” ಎಂದು ಕೃತಜ್ಞತೆ ಸಲ್ಲಿಸಿದ್ದಾರೆ.