ದುಬೈ: ಗ್ಲಾಮರ್ ಮತ್ತು ಐಷಾರಾಮಿ ಜೀವನಕ್ಕೆ ಹೆಸರಾದ ದುಬೈ ಈಗ ಯುದ್ಧದ ಭೀತಿಯಲ್ಲಿದೆ. ಇರಾನ್ ನಡೆಸಿದ ಸರಣಿ ಡ್ರೋನ್ ಮತ್ತು ಕ್ಷಿಪಣಿ ದಾಳಿಗಳಿಂದಾಗಿ ಸಂಯುಕ್ತ ಅರಬ್ ಎಮಿರೇಟ್ಸ್ (ಯುಎಇ) ತತ್ತರಿಸಿದ್ದು, ಇಲ್ಲಿರುವ ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಗಳು ಮತ್ತು ಉದ್ಯಮಿಗಳು ಹೇಗಾದರೂ ಮಾಡಿ ನಗರದಿಂದ ಹೊರಬರಲು ಹರಸಾಹಸ ಪಡುತ್ತಿದ್ದಾರೆ. ದುಬೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸೇರಿದಂತೆ ಪ್ರಮುಖ ಸಾರಿಗೆ ಸಂಪರ್ಕಗಳು ಕಡಿತಗೊಂಡಿರುವ ಹಿನ್ನೆಲೆಯಲ್ಲಿ, ಶ್ರೀಮಂತರು ಕೋಟಿಗಟ್ಟಲೆ ಹಣ ಸುರಿದು ಖಾಸಗಿ ವಿಮಾನಗಳ ಮೊರೆ ಹೋಗುತ್ತಿದ್ದಾರೆ.
ವರದಿಗಳ ಪ್ರಕಾರ, ದುಬೈನಿಂದ ಸುರಕ್ಷಿತವಾಗಿ ಹೊರಬರಲು ಒಂದು ಪ್ರೈವೇಟ್ ಜೆಟ್ ಬಾಡಿಗೆಗೆ ಬರೋಬ್ಬರಿ 3.2 ಕೋಟಿ ರೂಪಾಯಿ (ಸುಮಾರು 3,50,000 ಡಾಲರ್) ವರೆಗೆ ದರ ಏರಿಕೆಯಾಗಿದೆ. ಇಷ್ಟೊಂದು ಹಣ ನೀಡಲು ಸಿದ್ಧವಿದ್ದರೂ ವಿಮಾನಗಳ ಲಭ್ಯತೆ ಇಲ್ಲದಂತಾಗಿದೆ. ಹೀಗಾಗಿ ಅನೇಕ ಗಣ್ಯರು ದುಬೈನಿಂದ ಸೌದಿ ಅರೇಬಿಯಾದ ರಿಯಾದ್ಗೆ 10 ಗಂಟೆಗಳ ಕಾಲ ರಸ್ತೆಯ ಮೂಲಕ ಪ್ರಯಾಣಿಸಿ, ಅಲ್ಲಿಂದ ಯುರೋಪ್ ಅಥವಾ ಇತರ ಸುರಕ್ಷಿತ ದೇಶಗಳಿಗೆ ತೆರಳುತ್ತಿದ್ದಾರೆ.
ದಾಳಿಯ ತೀವ್ರತೆ ಎಷ್ಟಿದೆ ಎಂದರೆ, ದುಬೈನ ಐಕಾನಿಕ್ ಕಟ್ಟಡಗಳಾದ ಬುರ್ಜ್ ಅಲ್ ಅರಬ್ ಮತ್ತು ಪಾಮ್ ಜುಮೇರಾ ಸಮೀಪವೂ ಸ್ಫೋಟಗಳು ಸಂಭವಿಸಿವೆ. ವಿಶ್ವದ ಅತ್ಯಂತ ಬ್ಯುಸಿ ವಿಮಾನ ನಿಲ್ದಾಣಗಳಲ್ಲಿ ಒಂದಾದ ದುಬೈ ಏರ್ಪೋರ್ಟ್ನ ರನ್ವೇ ಮತ್ತು ಟರ್ಮಿನಲ್ಗಳಿಗೆ ಹಾನಿಯಾಗಿದ್ದು, ವಿಮಾನ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿದೆ. ಈ ಅನಿಶ್ಚಿತತೆಯ ನಡುವೆ ಜಾಗತಿಕ ಹಣಕಾಸು ಸಂಸ್ಥೆಗಳ ಮುಖ್ಯಸ್ಥರು ಮತ್ತು ಪ್ರವಾಸಿಗರು ಪ್ರಾಣಭಯದಿಂದ ತತ್ತರಿಸಿದ್ದು, ಸೌದಿ ಅರೇಬಿಯಾವನ್ನು ಏಕೈಕ ಸುರಕ್ಷಿತ ನಿರ್ಗಮನ ಮಾರ್ಗವಾಗಿ ಬಳಸಿಕೊಳ್ಳುತ್ತಿದ್ದಾರೆ.
ದುಬೈ ಇದುವರೆಗೆ ಸುರಕ್ಷಿತ ತಾಣ ಎಂಬ ಹೆಸರಿತ್ತು. ಆದರೆ ಇರಾನ್ನ ಈ ದಿಢೀರ್ ದಾಳಿ ನಗರದ ಆ ನಂಬಿಕೆಯನ್ನು ಅಲುಗಾಡಿಸಿದೆ. ಸದ್ಯಕ್ಕೆ ರಿಯಾದ್ ವಿಮಾನ ನಿಲ್ದಾಣ ಮಾತ್ರ ಕಾರ್ಯನಿರ್ವಹಿಸುತ್ತಿದ್ದು, ಖಾಸಗಿ ಭದ್ರತಾ ಸಂಸ್ಥೆಗಳು ಎಸ್ಯುವಿ ಕಾರುಗಳ ಮೂಲಕ ಜನರನ್ನು ದುಬೈನಿಂದ ರಿಯಾದ್ಗೆ ಸಾಗಿಸುವ ಕೆಲಸದಲ್ಲಿ ನಿರತವಾಗಿವೆ. ಯುದ್ಧದ ಈ ಕಾರ್ಮೋಡ ದುಬೈನ ಪ್ರವಾಸೋದ್ಯಮ ಮತ್ತು ಆರ್ಥಿಕತೆಯ ಮೇಲೆ ದೊಡ್ಡ ಪೆಟ್ಟು ನೀಡುವ ಸಾಧ್ಯತೆ ದಟ್ಟವಾಗಿದೆ.
