ಮಕ್ಕಳ ಮಾತುಗಳು ಯಾವಾಗಲೂ ಮುಗ್ಧ ಮತ್ತು ಮನರಂಜನೆಯಿಂದ ಕೂಡಿರುತ್ತವೆ. ಆದರೆ ಕೆಲವೊಮ್ಮೆ ಅವರು ಹೇಳುವ ಮಾತುಗಳು ನಗು ತರಿಸುವುದರ ಜೊತೆಗೆ ಆಲೋಚಿಸುವಂತೆಯೂ ಮಾಡುತ್ತವೆ. ಅಂತಹದ್ದೇ ಒಂದು ವಿಡಿಯೋ ಈಗ ಇಂಟರ್ನೆಟ್ನಲ್ಲಿ ಸದ್ದು ಮಾಡುತ್ತಿದೆ. ಸುಡುವ ಬಿಸಿಲಿನಲ್ಲಿ ಶಾಲೆಗೆ ಹೋಗಲು ಹರಸಾಹಸ ಪಡುತ್ತಿರುವ ಶಾಲಾ ಬಾಲಕನೊಬ್ಬ ತನ್ನ ಅಳಲನ್ನು ತೋಡಿಕೊಂಡಿದ್ದಾನೆ.
ವಿಡಿಯೋದಲ್ಲಿರುವ ಬಾಲಕ, “ಧಗಧಗಿಸುವ ಬಿಸಿಲಿನಲ್ಲಿ ನಾವು ಶಾಲೆಗೆ ಹೋಗಬೇಕಾಗುತ್ತದೆ. ತಲೆಯ ಮೇಲೆ ಸೂರ್ಯ ಬೆಂಕಿಯುಗುಳುತ್ತಿರುತ್ತಾನೆ, ನಾವು ಬೆವರುತ್ತೇವೆ. ಈ ಬಿಸಿಲಿನಿಂದಾಗಿ ಮಕ್ಕಳು ಕಾಯಿಲೆ ಬೀಳುತ್ತಿದ್ದಾರೆ, ದಯವಿಟ್ಟು ನಮ್ಮ ಮೇಲೆ ಸ್ವಲ್ಪ ಕರುಣೆ ತೋರಿಸಿ” ಎಂದು ಮನವಿ ಮಾಡಿದ್ದಾನೆ. ಅಷ್ಟಕ್ಕೇ ನಿಲ್ಲದ ಈ ಪುಟ್ಟ ಬಾಲಕ, “ನಾನು ಮುಂದೊಂದು ದಿನ ಈ ದೇಶದ ಪ್ರಧಾನಿಯಾದ ಮೇಲೆ, ಬೇಸಿಗೆಯಲ್ಲಿ ಮಕ್ಕಳು ಶಾಲೆಗೆ ಹೋಗುವುದನ್ನೇ ನಿಷೇಧಿಸುತ್ತೇನೆ” ಎಂದು ಭವಿಷ್ಯದ ತನ್ನ ಯೋಜನೆಯನ್ನು ಹಂಚಿಕೊಂಡಿದ್ದಾನೆ.
ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆ ಸಾವಿರಾರು ಜನರು ಕಮೆಂಟ್ ಮಾಡಿದ್ದಾರೆ. ಕೆಲವರು ಬಾಲಕನ ಆತ್ಮವಿಶ್ವಾಸವನ್ನು ಮೆಚ್ಚಿಕೊಂಡಿದ್ದರೆ, ಇನ್ನು ಕೆಲವರು “ಮುಂದಿನ ಪ್ರಧಾನಿ ನೀನೇ ಆಗು, ನಮ್ಮ ವೋಟ್ ನಿನಗೇ” ಎಂದು ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದಾರೆ. ಇನ್ನು ಕೆಲವು ನೆಟ್ಟಿಗರು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಟ್ಯಾಗ್ ಮಾಡಿ “ಮೋದಿ ಜಿ, ಈ ಬಾಲಕನ ಮಾತು ಕೇಳಿ ಸ್ವಲ್ಪ ದಯೆ ತೋರಿಸಿ” ಎಂದು ಕಾಲೆಳೆದಿದ್ದಾರೆ.
ಈ ವಿಡಿಯೋ ಎಐ (AI) ತಂತ್ರಜ್ಞಾನ ಬಳಸಿ ಮಾಡಲಾಗಿದೆಯೇ ಎಂಬ ಚರ್ಚೆಯೂ ನಡೆದಿದೆ. ಆದರೂ ಬಾಲಕನ ಮಾತುಗಳು ಸದ್ಯದ ಬಿಸಿಲಿನ ಬೇಗೆಯಿಂದ ಕಂಗೆಟ್ಟಿರುವ ಶಾಲಾ ಮಕ್ಕಳ ನಿಜವಾದ ಪರಿಸ್ಥಿತಿಯನ್ನು ಪ್ರತಿಬಿಂಬಿಸುತ್ತಿವೆ.
