ವೃಂದಾವನದ ಪ್ರಸಿದ್ಧ ಸಂತ ಹಾಗೂ ಆಧ್ಯಾತ್ಮಿಕ ಮಾರ್ಗದರ್ಶಿ ಪ್ರೇಮಾನಂದ ಜಿ ಮಹಾರಾಜ್ ಅವರು ತಮ್ಮ ಸರಳ ಜೀವನಶೈಲಿ, ಭಕ್ತಿ ಸಿದ್ಧಾಂತ ಮತ್ತು ವೈರಾಗ್ಯ ಬೋಧನೆಗಳಿಂದಲೇ ದೇಶಾದ್ಯಂತ ಲಕ್ಷಾಂತರ ಭಕ್ತರನ್ನು ಸಂಪಾದಿಸಿದ್ದಾರೆ. ರಾಜಕಾರಣಿಗಳು, ಚಲನಚಿತ್ರ ನಟರು ಹಾಗೂ ಕ್ರಿಕೆಟ್‌ ತಾರೆಯರು ಸೇರಿದಂತೆ ಕೋಟ್ಯಂತರ ಜನರು ಅವರ ಆಶೀರ್ವಾದ ಪಡೆಯಲು ಬರುತ್ತವೆ. ಆದರೆ ಈ ಹಂತದಲ್ಲೂ ಅವರ ಸ್ವಂತ ಆಸ್ತಿ ಮತ್ತು ಹಣಕಾಸಿನ ಸ್ಥಿತಿ ಹೇಗಿದೆ ಎಂಬ ಕುರಿತು ಸಾರ್ವಜನಿಕರಲ್ಲಿ ಕುತೂಹಲ ಮೂಡುವುದು ಸಹಜ. ಈ ಬಗ್ಗೆ ಹಿಂದೆ ನಡೆದ ಸಂಭಾಷಣೆಯೊಂದರಲ್ಲಿ ಸ್ವತಃ ಪ್ರೇಮಾನಂದ ಜಿ ಮಹಾರಾಜ್ ಅವರು ತಮ್ಮ ಆರ್ಥಿಕ ಸ್ಥಿತಿಯ ಕುರಿತು ಸ್ಪಷ್ಟನೆ ನೀಡಿದ್ದರು.
ವರದಿಗಳ ಪ್ರಕಾರ, ಪ್ರೇಮಾನಂದ ಜಿ ಮಹಾರಾಜ್ ಅವರು ತಮಗೆ ಯಾವುದೇ ಸ್ವಂತ ಆಸ್ತಿ-ಪಾಸ್ತಿಗಳಿಲ್ಲ ಎಂಬುದನ್ನು ಮುಕ್ತವಾಗಿ ಹೇಳಿಕೊಂಡಿದ್ದಾರೆ. ಅವರ ಹೆಸರಿನಲ್ಲಿ ಯಾವುದೇ ಜಮೀನು, ಸ್ವಂತ ಮನೆ, ಫ್ಲ್ಯಾಟ್ ಅಥವಾ ಯಾವುದೇ ರೀತಿಯ ಸ್ಥಿರ ಆಸ್ತಿಗಳಿಲ್ಲ. ಅಷ್ಟೇ ಅಲ್ಲದೆ, ಪ್ರಸ್ತುತ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿ ಅವರ ಹೆಸರಿನಲ್ಲಿ ಯಾವುದೇ ಸಕ್ರಿಯ ಬ್ಯಾಂಕ್ ಖಾತೆಯೂ ಇಲ್ಲ. ತಮಗೆ ಯಾವುದೇ ರೀತಿಯ ಭೌತಿಕ ಆಸ್ತಿಗಳನ್ನು ಸಂಗ್ರಹಿಸುವ ಆಸೆಯಿಲ್ಲ ಎಂಬುದನ್ನು ಅವರು ತಮ್ಮ ಸನ್ಯಾಸತ್ವದ ಜೀವನದ ಮೂಲಕ ತೋರಿಸಿಕೊಟ್ಟಿದ್ದಾರೆ.
ತಮ್ಮ ದಿನನಿತ್ಯದ ಬದುಕಿನ ಬಗ್ಗೆ ಉದಾಹರಣೆ ನೀಡಿದ್ದ ಅವರು, ಯಾರಾದರೂ ತಕ್ಷಣವೇ ಬಂದು ₹10 ಕೇಳಿದರೂ ಕೊಡುವುದಕ್ಕೆ ತಮ್ಮ ಬಳಿ ಹಣವಿರುವುದಿಲ್ಲ ಎಂದು ತಿಳಿಸಿದ್ದರು. ಅವರು ಯಾವುದೇ ಹಣವನ್ನು ತಮ್ಮ ಬಳಿ ಇಟ್ಟುಕೊಳ್ಳುವುದಿಲ್ಲ, ಪ್ರತಿಯೊಂದೂ ಭಕ್ತರು ಮತ್ತು ಸೇವಾಕರ್ತರ ಮೂಲಕವೇ ನಿರ್ವಹಣೆಯಾಗುತ್ತದೆ. ಪ್ರೇಮಾನಂದ ಜಿ ಮಹಾರಾಜ್ ಅವರು ಪ್ರಸ್ತುತ ತಮಗೆ ಸೇರಿದ ಸ್ವಂತ ಮನೆಯಲ್ಲಿ ವಾಸಿಸುತ್ತಿಲ್ಲ. ಬದಲಿಗೆ, ಅವರ ಭಕ್ತರೊಬ್ಬರಿಗೆ ಸೇರಿದ ಫ್ಲ್ಯಾಟ್‌ನಲ್ಲಿ ತಂಗಿದ್ದಾರೆ. ಅವರ ಆಹಾರ, ವಸತಿ ಹಾಗೂ ಅಲ್ಲಿನ ವಿದ್ಯುತ್ ಬಿಲ್ ಸೇರಿದಂತೆ ಮೂಲಭೂತ ವೆಚ್ಚಗಳನ್ನು ಅವರ ಸೇವಾಕರ್ತರೇ ನೋಡಿಕೊಳ್ಳುತ್ತಿದ್ದಾರೆ.
ಇನ್ನು ಪ್ರೇಮಾನಂದ ಜಿ ಮಹಾರಾಜ್ ಅವರು ಐಷಾರಾಮಿ ಆಡಿ ಕಾರಿನಲ್ಲಿ ಪ್ರಯಾಣಿಸುವುದು ಹಲವರ ಗಮನ ಸೆಳೆದಿತ್ತು ಮತ್ತು ಆ ಕಾರು ಅವರಿಗೆ ಸೇರಿದ್ದೇ ಎಂಬ ಪ್ರಶ್ನೆಗಳು ಎದ್ದಿದ್ದವು. ಈ ಕುರಿತು ಸ್ಪಷ್ಟನೆ ನೀಡಿರುವ ಅವರು, ಆ ಕಾರು ತಮ್ಮ ಸ್ವಂತದ್ದಲ್ಲ ಎಂದು ತಿಳಿಸಿದ್ದಾರೆ. ಆ ವಾಹನವು ಅವರ ಆಶ್ರಮದ ಕಾರ್ಯಕರ್ತರು ಹಾಗೂ ಸೇವಕರಿಗೆ ಸೇರಿದ್ದು, ಅವರ ಸುರಕ್ಷಿತ ಪ್ರಯಾಣದ ಅನುಕೂಲಕ್ಕಾಗಿ ಬಳಕೆಯಾಗುತ್ತಿದೆ.
