ಪದ್ಮ ಪ್ರಶಸ್ತಿಯನ್ನು ನಿರಾಕರಿಸಿದ್ದ ಗಾಯಕಿ ಎಸ್. ಜಾನಕಿ.! ಇಲ್ಲಿದೆ ಇಂಟರೆಸ್ಟಿಂಗ್ ವಿಚಾರ

ದೇಶದಲ್ಲಿ ಪದ್ಮ ನಾಗರಿಕ ಪ್ರಶಸ್ತಿಗಳಿಗೆ ಎಷ್ಟು ಗೌರವ ಮತ್ತು ಮನ್ನಣೆ ಇದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಈ ಪ್ರಶಸ್ತಿಗಾಗಿ ತಮ್ಮ ಜೀವನವಿಡೀ ತಪಸ್ಸು ಮಾಡುವವರು ಅನೇಕರಿದ್ದಾರೆ. ಪ್ರಶಸ್ತಿ ಲಭಿಸಿದಾಗ, ತಾವು ಜೀವನಪರ್ಯಂತ ಪಟ್ಟ ಕಷ್ಟಕ್ಕೆ ಮತ್ತು ತಮ್ಮ ವೃತ್ತಿಗೆ ದೊರೆತ ಅತ್ಯುನ್ನತ ಗೌರವ ಎಂದು ಭಾವಿಸುವವರೇ ಹೆಚ್ಚು.

ಆದರೆ, ಇಂತಹ ಪ್ರತಿಷ್ಠಿತ ಪ್ರಶಸ್ತಿ ಲಭಿಸಿದರೂ ಸಹ, ಅದನ್ನು ‘ಬೇಡ’ ಎಂದು ನಯವಾಗಿ ನಿರಾಕರಿಸಿದ ಅಪರೂಪದ ವ್ಯಕ್ತಿಗಳೂ ಇದ್ದಾರೆ. ಅವರಲ್ಲಿ ದಕ್ಷಿಣ ಭಾರತದ ದಂತಕಥೆ, ದಶಕಗಳ ಕಾಲ ಸಾವಿರಾರು ಹಾಡುಗಳ ಮೂಲಕ ಬಹುಭಾಷಾ ಅಭಿಮಾನಿಗಳನ್ನು ಸಂಪಾದಿಸಿರುವ ಗಾಯಕಿ ಎಸ್. ಜಾನಕಿ ಪ್ರಮುಖರು. ಅಷ್ಟಕ್ಕೂ ಅವರು ಆ ಪ್ರಶಸ್ತಿಯನ್ನು ಏಕೆ ನಿರಾಕರಿಸಿದರು ಎಂಬ ವಿಷಯ ಕುತೂಹಲಕಾರಿಯಾಗಿದೆ.

ಹನ್ನೆರಡು ವರ್ಷಗಳ ಹಿಂದಿನ ಘಟನೆ:

ಸರಿಯಾಗಿ 13 ವರ್ಷಗಳ ಹಿಂದೆ, ಅಂದರೆ 2013ರ ಗಣರಾಜ್ಯೋತ್ಸವದ ಸಂದರ್ಭದಲ್ಲಿ, ಕೇಂದ್ರ ಸರ್ಕಾರವು ಸುಪ್ರಸಿದ್ಧ ಗಾಯಕಿ ಎಸ್. ಜಾನಕಿ ಅವರಿಗೆ ‘ಪದ್ಮಭೂಷಣ’ ಪ್ರಶಸ್ತಿಯನ್ನು ಘೋಷಿಸಿತು. ಆ ವರ್ಷ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ 24 ಜನರಿಗೆ ಪದ್ಮಭೂಷಣ ಪ್ರಶಸ್ತಿ ಪ್ರಕಟಿಸಲಾಗಿತ್ತು, ಅದರಲ್ಲಿ ಕಲಾ ವಿಭಾಗದಿಂದ ಜಾನಕಿ ಅವರೂ ಆಯ್ಕೆಯಾಗಿದ್ದರು. ಆದರೆ, ತಮ್ಮ ಐದೂವರೆ ದಶಕಗಳ ಸುದೀರ್ಘ ಗಾಯನ ಪಯಣದಲ್ಲಿ ಈ ಗೌರವವು ಅತ್ಯಂತ ವಿಳಂಬವಾಗಿ ಬಂದಿದೆ ಎಂದು ಭಾವಿಸಿದ ಎಸ್. ಜಾನಕಿ, ಅದನ್ನು ಸ್ವೀಕರಿಸಲು ನಿರಾಕರಿಸಿದರು. ಇದು ಆ ಸಮಯದಲ್ಲಿ ದೇಶಾದ್ಯಂತ ದೊಡ್ಡ ಸಂಚಲನ ಮೂಡಿಸಿತ್ತು.

“ಅಭಿಮಾನಿಗಳ ಪ್ರೀತಿಯೇ ಸಾಕು”:

ಪ್ರಶಸ್ತಿ ಘೋಷಣೆಯಾದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ಜಾನಕಿ ಅವರು, “ನಾನು ಪದ್ಮಭೂಷಣ ಪ್ರಶಸ್ತಿಯನ್ನು ನಿರಾಕರಿಸುತ್ತಿದ್ದೇನೆ” ಎಂದು ಸ್ಪಷ್ಟವಾಗಿ ತಿಳಿಸಿದ್ದರು. ಕಳೆದ 55 ವರ್ಷಗಳಿಂದ ತಾವು ಹಾಡುತ್ತಿರುವುದನ್ನು ನೆನಪಿಸಿದ ಅವರು, ವಿವಿಧ ಭಾಷೆಗಳಲ್ಲಿ ತಮಗೆ ಅಪಾರ ಅಭಿಮಾನಿಗಳಿದ್ದಾರೆ, ಅವರ ಗುರುತಿಸುವಿಕೆ ಮತ್ತು ಪ್ರೀತಿಯನ್ನೇ ತಾವು ಅತ್ಯುನ್ನತ ಪುರಸ್ಕಾರ ಎಂದು ಭಾವಿಸುವುದಾಗಿ ಹೇಳಿದರು.

ಯಾರ ಮೇಲೂ ಸಿಟ್ಟಿಲ್ಲ:

ಕನ್ನಡ, ತೆಲುಗು, ತಮಿಳು, ಮಲಯಾಳಂ ಮತ್ತು ಹಿಂದಿ ಸೇರಿದಂತೆ ವಿವಿಧ ಭಾಷೆಗಳಲ್ಲಿ ಸುಮಾರು 20 ಸಾವಿರಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿರುವ ಜಾನಕಿ ಅವರು ಇಂದಿಗೂ ತಮ್ಮ ಮಾತಿಗೆ ಬದ್ಧರಾಗಿದ್ದಾರೆ. ತಮಗೆ ಸರ್ಕಾರದ ಮೇಲೆ ಯಾವುದೇ ಸಿಟ್ಟಿಲ್ಲ ಎಂದು ಅಂದು ಅವರು ಸ್ಪಷ್ಟಪಡಿಸಿದ್ದರು. ತಾವು ಹಾಡಿದ ವೈವಿಧ್ಯಮಯ ಹಾಡುಗಳನ್ನು ಜನರು ಮೆಚ್ಚಿಕೊಂಡಿದ್ದಾರೆ, ಆದ್ದರಿಂದ ಜನರ ಪ್ರೀತಿಯೇ ಮುಖ್ಯ ಎಂದಿದ್ದರು.

ಇತ್ತೀಚೆಗೆ ಯೂಟ್ಯೂಬ್ ಚಾನೆಲ್ ಒಂದಕ್ಕೆ ನೀಡಿದ ಸಂದರ್ಶನದಲ್ಲಿ ಖ್ಯಾತ ಸಂಗೀತ ನಿರ್ದೇಶಕ ಮಾಧವಪೆದ್ದಿ ಸುರೇಶ್ ಮಾತನಾಡಿ, “ಎಸ್. ಜಾನಕಿ ಅವರು ಪ್ರಶಸ್ತಿ ನಿರಾಕರಿಸಿದ್ದರ ಹಿಂದೆ ಯಾವುದೇ ದೊಡ್ಡ ಕಾರಣಗಳಿಲ್ಲ. ತಾವು ಈಗಾಗಲೇ ಜನರ ಅಭಿಮಾನದಿಂದ ಉನ್ನತ ಸ್ಥಾನದಲ್ಲಿದ್ದೇನೆ ಎಂದು ಅವರು ನಂಬಿದ್ದರು, ಹಾಗಾಗಿ ಬಹಳ ನಯವಾಗಿಯೇ ಅದನ್ನು ಬೇಡವೆಂದರು” ಎಂದು ತಿಳಿಸಿದ್ದಾರೆ.

ಅವರು 2016ರಲ್ಲಿ ಮೈಸೂರಿನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡ ನಂತರ, ಇನ್ನು ಮುಂದೆ ಸಾರ್ವಜನಿಕವಾಗಿ ಹಾಡುವುದಿಲ್ಲವೆಂದು ನಿರ್ಧರಿಸಿ ತಮ್ಮ ಸುದೀರ್ಘ 60 ವರ್ಷಗಳ ಗಾಯನ ವೃತ್ತಿಗೆ ನಿವೃತ್ತಿ ಘೋಷಿಸಿದರು.ಒಟ್ಟಾರೆಯಾಗಿ ಎಸ್. ಜಾನಕಿ ಅವರು ಪದ್ಮ ಪುರಸ್ಕಾರವನ್ನು ನಿರಾಕರಿಸಿದ್ದು ಒಂದು ವಿಶೇಷ ಸಂಗತಿ. ಅವರ ಸಮಕಾಲೀನ ಗಾಯಕಿ ಪಿ. ಸುಶೀಲ ಅವರಿಗೂ ಪದ್ಮಭೂಷಣ ಲಭಿಸಿದೆ. ಇನ್ನು ಎಸ್‌ಪಿಬಿಯವರಿಗೆ ಪದ್ಮಶ್ರೀ, ಪದ್ಮಭೂಷಣ ಮತ್ತು ಅವರ ನಿಧನದ ನಂತರ ಪದ್ಮವಿಭೂಷಣ ಪ್ರಶಸ್ತಿಗಳು ಸಂದಿವೆ.