ಆಫೀಸ್ ಸಹೋದ್ಯೋಗಿಗಳನ್ನು ಗೃಹ ಪ್ರವೇಶ ಕಾರ್ಯಕ್ರಮಕ್ಕೆ ಕರೆದ ವ್ಯಕ್ತಿಯೊಬ್ಬರ ದಾಂಪತ್ಯ ಜೀವನದಲ್ಲೇ ಬಿರುಕು ಮೂಡಿ, ಕೊನೆಗೆ ಪ್ರಕರಣ ಕೋರ್ಟ್-ಪೊಲೀಸ್ ಠಾಣೆ ಮೆಟ್ಟಿಲೇರಿದ ವಿಚಿತ್ರ ಹಾಗೂ ಆಘಾತಕಾರಿ ಘಟನೆಯೊಂದು ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಸಹೋದ್ಯೋಗಿಯ ಕಹಿ ಅನುಭವ ಬಿಚ್ಚಿಟ್ಟ ಪೋಸ್ಟ್
ಸಾಮಾಜಿಕ ಜಾಲತಾಣ ‘ಎಕ್ಸ್’ (ಟ್ವಿಟ್ಟರ್) ಬಳಕೆದಾರ ಗೌರವ್ ತೋಮರ್ ಎಂಬುವವರು ಈ ಸತ್ಯ ಘಟನೆಯನ್ನು ಹಂಚಿಕೊಂಡಿದ್ದಾರೆ. ಗೌರವ್ ಅವರ ಕಚೇರಿಯ ಸಹೋದ್ಯೋಗಿಯೊಬ್ಬರು ಸಣ್ಣ ವಯಸ್ಸಿನಲ್ಲೇ ಸ್ವಂತ ಮನೆ ಖರೀದಿಸಿ, ಆ ಸಂತೋಷವನ್ನು ಆಚರಿಸಲು ಕಚೇರಿಯ ಗಂಡು ಮತ್ತು ಹೆಣ್ಣು ಸಹೋದ್ಯೋಗಿಗಳಿಗೆ ಮನೆ ಉದ್ಘಾಟನಾ ಸಮಾರಂಭಕ್ಕೆ ಆಹ್ವಾನ ನೀಡಿದ್ದರು. ಪಾರ್ಟಿ ಸಮಯದಲ್ಲಿ ಬಂದಿದ್ದ ಕೆಲವು ಯುವತಿಯರು ಆ ವ್ಯಕ್ತಿಯ ಪತ್ನಿಯೊಂದಿಗೆ ಮಾತನಾಡುವಾಗ, “ನೀವು ಅಡುಗೆಯನ್ನು ತುಂಬಾ ಚೆನ್ನಾಗಿ ಮಾಡುತ್ತೀರಿ” ಹಾಗೂ “ಪಾಪ, ನಿಮ್ಮ ಗಂಡ ಆಫೀಸ್‌ನಲ್ಲಿ ಯಾವಾಗಲೂ ಅಷ್ಟಾಗಿ ಸಂತೋಷವಾಗಿರುವುದಿಲ್ಲ” ಎಂದು ತಮಾಷೆಯಾಗಿ ಹೇಳಿದ್ದರು.
ಪಾರ್ಟಿ ಮುಗಿದ ನಂತರ ಆರಂಭವಾಯ್ತು ಹೈಡ್ರಾಮಾ
ವಾರಾಂತ್ಯದ ನಂತರ ಗೌರವ್ ಕಚೇರಿಗೆ ಬಂದಾಗ ಆ ಸಹೋದ್ಯೋಗಿ ಕೆಲಸಕ್ಕೆ ಬಂದಿರಲಿಲ್ಲ. ಗೌರವ್ ಆತನಿಗೆ ಕರೆ ಮಾಡಿದಾಗ, ಆ ಸಹೋದ್ಯೋಗಿ ತನಗೆ ಜಾಮೀನು (Bail) ನೀಡಲು ಗ್ಯಾರಂಟರ್ ಆಗಿ ಬರಲು ಸಾಧ್ಯವೇ ಎಂದು ವಿನಂತಿಸಿಕೊಂಡಿದ್ದಾರೆ. ವಿಚಾರಿಸಿದಾಗ, ಅಂದು ಮನೆಗೆ ಬಂದಿದ್ದ ಯುವತಿಯರು ತಮಾಷೆಯಾಗಿ ಹೇಳಿದ ಮಾತುಗಳನ್ನು ಗಂಭೀರವಾಗಿ ತೆಗೆದುಕೊಂಡ ಪತ್ನಿ ಮತ್ತು ಆಕೆಯ ಕುಟುಂಬಸ್ಥರು ಆತನೊಂದಿಗೆ ತೀವ್ರ ಜಗಳ ತೆಗೆದು, ಕೊನೆಗೆ ಆತನ ವಿರುದ್ಧ ಪೊಲೀಸರಿಗೆ ದೂರು (FIR) ನೀಡಿದ್ದರು.
ಬಾಡಿಗೆ ಮನೆಯಲ್ಲಿ ವಾಸ, ಕೈಯಿಂದ ಎಂಐ ಪಾವತಿ
ಅನೇಕ ವರ್ಷಗಳ ಕಾಲ ಕಷ್ಟಪಟ್ಟು ಕಟ್ಟಿದ ಸ್ವಂತ ಮನೆಯಿಂದಲೇ ಆ ವ್ಯಕ್ತಿ ಹೊರಬರಬೇಕಾಯಿತು. ಪ್ರಸ್ತುತ ಅವರು ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದು, ಸ್ವಂತ ಮನೆಯ ಇಎಮ್‌ಐ (EMI) ಹಾಗೂ ಕೋರ್ಟ್ ಕೇಸಿನ ವೆಚ್ಚಗಳನ್ನು ತಾವೇ ಭರಿಸುತ್ತಿದ್ದಾರೆ. “ನಿಮ್ಮ ಶಾಂತಿಯುತ ಮನೆಗೆ ಆಫೀಸ್ ಜನರನ್ನು ಕರೆಯಬೇಡಿ” ಎಂದು ಗೌರವ್ ಜನರಿಗೆ ಎಚ್ಚರಿಕೆಯ ಸಲಹೆ ನೀಡಿದ್ದಾರೆ.
ಈ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ವೃತ್ತಿಜೀವನ (Professional life) ಮತ್ತು ವೈಯಕ್ತಿಕ ಜೀವನದ (Personal life) ನಡುವೆ ಸೂಕ್ತ ಗಡಿ ಇರಬೇಕು ಎಂದು ಹಲವು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ.
