ಭಾರತದ ಪ್ರಸಿದ್ಧ ಯೂಟ್ಯೂಬರ್ ಅರುಣ್ ಪನ್ವಾರ್ ಅವರು ತಮ್ಮ ಮದುವೆಯಲ್ಲಿ ಭಾರಿ ಪ್ರಮಾಣದ ನಗದು ಮತ್ತು ಚಿನ್ನಾಭರಣಗಳನ್ನು ಸ್ವೀಕರಿಸಿರುವ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವಿವಾದಕ್ಕೆ ನಾಂದಿ ಹಾಡಿದೆ. ಸುಮಾರು 2.4 ಮಿಲಿಯನ್ ಚಂದಾದಾರರನ್ನು ಹೊಂದಿರುವ ಪನ್ವಾರ್, ಮದುವೆಯ ಸಂದರ್ಭದಲ್ಲಿ 71 ಲಕ್ಷ ರೂಪಾಯಿ ನಗದು ಮತ್ತು 21 ತೊಲ ಚಿನ್ನವನ್ನು ‘ದಾನ’ದ ಹೆಸರಿನಲ್ಲಿ ಪಡೆದಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.
2025ರ ಅಂತ್ಯದ ವೇಳೆಗೆ ನಡೆದ ಈ ಮದುವೆಯ ವಿಡಿಯೋಗಳು ಈಗ ವೈರಲ್ ಆಗುತ್ತಿದ್ದು, ಇದನ್ನು 1961ರ ವರದಕ್ಷಿಣೆ ನಿಷೇಧ ಕಾಯ್ದೆಯಡಿ ಬರುವ ಸ್ಪಷ್ಟ ವರದಕ್ಷಿಣೆ ಪ್ರಕರಣ ಎಂದು ಅನೇಕರು ಟೀಕಿಸುತ್ತಿದ್ದಾರೆ. ಪ್ರತಿ ತಿಂಗಳು ಸುಮಾರು 20 ರಿಂದ 25 ಲಕ್ಷ ರೂಪಾಯಿ ಆದಾಯ ಹೊಂದಿರುವ ಅರುಣ್ ಪನ್ವಾರ್ಗೆ ಇಷ್ಟು ದೊಡ್ಡ ಮೊತ್ತದ ಹಣವನ್ನು ಪಡೆಯುವ ಅಗತ್ಯವೇನಿತ್ತು ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ.
ವರದಕ್ಷಿಣೆಯನ್ನು ‘ದಾನ’ ಅಥವಾ ‘ಉಡುಗೊರೆ’ ಎಂದು ಮರುನಾಮಕರಣ ಮಾಡುವುದು ಸಮಾಜದಲ್ಲಿ ಕಾನೂನಿನಿಂದ ತಪ್ಪಿಸಿಕೊಳ್ಳಲು ಕಂಡುಕೊಂಡಿರುವ ಒಂದು ತಂತ್ರವಾಗಿದೆ ಎಂದು ಅನೇಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “2026ರಲ್ಲೂ ಇಂತಹ ಸಾಮಾಜಿಕ ಪಿಡುಗು ಜೀವಂತವಾಗಿರುವುದು ದುರದೃಷ್ಟಕರ. ಇಂತಹ ಶ್ರೀಮಂತರು ಮಾಡುವ ಕೆಲಸಗಳನ್ನು ನೋಡಿ ಕೆಳವರ್ಗದ ಜನರು ಕೂಡ ಇದನ್ನೇ ಅನುಸರಿಸುತ್ತಾರೆ,” ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬಳಕೆದಾರರು ಕಾಮೆಂಟ್ ಮಾಡುತ್ತಿದ್ದಾರೆ.
ಇನ್ನು ಕೆಲವರು ಈ ಪ್ರಕರಣದಲ್ಲಿ ವಧುವಿನ ಶಿಕ್ಷಣದ ಬಗ್ಗೆಯೂ ಬೇಸರ ವ್ಯಕ್ತಪಡಿಸಿದ್ದಾರೆ. “ಅರುಣ್ ಪನ್ವಾರ್ ಪತ್ನಿ ಒಬ್ಬ ನುರಿತ ಶಸ್ತ್ರಚಿಕಿತ್ಸಕಿ (Surgeon). ಇಷ್ಟು ಸುಶಿಕ್ಷಿತರಾದವರೇ ಇಂತಹ ಅನಿಷ್ಟ ಪದ್ಧತಿಗಳಿಗೆ ಬೆಂಬಲ ನೀಡಿದರೆ ಸಮಾಜಕ್ಕೆ ಯಾವ ಸಂದೇಶ ಹೋಗುತ್ತದೆ?” ಎಂದು ಬಳಕೆದಾರರೊಬ್ಬರು ಪ್ರಶ್ನಿಸಿದ್ದಾರೆ. ಅಷ್ಟೇ ಅಲ್ಲದೆ, ವರದಕ್ಷಿಣೆ ಪಡೆಯುವುದು ಅಪರಾಧವಾಗಿದ್ದರೂ ಇವರ ಮೇಲೆ ಇನ್ನೂ ಯಾಕೆ ಕ್ರಮ ಕೈಗೊಂಡಿಲ್ಲ ಎಂದು ಅನೇಕರು ಪೊಲೀಸರನ್ನು ಪ್ರಶ್ನಿಸುತ್ತಿದ್ದಾರೆ.
ಸದ್ಯ ಈ ವಿವಾದದ ಕುರಿತು ಅರುಣ್ ಪನ್ವಾರ್ ಯಾವುದೇ ಅಧಿಕೃತ ಹೇಳಿಕೆಯನ್ನು ನೀಡಿಲ್ಲ. ಆದರೆ, ಹಣ ಮತ್ತು ಚಿನ್ನವನ್ನು ಪ್ರದರ್ಶಿಸುತ್ತಿರುವ ಈ ವಿಡಿಯೋ ಮಾತ್ರ ಅಂತರ್ಜಾಲದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
https://twitter.com/beingsumit01/status/2017526402753647001?ref_src=twsrc%5Etfw
