ಭಾರತೀಯ ಮೂಲದ ಇಂಗ್ಲೆಂಡ್​ ಮಾಜಿ ಕ್ರಿಕೆಟಿಗ ನಿಧನ

ಇಂಗ್ಲೆಂಡ್​ ಮಾಜಿ ಆಟಗಾರ ಹಾಗೂ ನಿರೂಪಕ ರಾಬಿನ್​ ಜಾಕ್​ಮ್ಯಾನ್​ ತಮ್ಮ 75ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ‌

ಮೃತ ರಾಬಿನ್​ ಪತ್ನಿ ಯವೊನೆ ಹಾಗೂ ಇಬ್ಬರು ಪುತ್ರಿಯರನ್ನ ಅಗಲಿದ್ದಾರೆ.
ಶಿಮ್ಲಾದಲ್ಲಿ ಜನಿಸಿದ್ದ ಜಾಕ್​ಮನ್​​ 1974 ಹಾಗೂ 1983ರ ನಡುವಿನ ಅಂತಾರಾಷ್ಟ್ರೀಯ ಕ್ರಿಕೆಟ್​ ಲೋಕದಲ್ಲಿ ಇಂಗ್ಲೆಂಡ್​ ಪರ ಆಡಿ 33 ವಿಕೆಟ್​​ಗಳನ್ನ ಕಬಳಿಸಿದ್ದಾರೆ. 1966ರಿಂದ ಕ್ರಿಕೆಟ್​ ಜೀವನಕ್ಕೆ ಪದಾರ್ಪಣೆ ಮಾಡಿದ ಜಾಕ್​ಮನ್​ ಇಂಗ್ಲೆಂಡ್​ ಪರ ನಾಲ್ಕು ಟೆಸ್ಟ್ ಹಾಗೂ 15 ಏಕದಿನ ಪಂದ್ಯಗಳನ್ನಾಡಿದ್ದಾರೆ.

75ನೇ ವಯಸ್ಸಿಗೆ ನಿಧನರಾದ ನಿರೂಪಕ ಹಾಗೂ ಮಾಜಿ ಇಂಗ್ಲೆಂಡ್​ ಬೌಲರ್​ ರಾಬಿನ್​ ಜಾಕಮನ್​ ನಿಧನ ವಾರ್ತೆ ಕೇಳಿ ಬೇಸರವಾಗಿದೆ ಎಂದು ಅಂತಾರಾಷ್ಟ್ರೀಯ ಕ್ರಿಕೆಟ್​ ಮಂಡಳಿ ಅಧಿಕೃತ ಟ್ವಿಟರ್​ ಖಾತೆಯಲ್ಲಿ ಟ್ವೀಟ್​ ಮಾಡಿದೆ.

ನಿವೃತ್ತಿ ಬಳಿಕ ದಕ್ಷಿಣ ಆಫ್ರಿಕಾದಲ್ಲಿ ನೆಲೆಸಿದ್ದ ರಾಬಿನ್​​ ಗಂಟಲು ಕ್ಯಾನ್ಸರ್​ನಿಂದ ಬಳಲುತ್ತಿದ್ದರು. 2012ರಲ್ಲಿ ಜಾಕ್​ಮನ್​ ಎರಡು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು.