ಭುವನೇಶ್ವರ: ಪತ್ನಿಗೆ ಪಾರ್ಶ್ವವಾಯು ಕಾಣಿಸಿಕೊಂಡಾಗ ಆ ವೃದ್ಧ ಪತಿ ಕಂಗೆಡಲಿಲ್ಲ. ಆಕೆಗೆ ಉತ್ತಮ ಚಿಕಿತ್ಸೆ ಕೊಡಿಸಲು ಬರೋಬ್ಬರಿ 300 ಕಿಲೋಮೀಟರ್ ರಿಕ್ಷಾ ತುಳಿದು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಒಡಿಶಾದ ಸಂಬಲ್‌ಪುರ ಜಿಲ್ಲೆಯಲ್ಲಿ ಈ ಹೃದಯಸ್ಪರ್ಶಿ ಘಟನೆ ನಡೆದಿದೆ.
ಸಂಬಲ್‌ಪುರದ ಮೋಡಿಪಾಡ ನಿವಾಸಿಗಳಾದ 75 ವರ್ಷದ ಬಾಬು ಲೋಹರ್ ಮತ್ತು 70 ವರ್ಷದ ಜ್ಯೋತಿ ದಂಪತಿಗಳಿವರು. ಜ್ಯೋತಿಯವರಿಗೆ ಪಾರ್ಶ್ವವಾಯು ಉಂಟಾದಾಗ ಸ್ಥಳೀಯ ಆಸ್ಪತ್ರೆಯ ವೈದ್ಯರು ಹೆಚ್ಚಿನ ಚಿಕಿತ್ಸೆಗಾಗಿ ಕಟಕ್‌ನ ಎಸ್‌ಸಿಬಿ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ದಾಖಲಿಸುವಂತೆ ಸೂಚಿಸಿದ್ದರು.
ಒಂಬತ್ತು ದಿನಗಳ ಅವಿರತ ಪಯಣ
ಸುಮಾರು 300 ಕಿ.ಮೀ ದೂರದಲ್ಲಿರುವ ಆಸ್ಪತ್ರೆಗೆ ಖಾಸಗಿ ಅಂಬ್ಯುಲೆನ್ಸ್‌ನಲ್ಲಿ ಕರೆದೊಯ್ಯುವಷ್ಟು ಆರ್ಥಿಕ ಶಕ್ತಿ ಬಾಬು ಲೋಹರ್ ಅವರಿಗಿರಲಿಲ್ಲ. ಆದರೂ ಪತ್ನಿಯನ್ನು ಹೇಗಾದರೂ ಬದುಕಿಸಿಕೊಳ್ಳಬೇಕೆಂಬ ಹಠದಿಂದ, ತಮ್ಮ ಮೂರು ಚಕ್ರದ ರಿಕ್ಷಾದ ಮೇಲೆ ಹಾಸಿಗೆ ಹಾಸಿ ಪತ್ನಿಯನ್ನು ಮಲಗಿಸಿಕೊಂಡು ಸಂಬಲ್‌ಪುರದಿಂದ ಕಟಕ್‌ಗೆ ಪ್ರಯಾಣ ಬೆಳೆಸಿದರು.
ತನ್ನ ವಯಸ್ಸು ಮತ್ತು ಶಕ್ತಿಯನ್ನು ಲೆಕ್ಕಿಸದೆ ಬಾಬು ಲೋಹರ್ ಸತತ 9 ದಿನಗಳ ಕಾಲ ರಿಕ್ಷಾ ತುಳಿದಿದ್ದಾರೆ. ರಾತ್ರಿ ವೇಳೆ ರಸ್ತೆ ಬದಿಯ ಅಂಗಡಿಗಳ ಮುಂದೆ ವಿಶ್ರಾಂತಿ ಪಡೆಯುತ್ತಾ ಸಾಗಿದ ಅವರು ಕೊನೆಗೂ ಕಟಕ್ ತಲುಪಿದರು. ಅಲ್ಲಿ ಎರಡು ತಿಂಗಳ ಕಾಲ ಚಿಕಿತ್ಸೆ ಪಡೆದ ಜ್ಯೋತಿ ಅವರು ಪಾರ್ಶ್ವವಾಯುವಿನಿಂದ ಗುಣಮುಖರಾದರು.
ಮರಳಿ ಬರುವಾಗ ನಡೆದ ಅಪಘಾತ
ಜನವರಿ 19 ರಂದು ಈ ವೃದ್ಧ ದಂಪತಿಗಳು ಅದೇ ರಿಕ್ಷಾದಲ್ಲಿ ತಮ್ಮ ಗ್ರಾಮಕ್ಕೆ ಮರಳುತ್ತಿದ್ದರು. ಚೌದ್ವಾರ್ ಎಂಬಲ್ಲಿ ವಾಹನವೊಂದು ಇವರ ರಿಕ್ಷಾಕ್ಕೆ ಡಿಕ್ಕಿ ಹೊಡೆದಿದೆ. ಈ ಅಪಘಾತದಲ್ಲಿ ವೃದ್ಧೆ ಜ್ಯೋತಿ ಅವರಿಗೆ ತೀವ್ರ ಗಾಯಗಳಾದವು. ಕೂಡಲೇ ಅವರನ್ನು ಹತ್ತಿರದ ಆರೋಗ್ಯ ಕೇಂದ್ರಕ್ಕೆ ಕರೆದೊಯ್ಯಲಾಯಿತು.
ಚಿಕಿತ್ಸೆಯ ನಂತರವೂ ಬಾಬು ಲೋಹರ್ ಮತ್ತೆ ರಿಕ್ಷಾ ತುಳಿದೇ ಊರಿಗೆ ಹೋಗಲು ಸಿದ್ಧರಾದರು. ಇದನ್ನು ನೋಡಿ ಅಲ್ಲಿನ ವೈದ್ಯಕೀಯ ಸಿಬ್ಬಂದಿ ಭಾವುಕರಾದರು. ಚಿಕಿತ್ಸೆ ನೀಡಿದ ಡಾ. ವಿಕಾಸ್ ಅವರು ವೈಯಕ್ತಿಕವಾಗಿ ಆರ್ಥಿಕ ನೆರವು ನೀಡಿ, ದಂಪತಿಗಳನ್ನು ಬೇರೊಂದು ವಾಹನದ ಮೂಲಕ ಸುರಕ್ಷಿತವಾಗಿ ಅವರ ಗ್ರಾಮಕ್ಕೆ ಕಳುಹಿಸಿಕೊಟ್ಟರು. ಪತ್ನಿಯ ಮೇಲಿನ ಬಾಬು ಲೋಹರ್ ಅವರ ಅಪಾರ ಪ್ರೀತಿ ಮತ್ತು ಬದ್ಧತೆಯನ್ನು ಕಂಡು ಜನತೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
