ನಿನ್ನೆ ( ಆಗಸ್ಟ್ 22 ) ಹೈದರಾಬಾದ್‌ನ ಮಲ್ಲಾರೆಡ್ಡಿ ಕಾಲೇಜು ಮೈದಾನದಲ್ಲಿ ಟಾಕ್ಸಿಕ್ ಚಿತ್ರದ ಪ್ರಿ ರಿಲೀಸ್ ಇವೆಂಟ್ ಬೃಹತ್ ಮಟ್ಟದಲ್ಲಿ ನಡೆಯಿತು. ಒಂದೆಡೆ ಚಿತ್ರದ ಮುಂಗಡ ಟಿಕೆಟ್ ಮಾರಾಟ ಆರಂಭವಾಗಿ ಭರ್ಜರಿ ಗಳಿಕೆಯಾಗುತ್ತಿದ್ದು, ಈ ವೇಳೆ ಚಿತ್ರದ ಹೈಪ್ ಹೆಚ್ಚಿಸಲು ಚಿತ್ರತಂಡ ಮಾಡಿದ ಈ ಕಾರ್ಯಕ್ರಮ ಸಕ್ಸಸ್ ಕಂಡಿದೆ.
ಸಾಮಾಜಿಕ ಜಾಲತಾಣದಲ್ಲಿ ಈ ಕಾರ್ಯಕ್ರಮದ ಕ್ಲಿಪ್‌ಗಳು ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ತೆಲುಗು ಮಂದಿ ಟಾಕ್ಸಿಕ್ ಚಿತ್ರದ ಕುರಿತು ಇನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ಚರ್ಚಿಸಲು ಆರಂಭಿಸಿದ್ದಾರೆ.
ಈ ಕಾರ್ಯಕ್ರಮದಲ್ಲಿ ಹೆಚ್ಚು ಸಮಯದ ಕಾಲ ಮಾತನಾಡಿದ ಯಶ್ ತೆಲುಗಿನಲ್ಲೇ ಮಾತನಾಡಿದ್ದು ತೆಲುಗು ಮಂದಿಗೆ ಇಷ್ಟವಾಗಿ ಥೇಟ್ ತೆಲುಗು ನಟರ ಹಾಗೆ ಸರಾಗವಾಗಿ ತೆಲುಗು ಮಾತನಾಡುತ್ತಾರೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಇನ್ನು ಯಶ್‌ಗೆ ನಿರೂಪಕಿ ತೆಲುಗು ಚಿತ್ರಗಳ ಬಗ್ಗೆ ಸಹ ಪ್ರಶ್ನೆ ಕೇಳಿದ್ದು, ಯಾವ ಚಿತ್ರಗಳು ಫೇವರಿಟ್ ಎಂದು ಕೇಳಿದರು. ಈ ಪ್ರಶ್ನೆಗೆ ಉತ್ತರಿಸಿದ ಯಶ್ ತಮಗೆ ಇಷ್ಟವಾದ ತೆಲುಗು ಚಿತ್ರಗಳು ತುಂಬಾ ಇವೆ ಎಂದರು. ಹಾಗೂ ‘ಕರ್ನಾಟಕದಲ್ಲಿ ನಾವು ತೆಲುಗು ಚಿತ್ರಗಳನ್ನು ಪ್ರೀತಿಸುತ್ತೇವೆ, ನಾವು ಯಾವಾಗಲೂ ತೆಲುಗು ಚಿತ್ರಗಳನ್ನು ಬೆಂಬಲಿಸುತ್ತಾ ಬಂದಿದ್ದೇವೆ. ಬಾಹುಬಲಿಯಾಗಲಿ, ಪೋಕಿರಿಯಾಗಲಿ, ಒಜಿ, ಮಗಧೀರ ಹೀಗೆ ಹಲವಾರು ಚಿತ್ರಗಳು ನನಗಿಷ್ಟ. ಇತ್ತೀಚೆಗೆ ಬಿಡುಗಡೆಯಾದ ಪುಷ್ಪ ಕೂಡ ಇಷ್ಟ, ಹಾಗೆಯೇ ಕಿಕ್ ಚಿತ್ರ ಸಹ ನನ್ನ ಫೇವರಿಟ್’ ಎಂದು ಆರು ಚಿತ್ರಗಳನ್ನು ಉಲ್ಲೇಖಿಸಿದರು.
