ಕಿಚನ್​ ಫ್ಲೋರ್​ ಅಡಿಯಲ್ಲಿ ಸಿಕ್ತು 2.3 ಕೋಟಿ ರೂ. ಮೌಲ್ಯದ ಅಪರೂಪದ ಚಿನ್ನದ ನಾಣ್ಯ

ಅಡುಗೆ ಮನೆಯ ನೆಲಹಾಸಿನ ಅಡಿಯಲ್ಲಿ ಅಪರೂಪದ ಚಿನ್ನದ ನಾಣ್ಯ ಪತ್ತೆಯಾದ ಪ್ರಸಂಗ ಯುಕೆಯಲ್ಲಿ ನಡೆದಿದ್ದು, ಪತ್ತೆ ಮಾಡಿದ ದಂಪತಿ ಜಾಕ್​ಪಾಟ್​ ಹೊಡೆದಿದ್ದಾರೆ.

ಉತ್ತರ ಯಾರ್ಕ್​ಷೈರ್​ನ ಎಲ್ಲೆರ್ಬಿಯಲ್ಲಿ ತಮ್ಮ ಮನೆಯನ್ನು ನವೀಕರಿಸುತ್ತಿದ್ದಾಗ 2.3 ಕೋಟಿ ರೂ. ಮೌಲ್ಯದ ಚಿನ್ನದ ನಾಣ್ಯ ಪತ್ತೆಯಾಗಿದೆ.
ದಂಪತಿ ತಮ್ಮ ಮಾಲಿಕತ್ವದಲ್ಲಿದ್ದ 18 ನೇ ಶತಮಾನದ ಮನೆಯ ಅಡುಗೆ ಮನೆ ನೆಲವನ್ನು ರಿಪೇರಿ ಮಾಡಲು ನಿರ್ಧರಿಸಿದ್ದರು.

ಅವರು ಕೆಲಸವನ್ನು ಪ್ರಾರಂಭಿಸಿ, ನೆಲದ ಹಲಗೆಯನ್ನು ಎತ್ತಿದಾಗ, ಜೋಡಿಗೆ ನೆಲದ ಕೆಳಗೆ ಅಸಾಮಾನ್ಯವಾದುದನ್ನು ಕಂಡಿತು. ಆರಂಭದಲ್ಲಿ, ದಂಪತಿಗಳು ವಿದ್ಯುತ್​ ಕೇಬಲ್ಗೆ ಹೊಡೆದಿದ್ದಾಗಿ ಭಾವಿಸಿದ್ದರು, ಆದರೆ ಶೀಘ್ರದಲ್ಲೇ ಅವರಿಗೆ ವಿಷಯ ಸ್ಪಷ್ಟವಾಗಿತ್ತು.

ಹತ್ತಿರದಿಂದ ಪರಿಶೀಲಿಸಿ ನೋಡಿದಾಗ, ಕಾಂಕ್ರೀಟ್​ ನೆಲದ ಕೆಳಗೆ ಸುಮಾರು ಆರು ಇಂಚುಗಳಷ್ಟು ಚಿನ್ನದ ನಾಣ್ಯಗಳಿಂದ ತುಂಬಿದ ಪಾತ್ರೆ ಕಂಡುಕೊಂಡರು. ಮಣ್ಣಿನ ಪಾತ್ರೆಯೊಳಗೆ ಸುಮಾರು 300 ಚಿನ್ನದ ನಾಣ್ಯಗಳನ್ನು ಇರಿಸಲಾಗಿತ್ತು.

10 ವರ್ಷಗಳಿಂದ ಒಂದೇ ಮನೆಯಲ್ಲಿ ವಾಸಿಸುತ್ತಿದ್ದ ಈ ಜೋಡಿಗೆ ಇದರ ಬಗ್ಗೆ ಸುಳಿವೇ ಇರಲಿಲ್ಲ. ಆ ನಾಣ್ಯಗಳು ಅಪರೂಪ ಮತ್ತು 400 ವರ್ಷಗಳಷ್ಟು ಹಿಂದಿನವು ಎಂದು ನಂತರ ತಿಳಿದುಬಂದಿದೆ.

ಇದನ್ನು ಕಂಡುಕೊಂಡ ನಂತರ ದಂಪತಿಯು ಹೆಚ್ಚಿನ ಮಾಹಿತಿ ತಿಳಿಯಲು ಲಂಡನ್​ ಮೂಲದ ಹರಾಜುದಾರರಾದ ಸ್ಪಿಂಕ್​ ಮತ್ತು ಸನ್​ಗೆ ಡಯಲ್​ ಮಾಡಿದರು. ಪರಿಶೀಲನೆಯ ಬಳಿಕ, ನಾಣ್ಯಗಳು 1610 ರಿಂದ 1727 ರ ಜೇಮ್ಸ್​ ಐ ಮತ್ತು ಚಾರ್ಲ್ಸ್​ ಐ ರ ಆಳ್ವಿಕೆಯಲ್ಲಿದೆ ಎಂದು ತಿಳಿದುಬಂದಿದೆ.

260 ಕ್ಕೂ ಹೆಚ್ಚು ನಾಣ್ಯಗಳ ಈ ಪತ್ತೆಯು ಬ್ರಿಟನ್​ನ ಪುರಾತತ್ತ್ವ ಶಾಸ್ತ್ರದ ದಾಖಲೆಗಳಲ್ಲಿ ಅತಿ ದೊಡ್ಡ ನಿಧಿ ಪತ್ತೆಯಾಗಿದೆ ಎಂದು ಚಿನ್ನದ ನಾಣ್ಯಗಳನ್ನು ಪರೀಕ್ಷಿಸಲು ಹೋದ ತಜ್ಞ ಹರಾಜುದಾರ ಗ್ರೆಗೊರಿ ಎಡ್ಮಂಡ್​ ಹೇಳಿದರು.

ಬ್ಯಾಂಕ್​ಗಳು ಮತ್ತು ಬ್ಯಾಂಕ್​ ನೋಟುಗಳು ಅಸ್ತಿತ್ವದಲ್ಲಿದ್ದ 18ನೇ ಶತಮಾನದ ಆರಂಭದಲ್ಲಿ ಇಷ್ಟೊಂದು ಚಿನ್ನದ ನಾಣ್ಯಗಳನ್ನು ಏಕೆ ಹೂಳುತ್ತಾರೆ ಎಂಬುದು ಗೊಂದಲಮಯವಾಗಿದೆ ಎಂದು ಎಡ್ಮಂಡ್​ ಹೇಳಿದರು.