ಅದು ಪ್ರೀತಿಗಾಗಿ ಜಾತಿ ಧರ್ಮದ ಗೋಡೆಗಳನ್ನು ಮೀರಿ ಒಂದಾದ ಜೋಡಿ. ಆದರೆ, ಕೇವಲ ಮೂರೇ ವರ್ಷಗಳಲ್ಲಿ ಆ ಪ್ರೇಮಕಥೆ ಆಸ್ತಿಯ ವ್ಯಾಮೋಹಕ್ಕೆ ಬಲಿಯಾಯಿತು. ಇದು ಹಿಮಿ ಶರ್ಮಾ ಎಂಬ ಧೀರ ಮಹಿಳೆಯ ಕಣ್ಣೀರಿನ ಕಥೆ ಮಾತ್ರವಲ್ಲ, ಶೂನ್ಯದಿಂದ ಸಾಮ್ರಾಜ್ಯ ಕಟ್ಟಿದ ವಿಜಯಗಾಥೆ ಕೂಡ ಹೌದು.
ಪ್ರೀತಿ ವರ್ಸಸ್ 3 ಕೋಟಿ ಆಸ್ತಿ: ಪತಿಯ ಅಘಾತಕಾರಿ ಆಯ್ಕೆ
2005ರಲ್ಲಿ MBA ಓದುವಾಗ ಹಿಮಿ ಅವರಿಗೆ ಪತಿಯ ಭೇಟಿಯಾಗಿತ್ತು. ಮನೆಯವರ ವಿರೋಧವಿದ್ದರೂ ಮದುವೆಯಾದರು. ಆದರೆ 2010ರಲ್ಲಿ ಪತಿಯ ತಾಯಿ ಒಂದು ಕಠಿಣ ಷರತ್ತು ಹಾಕಿದರು: ಹೆಂಡತಿ ಬೇಕೋ ಅಥವಾ 3 ಕೋಟಿ ಆಸ್ತಿ ಬೇಕೋ? ದುರಂತವೆಂದರೆ ಆತ ಹೆಂಡತಿ ಮತ್ತು ಎರಡು ವರ್ಷದ ಹಸುಗೂಸನ್ನು ಬಿಟ್ಟು ಆಸ್ತಿಯನ್ನೇ ಆರಿಸಿಕೊಂಡ
₹5,000 ಸಂಬಳದಲ್ಲಿ ಬದುಕು ಕಟ್ಟುವ ಸವಾಲು
ಪತಿ ಕೈಬಿಟ್ಟಾಗ ಹಿಮಿ ಅವರ ಕೈಲಿದ್ದಿದ್ದು ಕೇವಲ 5,000 ರೂಪಾಯಿ ಸಂಬಳದ ಶಿಕ್ಷಕಿ ಕೆಲಸ. ಆ ಪುಟ್ಟ ಮೊತ್ತದಲ್ಲಿ ಮಗನ ಹೊಟ್ಟೆ ತುಂಬಿಸುವುದು ಅವರಿಗೆ ಅಸಾಧ್ಯದ ಮಾತಾಗಿತ್ತು.ಬಾಡಿಗೆ ಕಟ್ಟಲು ಸಾಧ್ಯವಾಗದೆ ಸಾಲ ಮಾಡಿದರು.
ಸ್ವಂತ ಮನೆಯಲ್ಲೇ ಬಾಡಿಗೆ: 30 ಸಾವಿರದ ಕೆಲಸ ಸಿಕ್ಕಾಗ ತಂದೆಯ ಮನೆಗೆ ಹೋದರೆ, ಅಲ್ಲಿಯೂ ಅವರ ತಂದೆ ತಿಂಗಳಿಗೆ 10,000 ರೂ. ಬಾಡಿಗೆ ಕೇಳಿದರು! ಸ್ವಂತ ಮನೆಯವರೇ ಅವರನ್ನು ಹೊರೆ ಎಂದು ನೋಡತೊಡಗಿದರು.
ಒಡವೆ ಅಡವಿಟ್ಟು ಮಗನ ಶಿಕ್ಷಣ
ಒಂದು ದಿನ ಮಗನ ಶಾಲೆಯಿಂದ ಫೀಸ್ ಕಟ್ಟದ ಕಾರಣ ಮಗನನ್ನು ಕ್ಲಾಸ್ನಲ್ಲಿ ಕೂರಿಸುವುದಿಲ್ಲ ಎಂಬ ಕರೆ ಬಂತು. ಆ ದಿನ ತನ್ನಲ್ಲಿದ್ದ ಅಲ್ಪಸ್ವಲ್ಪ ಒಡವೆಗಳನ್ನು ಅಡವಿಟ್ಟ ಹಿಮಿ ಮಗನ ಎದುರು ಕಣ್ಣೀರು ಹಾಕದೆ ಧೈರ್ಯ ತುಂಬಿದರು. ಸಮಾಜ ಅವರನ್ನು ಶುಭ ಕಾರ್ಯಗಳಿಂದ ದೂರವಿಟ್ಟರೂ ಅವರು ಮಾತ್ರ ಎದೆಗುಂದದೆ ರಾತ್ರಿ ಹಗಲು ದುಡಿದರು.
https://www.instagram.com/reel/DTxc7zqjcFO/?utm_source=ig_web_copy_link
ಕೆನಡಾ ಕನಸು: ಅಸಾಧ್ಯವೆಂದವರಿಗೆ ಸಿಕ್ಕ ಉತ್ತರ
ತನ್ನ ಮತ್ತು ಮಗನ ಭವಿಷ್ಯಕ್ಕಾಗಿ ಹಿಮಿ 2019ರಲ್ಲಿ ಒಂದು ಸಾಹಸ ಮಾಡಿದರು. ಕೇವಲ 2 ಲಕ್ಷ ರೂ. ಉಳಿತಾಯದೊಂದಿಗೆ ಕೆನಡಾ ವೀಸಾಕ್ಕೆ ಅರ್ಜಿ ಸಲ್ಲಿಸಿದರು. ನೀನು ಸೋಲುತ್ತೀಯಾ ಎಂದವರೇ ಹೆಚ್ಚು. ಆದರೆ ಕೆನಡಾಕ್ಕೆ ಹೋದ ಒಂದೇ ತಿಂಗಳಲ್ಲಿ ಕಾಲೇಜ್ ಪ್ರೊಫೆಸರ್ ಆಗಿ ನೇಮಕಗೊಂಡು ಎಲ್ಲರ ಬಾಯಿ ಮುಚ್ಚಿಸಿದರು.ಇಂದು ಹಿಮಿ ಶರ್ಮಾ ಕೇವಲ ಒಬ್ಬ ಮಹಿಳೆಯಲ್ಲ, ಬದಲಾಗಿ ಸಂಕಷ್ಟದಲ್ಲಿರುವ ಸಾವಿರಾರು ಹೆಣ್ಣುಮಕ್ಕಳಿಗೆ ಭರವಸೆಯ ಕಿರಣ. ಆಸ್ತಿಗಾಗಿ ಸಂಬಂಧ ಕಡಿದುಕೊಂಡವರಿಗೆ ಅವರ ಯಶಸ್ಸೇ ದೊಡ್ಡ ಉತ್ತರ.
