ನವದೆಹಲಿ: ನೀವು ವಾಟ್ಸಾಪ್‌ನಲ್ಲಿ ಯಾರಿಗಾದರೂ ಪಾಸ್‌ವರ್ಡ್ ಬ್ಯಾಂಕ್ ಓಟಿಪಿ ಅಥವಾ ಖಾಸಗಿ ಫೋಟೋಗಳನ್ನು ಕಳುಹಿಸಿ ಆಮೇಲೆ ಡಿಲೀಟ್ ಮಾಡಲು ಮರೆತುಹೋಗುತ್ತೀರಾ? ಇನ್ಮುಂದೆ ಆ ಚಿಂತೆ ಬೇಡ ಮೆಟಾ ಒಡೆತನದ ವಾಟ್ಸಾಪ್ ಬಳಕೆದಾರರ ಸುರಕ್ಷತೆಗಾಗಿ ‘ಆಫ್ಟರ್ ರೀಡಿಂಗ್’ (After Reading) ಎಂಬ ಅದ್ಭುತ ಫೀಚರ್ ಪರಿಚಯಿಸಲು ಸಜ್ಜಾಗಿದೆ.
ಏನಿದು ಹೊಸ ಫೀಚರ್?
ಈಗಾಗಲೇ ವಾಟ್ಸಾಪ್‌ನಲ್ಲಿ ಸಂದೇಶಗಳು ಅದೃಶ್ಯವಾಗುವ (Disappearing Messages) ಆಯ್ಕೆ ಇದೆ. ಆದರೆ ಅದರಲ್ಲಿ ಕನಿಷ್ಠ 24 ಗಂಟೆಗಳ ಕಾಲ ಸಂದೇಶಗಳು ಚಾಟ್ ಬಾಕ್ಸ್‌ನಲ್ಲಿ ಇರುತ್ತವೆ. ಈಗ ಬರಲಿರುವ ಹೊಸ ಅಪ್‌ಡೇಟ್‌ನಲ್ಲಿ ಕೇವಲ 15 ನಿಮಿಷದ ಆಯ್ಕೆಯನ್ನು ನೀಡಲಾಗುತ್ತಿದೆ. ಅಂದರೆ, ನೀವು ಕಳುಹಿಸಿದ ಸಂದೇಶವನ್ನು ಎದುರಿನ ವ್ಯಕ್ತಿ ಓದಿದ ಕೇವಲ 15 ನಿಮಿಷದಲ್ಲಿ ಅದು ತನ್ನಷ್ಟಕ್ಕೆ ತಾನೇ ಡಿಲೀಟ್ ಆಗುತ್ತದೆ
ಇದು ಹೇಗೆ ಕೆಲಸ ಮಾಡುತ್ತದೆ?
15 ನಿಮಿಷದ ಕೌಂಟ್‌ಡೌನ್: ವರದಿಯ ಪ್ರಕಾರ ಈ ಫೀಚರ್ ಆನ್ ಮಾಡಿದ್ದರೆ, ಸಂದೇಶವನ್ನು ಸ್ವೀಕರಿಸುವವರು ಅದನ್ನು ಓದಿದ (Open ಮಾಡಿದ) ತಕ್ಷಣ 15 ನಿಮಿಷದ ಟೈಮರ್ ಆರಂಭವಾಗುತ್ತದೆ. ಆ ಸಮಯ ಮುಗಿದೊಡನೆ ಸಂದೇಶವು ಕಳುಹಿಸಿದವರು ಮತ್ತು ಸ್ವೀಕರಿಸಿದವರು ಇಬ್ಬರ ಚಾಟ್‌ನಿಂದಲೂ ಮಾಯವಾಗುತ್ತದೆ.
ಓದದಿದ್ದರೆ 24 ಗಂಟೆ ಕಾಲಾವಕಾಶ: ಒಂದು ವೇಳೆ ಸಂದೇಶವನ್ನು ಯಾರೂ ಓದದಿದ್ದರೆ ಅದು ಗರಿಷ್ಠ 24 ಗಂಟೆಗಳ ಕಾಲ ಚಾಟ್‌ನಲ್ಲಿರುತ್ತದೆ. ನಂತರ ತಾನಾಗಿಯೇ ಎಕ್ಸ್‌ಪೈರ್ (Expire) ಆಗುತ್ತದೆ.
ರೀಡ್ ರಸೀಪ್ಟ್ (Read Receipts) ಆಫ್ ಇದ್ದರೂ ಕೆಲಸ ಮಾಡುತ್ತೆ: ನಿಮ್ಮ ಫೋನ್‌ನಲ್ಲಿ ಬ್ಲೂ ಟಿಕ್ ಆಫ್ ಆಗಿದ್ದರೂ ಸಹ, ಈ ಫೀಚರ್ ಕೆಲಸ ಮಾಡುತ್ತದೆ. ಸಂದೇಶ ಓದಿದ ಸಮಯವನ್ನು ವಾಟ್ಸಾಪ್ ಸ್ವಯಂಚಾಲಿತವಾಗಿ ಪತ್ತೆಹಚ್ಚಿ 15 ನಿಮಿಷದ ಟೈಮರ್ ಅನ್ನು ಪ್ರಾರಂಭಿಸುತ್ತದೆ.
ಯಾರಿಗೆ ಇದು ಹೆಚ್ಚು ಪ್ರಯೋಜನಕಾರಿ?
ಈ ವೈಶಿಷ್ಟ್ಯವು ವಿಶೇಷವಾಗಿ ಸೂಕ್ಷ್ಮ ಮತ್ತು ಖಾಸಗಿ ಮಾಹಿತಿಗಳನ್ನು ಹಂಚಿಕೊಳ್ಳುವವರಿಗೆ ವರದಾನವಾಗಲಿದೆ:
ಬ್ಯಾಂಕ್ OTPs ಮತ್ತು ಪಾಸ್‌ವರ್ಡ್‌ಗಳು.
ಮನೆಯ ಅಥವಾ ಕಚೇರಿಯ ವಿಳಾಸಗಳು.
ವೆರಿಫಿಕೇಶನ್ ಕೋಡ್‌ಗಳು
ಪ್ರಸ್ತುತ ವಾಟ್ಸಾಪ್‌ನಲ್ಲಿ ಡಿಸ್‌ಅಪಿಯರಿಂಗ್ ಮೆಸೇಜ್ (Disappearing Messages) ಆಯ್ಕೆ ಇದ್ದರೂ, ಅದರಲ್ಲಿ ಕನಿಷ್ಠ 24 ಗಂಟೆಗಳ ಕಾಲ ಸಂದೇಶಗಳು ಉಳಿಯುತ್ತವೆ. ಆದರೆ ಈ ಹೊಸ ಆಫ್ಟರ್ ರೀಡಿಂಗ್ ಫೀಚರ್ ಅತ್ಯಂತ ವೇಗವಾಗಿ ಅಂದರೆ ಓದಿದ ಕೆಲವೇ ನಿಮಿಷಗಳಲ್ಲಿ ಸಂದೇಶವನ್ನು ಡಿಲೀಟ್ ಮಾಡುತ್ತದೆ. ಇದು ಈಗಾಗಲೇ ಚಾಲ್ತಿಯಲ್ಲಿರುವ ವ್ಯೂ ಒನ್ಸ್ (View Once) ಫೋಟೋ ಮತ್ತು ವಿಡಿಯೋ ಫೀಚರ್‌ನಂತೆಯೇ ಪಠ್ಯ ಸಂದೇಶಗಳಿಗೂ (Text Messages) ಅನ್ವಯವಾಗಲಿದೆ.
