ನವದೆಹಲಿ: GST ಮಂಡಳಿಯು ತೆರಿಗೆ ಅಧಿಕಾರಿಗಳ ಬಂಧನದ ಅಧಿಕಾರವನ್ನು ರದ್ದುಗೊಳಿಸಿದೆ ಮತ್ತು ಕಾನೂನು ಕ್ರಮ ಜರುಗಿಸಲು ಇರುವ ಕನಿಷ್ಠ ಮೊತ್ತದ ಮಿತಿಯನ್ನು 1 ಕೋಟಿ ರೂಪಾಯಿಯಿಂದ 5 ಕೋಟಿ ರೂಪಾಯಿಗೆ ಏರಿಸಿದೆ.
ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಗುರುವಾರ ಮಾತನಾಡಿ, ಜಿಎಸ್‌ಟಿ ಮಂಡಳಿಯು ತೆರಿಗೆ ಅಧಿಕಾರಿಗಳ ಬಂಧನದ ಅಧಿಕಾರವನ್ನು ರದ್ದುಪಡಿಸಿದೆ ಮತ್ತು ಕಾನೂನು ಕ್ರಮಕ್ಕೆ (ಪ್ರಾಸಿಕ್ಯೂಷನ್) ಅರ್ಹವಾಗುವ ಮೊತ್ತದ ಮಿತಿಯನ್ನು 1 ಕೋಟಿ ರೂಪಾಯಿಯಿಂದ 5 ಕೋಟಿ ರೂಪಾಯಿಗೆ ಹೆಚ್ಚಿಸಿದೆ ಎಂದು ತಿಳಿಸಿದರು.
ಇ-ಕಾಮರ್ಸ್ ವೇದಿಕೆಗಳಲ್ಲಿನ ಸಣ್ಣ ಮಾರಾಟಗಾರರಿಗೆ ಸರಳ ನಿಯಮಗಳನ್ನು ಜಾರಿಗೆ ತರುವ ಪ್ರಸ್ತಾವನೆಗೂ ಮಂಡಳಿ ಅನುಮೋದನೆ ನೀಡಿದೆ ಎಂದು ಅವರು ಹೇಳಿದರು. “ತೆರಿಗೆ ದರದ ರಚನೆಯು ಈಗ ಅಂತಿಮಗೊಂಡಿದೆ, ಹೀಗಾಗಿ ಮಂಡಳಿಯು ದೈನಂದಿನ ತೆರಿಗೆ ಕಾರ್ಯವಿಧಾನಗಳತ್ತ ಗಮನಹರಿಸಿದೆ,” ಎಂದು ಹಣಕಾಸು ಸಚಿವಾಲಯ ತಿಳಿಸಿದ್ದು, ಇನ್ನು ಮುಂದೆ ಜಿಎಸ್‌ಟಿ ದರಗಳಲ್ಲಿನ ಬದಲಾವಣೆಗಳು ವರ್ಷಕ್ಕೊಮ್ಮೆ ಮಾತ್ರ ನಡೆಯಲಿವೆ ಎಂದು ಹೇಳಿದೆ.
ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್ (ITC) ಕ್ಲೈಮ್‌ಗಳ ಕುರಿತು ಮಾತನಾಡಿದ ಅವರು, ಸರಿಯಾದ ಇನ್‌ವಾಯ್ಸ್ (ಬಿಲ್) ಹೊಂದಿರುವ, ಸರಕುಗಳನ್ನು ಸ್ವೀಕರಿಸಿರುವ ಮತ್ತು ಪೂರೈಕೆದಾರರಿಗೆ ಪೂರ್ಣ ಹಣ ಪಾವತಿಸಿರುವ ನೈಜ ಖರೀದಿದಾರರನ್ನು ಹೇಗೆ ರಕ್ಷಿಸಬೇಕು ಎಂಬುದನ್ನು ಪರಿಶೀಲಿಸಲು ಅಧಿಕಾರಿಗಳ ಸಮಿತಿಯನ್ನು ರಚಿಸಲು 57ನೇ ಜಿಎಸ್‌ಟಿ ಮಂಡಳಿ ಸಭೆಯಲ್ಲಿ ನಿರ್ಧರಿಸಲಾಗಿದೆ ಎಂದು ತಿಳಿಸಿದರು.
ಮಂಡಳಿಯ ನಿರ್ಧಾರದಂತೆ, ಕಾನೂನು ಕ್ರಮಕ್ಕೆ ಅರ್ಹವಾಗುವ ಮೊತ್ತದ ಮಿತಿಯನ್ನು 1 ಕೋಟಿ ರೂಪಾಯಿಯಿಂದ 5 ಕೋಟಿ ರೂಪಾಯಿಗೆ ಏರಿಸಲಾಗಿದೆ ಮತ್ತು ಕನಿಷ್ಠ ಶಿಕ್ಷೆಯ ನಿಯಮವನ್ನು ತೆಗೆದುಹಾಕಲಾಗಿದೆ. ಶಿಕ್ಷೆಯ ಸ್ವರೂಪವು (ದಂಡ, ಜೈಲು ಶಿಕ್ಷೆ ಅಥವಾ ಎರಡೂ) ಪ್ರತಿ ಪ್ರಕರಣದಲ್ಲಿ ನ್ಯಾಯಾಂಗದ ವಿವೇಚನೆಗೆ ಬಿಡಲಾಗಿದೆ. ನಿರ್ದಿಷ್ಟ ದಂಡದ ನಿಬಂಧನೆ ಇಲ್ಲದ ಸಂದರ್ಭಗಳಲ್ಲಿ ಅನ್ವಯವಾಗುವ ಸಾಮಾನ್ಯ ದಂಡದ ಮೊತ್ತವನ್ನು 25,000 ರೂಪಾಯಿಯಿಂದ 10,000 ರೂಪಾಯಿಗೆ ಇಳಿಸಲಾಗಿದೆ ಎಂದು ಸಚಿವಾಲಯ ತಿಳಿಸಿದೆ.
ಅಂತಿಮ ನೈಜ ತೆರಿಗೆದಾರರಿಗೆ ವರ್ಗಾಯಿಸಲಾಗುವ ಐಟಿಸಿ (ITC) ಅನ್ನು ತಡೆಹಿಡಿಯುವ ಅಥವಾ ಹಿಂಪಡೆಯುವ (ರಿವರ್ಸ್ ಮಾಡುವ) ಸಿಜಿಎಸ್‌ಟಿ (CGST) ಕಾಯ್ದೆಯ ಸೆಕ್ಷನ್ 16(2)(c) ಅನ್ನು ತಿದ್ದುಪಡಿ ಮಾಡುವ ವಿಷಯವೂ ಕಾರ್ಯಸೂಚಿಯಲ್ಲಿತ್ತು ಎಂದು ಸೀತಾರಾಮನ್ ಹೇಳಿದರು.
“ಮೌಲ್ಯ ಸರಪಳಿಯಲ್ಲಿನ (value chain) ಯಾವುದೇ ಪೂರೈಕೆದಾರರು ಸಂಗ್ರಹವಾದ ಐಟಿಸಿ(ITC) ಅನ್ನು ಜಮಾ ಮಾಡಲು ವಿಫಲರಾದಾಗ ಅಥವಾ ನಕಲಿ ಐಟಿಸಿ ಅನ್ನು ವರ್ಗಾಯಿಸಿದಾಗ, ಪ್ರಸ್ತುತ, ಸರಕು ಅಥವಾ ಸೇವೆಯನ್ನು ಸ್ವೀಕರಿಸಿದ ತೆರಿಗೆದಾರರ ಬಳಿ ಇನ್‌ವಾಯ್ಸ್ ಇದ್ದರೂ ಮತ್ತು ಅವರು ಪೂರೈಕೆದಾರರಿಗೆ ತೆರಿಗೆ ಮೊತ್ತವನ್ನು ಪಾವತಿಸಿದ್ದರೂ ಸಹ, ಸರಪಳಿಯ ಯಾವುದೇ ಹಂತದಲ್ಲಿ ಪೂರೈಕೆದಾರರೊಬ್ಬರು ನಿಯಮಗಳನ್ನು ಪಾಲಿಸದಿದ್ದರೆ ಸಮಸ್ಯೆ ಅಲ್ಲಿಂದಲೇ ಉದ್ಭವಿಸುತ್ತದೆ ಎಂಬ ಕಾರಣಕ್ಕೆ ಐಟಿಸಿ ಅನ್ನು ತಡೆಹಿಡಿಯಲಾಗುತ್ತದೆ. ಇದು ತೆರಿಗೆದಾರರಿಗೆ ಸವಾಲುಗಳನ್ನು ಸೃಷ್ಟಿಸುತ್ತದೆ. ಇದನ್ನು ತಾರ್ಕಿಕಗೊಳಿಸುವ ಅಗತ್ಯವಿದೆ. ಮಂಡಳಿಯು ಇಂದು ಈ ವಿಷಯದ ಬಗ್ಗೆ ಚರ್ಚಿಸಿತು ಮತ್ತು ಈ ಅಸಂಗತತೆಯನ್ನು ಪರಿಹರಿಸುವ ಮಾರ್ಗಗಳನ್ನು ಪರಿಶೀಲಿಸಿತು. ಇದರಲ್ಲಿ ಐಟಿಸಿ ದುರುಪಯೋಗವನ್ನು ತಡೆಗಟ್ಟುವ ಜೊತೆಗೆ, ಪ್ರಾಮಾಣಿಕ ತೆರಿಗೆದಾರರ ಕಾಳಜಿಗಳ ನಡುವೆ ಸಮತೋಲನವನ್ನು ಕಾಯ್ದುಕೊಳ್ಳುವುದು ಸೇರಿದೆ. ಹಲವಾರು ರಾಜ್ಯಗಳ ಸಲಹೆಗಳ ಮೇರೆಗೆ ಮತ್ತು ಸಹಕಾರಿ ಒಕ್ಕೂಟ ವ್ಯವಸ್ಥೆಯ (cooperative federalism) ಮನೋಭಾವದೊಂದಿಗೆ, ಈ ವಿಷಯವನ್ನು ಮತ್ತಷ್ಟು ಪರಿಶೀಲಿಸಲು ಅಧಿಕಾರಿಗಳ ಸಮಿತಿಯನ್ನು ರಚಿಸಲು ನಿರ್ಧರಿಸಲಾಯಿತು… ನಾವು ಇದನ್ನು ತೆರಿಗೆದಾರರಿಗೆ ನೇರವಾಗಿ ಸರಕು ಪೂರೈಸಿದವರ ಹಂತಕ್ಕೆ ಮಾತ್ರ ಸೀಮಿತಗೊಳಿಸಬೇಕು ಮತ್ತು ಸಂಪೂರ್ಣ ಸರಪಳಿಯವರೆಗೆ ವಿಸ್ತರಿಸಬಾರದು ಎಂದು ಪ್ರಸ್ತಾಪಿಸಿದ್ದೆವು. ಆದರೆ ಇಂದು ಕೆಲವು ರಾಜ್ಯಗಳು ಮನವಿ ಮಾಡಿಕೊಂಡಿದ್ದರಿಂದ ಮತ್ತು ಸಹಕಾರಿ ಒಕ್ಕೂಟ ವ್ಯವಸ್ಥೆಯ ಮನೋಭಾವದ ಹಿನ್ನೆಲೆಯಲ್ಲಿ, ಈ ವಿಷಯವನ್ನು ಮತ್ತಷ್ಟು ಪರಿಶೀಲಿಸಲು ಅಧಿಕಾರಿಗಳ ಸಮಿತಿಯನ್ನು ರಚಿಸಲು ನಾವು ಒಪ್ಪಿಕೊಂಡಿದ್ದೇವೆ… ಅಧಿಕಾರಿಗಳ ಸಮಿತಿಯು ಮೂರು ತಿಂಗಳೊಳಗೆ ತನ್ನ ವರದಿಯನ್ನು ಸಲ್ಲಿಸುತ್ತದೆ ಮತ್ತು ಅಂತಿಮ ನಿರ್ಧಾರಕ್ಕಾಗಿ ಅದನ್ನು ತಕ್ಷಣವೇ ಮಂಡಳಿಯ ಮುಂದೆ ಇರಿಸಲಾಗುತ್ತದೆ; ಅಂತಿಮ ನಿರ್ಧಾರ ಏನಿರುತ್ತದೆ ಎಂಬುದನ್ನು ನಾನು ಈಗಲೇ ಊಹಿಸಲು ಸಾಧ್ಯವಿಲ್ಲ. ಇದು 1 ಏಪ್ರಿಲ್ 2027 ರಿಂದ ಜಾರಿಗೆ ಬರುವ ಕಾರ್ಯಸೂಚಿಯ ಭಾಗವೂ ಆಗುತ್ತದೆ. ಈ ಸಭೆಯಲ್ಲಿ ಯಾವುದೇ ಜಿಎಸ್‌ಟಿ ದರಗಳನ್ನು ಬದಲಾಯಿಸಲಾಗಿಲ್ಲ, ಇದನ್ನು ನಾನು ಈಗಾಗಲೇ ಹೇಳಿದ್ದೇನೆ,” ಎಂದು ಅವರು ಹೇಳಿದರು.
“ಇಂದಿನ ಕಾರ್ಯಸೂಚಿಯಲ್ಲಿರುವ ಎಲ್ಲಾ ವಿಷಯಗಳಿಗೂ ಒಪ್ಪಿಗೆ ದೊರೆತಿದೆ ಎಂದು ನಾನು ಹೇಳಬಲ್ಲೆ; ಕೇವಲ ಎರಡು ವಿಷಯಗಳನ್ನು ಹೊರತುಪಡಿಸಿ, ಅವುಗಳಿಗಾಗಿ ಸಮಿತಿಯೊಂದನ್ನು ರಚಿಸಲಾಗಿದೆ. ಆ ಎರಡು ವಿಷಯಗಳನ್ನು ಪರಿಶೀಲಿಸಿ ವರದಿ ನೀಡಲು ಸಮಿತಿಯೊಂದನ್ನು ರಚಿಸಲು ನಾವು ಒಪ್ಪಿಕೊಂಡಿದ್ದೇವೆ ಮತ್ತು ಆ ಸಮಿತಿಯು ಮೂರು ತಿಂಗಳೊಳಗೆ ವರದಿ ಸಲ್ಲಿಸಬೇಕೆಂದು ನಾನು ಸೂಚಿಸಿದ್ದೇನೆ. ಅದರ ನಂತರ ನಾವು ತಕ್ಷಣವೇ ಜಿಎಸ್‌ಟಿ ಮಂಡಳಿಯ ಸಭೆಯನ್ನು ನಡೆಸುತ್ತೇವೆ. ಆ ನಿರ್ಧಾರಗಳು 2027ರ ಏಪ್ರಿಲ್ 1ರಿಂದ ಜಾರಿಗೆ ಬರುತ್ತವೆ. ಪ್ರಕ್ರಿಯೆ ಸುಧಾರಣೆಗೆ ಸಂಬಂಧಿಸಿದ ಇಂದಿನ ಕಾರ್ಯಸೂಚಿಯ ಪ್ರತಿಯೊಂದು ಅಂಶವೂ 2027ರ ಏಪ್ರಿಲ್ 1ರಿಂದ ಜಾರಿಗೆ ಬರಲಿದೆ ಎಂದು ನಿರ್ಮಲಾ ಸೀತಾರಾಮನ್ ಹೇಳಿದರು.
“ಜಿಎಸ್‌ಟಿ ಅಡಿಯಲ್ಲಿನ ಬಂಧನದ ಅಧಿಕಾರವನ್ನು ರದ್ದುಗೊಳಿಸಲು ಮಂಡಳಿಯು ಶಿಫಾರಸು ಮಾಡಿದೆ. ಕಾನೂನು ಕ್ರಮ ಅಥವಾ ಮೊಕದ್ದಮೆ ಹೂಡಲು ಇರುವ ಕನಿಷ್ಠ ಮಿತಿಯನ್ನು (threshold) 1 ಕೋಟಿ ರೂಪಾಯಿಯಿಂದ 5 ಕೋಟಿ ರೂಪಾಯಿಗೆ ಏರಿಸಲು ಮಂಡಳಿ ಶಿಫಾರಸು ಮಾಡಿದೆ. ಅಂದರೆ, 5 ಕೋಟಿ ರೂಪಾಯಿಗಿಂತ ಕಡಿಮೆ ಮೊತ್ತದ ಪ್ರಕರಣಗಳಲ್ಲಿ ಯಾವುದೇ ಕಾನೂನು ಕ್ರಮ ಜರುಗುವುದಿಲ್ಲ. ಅಲ್ಲದೆ, ಸಾಮಾನ್ಯ ದಂಡದ ಮೊತ್ತವನ್ನು 25,000 ರೂಪಾಯಿಯಿಂದ 10,000 ರೂಪಾಯಿಗೆ ಇಳಿಸಲೂ ಶಿಫಾರಸು ಮಾಡಲಾಗಿದೆ,” ಎಂದು ತಿಳಿಸಿದರು.
ಸರಕುಗಳ ಸುಗಮ ಸಾಗಾಟಕ್ಕಾಗಿ ಜಿಎಸ್‌ಟಿ ಮಂಡಳಿ ನಿರ್ಧಾರವೊಂದನ್ನು ಕೈಗೊಂಡಿದೆ ಎಂದೂ ಸೀತಾರಾಮನ್ ಹೇಳಿದರು. ಸರಕುಗಳನ್ನು ಕೇವಲ ಸರಕು ಪೂರೈಸುವ ರಾಜ್ಯದ ಅಥವಾ ಸರಕು ತಲುಪಬೇಕಾದ (ಗಮ್ಯಸ್ಥಾನದ) ರಾಜ್ಯದ ಅಧಿಕಾರಿಗಳು ಮಾತ್ರ ಪರಿಶೀಲಿಸಬಹುದು, ತಡೆಹಿಡಿಯಬಹುದು ಅಥವಾ ವಶಪಡಿಸಿಕೊಳ್ಳಬಹುದು ಎಂದು ಮಂಡಳಿ ಶಿಫಾರಸು ಮಾಡಿದೆ ಎಂದು ಅವರು ತಿಳಿಸಿದರು. “ನಿರ್ದಿಷ್ಟ ಗುಪ್ತಚರ ಮಾಹಿತಿ ಇದ್ದರೆ ಮತ್ತು ಕನಿಷ್ಠ ಜಂಟಿ ಆಯುಕ್ತರ (Joint Commissioner) ಶ್ರೇಣಿಯ ಅಧಿಕಾರಿಯ ಅನುಮತಿಯೊಂದಿಗೆ ಮಾತ್ರ ಸರಕುಗಳನ್ನು ತಡೆಹಿಡಿಯಬಹುದು… ಜಿಎಸ್‌ಟಿ ಅಡಿಯಲ್ಲಿನ ಬಂಧನದ ಅಧಿಕಾರವನ್ನು ರದ್ದುಗೊಳಿಸಲು ಮಂಡಳಿ ಶಿಫಾರಸು ಮಾಡಿದೆ. ಕಾನೂನು ಕ್ರಮದ ಮಿತಿಯನ್ನು 1 ಕೋಟಿ ರೂಪಾಯಿಯಿಂದ 5 ಕೋಟಿ ರೂಪಾಯಿಗೆ ಏರಿಸಲು ಹಾಗೂ ಸಾಮಾನ್ಯ ದಂಡವನ್ನು 25,000 ರೂಪಾಯಿಯಿಂದ 10,000 ರೂಪಾಯಿಗೆ ಇಳಿಸಲು ಮಂಡಳಿ ಶಿಫಾರಸು ಮಾಡಿದೆ,” ಎಂದು ಅವರು ಹೇಳಿದರು.
