ಭಾರತದ ಮಾಜಿ ಟೆನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ಅವರೊಂದಿಗೆ ವಿಚ್ಛೇದನ ಪಡೆದಿದ್ದಾರೆ ಎಂಬ ವದಂತಿ ನಡುವೆ ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶೋಯೆಬ್ ಮಲಿಕ್ ಪಾಕಿಸ್ತಾನಿ ನಟಿ ಸನಾ ಜಾವೇದ್ ಅವರನ್ನು ಮದುವೆಯಾಗಿದ್ದಾರೆ.
ಸಾನಿಯಾ ಮಿರ್ಜಾ ಅವರಿಂದ ದೂರವಾಗಿ ನಟಿಯನ್ನು ಮದುವೆಯಾಗಿರುವ ಶೋಯೆಬ್ ವಿವಾಹದ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಶೋಯೆಬ್ ಮಲಿಕ್ ಜೊತೆ ಮದುವೆ ಆಗಿರುವ ಫೋಟೋಗಳನ್ನು ನಟಿ ಸನಾ ಜಾವೇದ್ ಕೂಡ ಹಂಚಿಕೊಂಡಿದ್ದು ತಮ್ಮ ಇನ್ ಸ್ಟಾಗ್ರಾಂ ಬಯೋದಲ್ಲಿ ತಮ್ಮ ಹೆಸರನ್ನು ಸನಾ ಶೋಯೆಬ್ ಮಲಿಕ್ ಎಂದು ಬದಲಾಯಿಸಿಕೊಂಡಿದ್ದಾರೆ.
ಈ ಮುಂಚೆಯೇ ಶೋಯೆಬ್ ಮಲಿಕ್ ಮತ್ತು ಸನಾ ಜಾವೇದ್ ಡೇಟಿಂಗ್ ಮಾಡುತ್ತಿದ್ದಾರೆ ಎಂದು ವದಂತಿಗಳಿದ್ದವು. ಕಳೆದ ವರ್ಷ ನಟಿಯ ಹುಟ್ಟುಹಬ್ಬದಂದು “ಹುಟ್ಟುಹಬ್ಬದ ಶುಭಾಶಯಗಳು ಗೆಳತಿ” ಎಂದು ಶೋಯಬ್ ಮಲಿಕ್ ಬರೆದು ತಮ್ಮ ಇನ್‌ಸ್ಟಾಗ್ರಾಮ್ ಪುಟದಲ್ಲಿ ಇಬ್ಬರೂ ಒಟ್ಟಿಗೆ ಇರುವ ಫೋಟೋವನ್ನು ಹಂಚಿಕೊಂಡಿದ್ದರು. ಆ ಬಳಿಕ ಅವರಿಬ್ಬರ ನಡುವಿನ ಸಂಬಂಧಕ್ಕೆ ಹೆಚ್ಚು ಪುಷ್ಠಿ ಸಿಕ್ಕಿತ್ತು.
ಗಮನಾರ್ಹವಾಗಿ, ಶೋಯೆಬ್ ಮಲಿಕ್ 2010 ರಲ್ಲಿ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಅವರನ್ನು ಮದುವೆಯಾಗುವ ಮೊದಲು ಆಯೇಶಾ ಸಿದ್ದಿಕಿಗೆ ವಿಚ್ಚೇದನ ನೀಡಿದ್ದರು. ಸನಾ ಜಾವೇದ್ 2020 ರಲ್ಲಿ ಗಾಯಕ ಉಮರ್ ಜಸ್ವಾಲ್ ಅವರನ್ನು ವಿವಾಹವಾದರು ಮತ್ತು 2023 ರಲ್ಲಿ ಇಬ್ಬರೂ ವಿಚ್ಛೇದನ ಪಡೆದರು.
ಶೋಯೆಬ್ ಮಲಿಕ್ ಮತ್ತು ಸಾನಿಯಾ ಮಿರ್ಜಾ 2010 ರಲ್ಲಿ ಭಾರತದ ಹೈದರಾಬಾದ್‌ನಲ್ಲಿ ಸಾಂಪ್ರದಾಯಿಕ ಸಮಾರಂಭದಲ್ಲಿ ವಿವಾಹವಾದರು. ನಂತರ ಪಾಕಿಸ್ತಾನದ ಸಿಯಾಲ್‌ಕೋಟ್‌ನಲ್ಲಿ ವಿವಾಹ ಸಮಾರಂಭವೇರ್ಪಡಿಸಿದ್ದರು. ಇವರಿಬ್ಬರೂ 2018 ರಲ್ಲಿ ಮೊದಲ ಮಗು ಸ್ವೀಕರಿಸಿದರು. ಆದರೆ ಇಬ್ಬರ ವೈವಾಹಿಕ ಜೀವನದಲ್ಲಿನ ಬಿರುಕು ಬಗ್ಗೆ ಆಗಾಗ್ಗೆ ವದಂತಿಗಳು ಕೇಳಿಬರುತ್ತಿದ್ದವನು. ಆದರೆ ಕಳೆದ ವರ್ಷ ಸಾನಿಯಾ ಮಿರ್ಜಾ ಮತ್ತು ಶೋಯೆಬ್ ಮಲಿಕ್ ತಮ್ಮ ಮಗನ ಹುಟ್ಟುಹಬ್ಬವನ್ನು ದುಬೈನಲ್ಲಿ ಆಚರಿಸಿದಾಗ ವದಂತಿಗಳು ಸ್ವಲ್ಪ ಕಡಿಮೆಯಾದವು.
ಸಾನಿಯಾ ಮತ್ತು ಶೋಯೆಬ್ ದುಬೈನಿಂದ ‘ಮಿರ್ಜಾ-ಮಲಿಕ್’ ಟಿವಿ ಕಾರ್ಯಕ್ರಮವನ್ನು ಒಟ್ಟಿಗೆ ಆಯೋಜಿಸಿದಾಗ ವದಂತಿಗಳಿಗೆ ತೆರೆ ಎಳೆದರು. ಆದಾಗ್ಯೂ ಕಳೆದ ವರ್ಷದ ಕೊನೆಯಲ್ಲಿ ಶೋಯೆಬ್ ಮಲಿಕ್ ಮತ್ತು ಸಾನಿಯಾ ಮಿರ್ಜಾ ತಮ್ಮ ಸಾಮಾಜಿಕ ಮಾಧ್ಯಮದಲ್ಲಿ ತಮ್ಮ ಬಯೋದಲ್ಲಿ ಹೆಸರು ಬದಲಾವಣೆಗಳನ್ನು ಮಾಡಿದಾಗ ವದಂತಿಗಳು ಮತ್ತೆ ಕಾಣಿಸಿಕೊಂಡವು. ಇಬ್ಬರೂ ವಿಚ್ಚೇದನ ತೆಗೆದುಕೊಂಡಿದ್ದಾರೆ ಎಂಬ ಮಾತುಗಳು ಕೇಳಿಬಂದವು. ಇತ್ತೀಚಿಗೆ ಸಾನಿಯಾ ಮಿರ್ಜಾ ತಮ್ಮ ಬಯೋದಲ್ಲಿ ಗಂಡನ ಹೆಸರು ತೆಗೆದು ಹಾಕಿ ಕುತೂಹಲಕಾರಿ ನಿಗೂಢ ಪೋಸ್ಟ್ ಹಾಕಿದ್ದರು.
“ಮದುವೆ ಕಷ್ಟ. ವಿಚ್ಛೇದನ ಕಷ್ಟ. ನಿಮ್ಮ ಕಷ್ಟವನ್ನು ಆರಿಸಿ. ಬೊಜ್ಜು ಕಷ್ಟ. ಫಿಟ್ ಆಗಿರುವುದು ಕಷ್ಟ. ನಿಮ್ಮ ಕಷ್ಟವನ್ನು ಆರಿಸಿ. ಸಾಲದಲ್ಲಿ ಇರುವುದು ಕಷ್ಟ. ಆರ್ಥಿಕವಾಗಿ ಶಿಸ್ತುಬದ್ಧವಾಗಿರುವುದು ಕಷ್ಟ. ನಿಮ್ಮ ಕಷ್ಟವನ್ನು ಆರಿಸಿ. ಸಂವಹನ ಕಷ್ಟ. ಸಂವಹನ ಮಾಡದಿರುವುದು ಕಷ್ಟ. ನಿಮ್ಮ ಕಷ್ಟವನ್ನು ಆರಿಸಿ. ಜೀವನವು ಎಂದಿಗೂ ಸುಲಭವಾಗುವುದಿಲ್ಲ. ಇದು ಯಾವಾಗಲೂ ಕಠಿಣವಾಗಿರುತ್ತದೆ. ಆದರೆ ನಾವು ನಮ್ಮ ಕಷ್ಟವನ್ನು ಆಯ್ಕೆ ಮಾಡಬಹುದು. ಬುದ್ಧಿವಂತಿಕೆಯಿಂದ ಆರಿಸಿ.” ಎಂದು ಪೋಸ್ಟ್ ಹಾಕಿದ್ದರು. ಆಗ ಸಾನಿಯಾ ಮಿರ್ಜಾ ಮತ್ತು ಶೋಯೆಬ್ ಮಲ್ಲಿಕ್ ಮದುವೆ ಮುರಿದುಬಿದ್ದಿದೆ ಎಂದೇ ತಿಳಿಯಲಾಗಿತ್ತು. ಇದೀಗ ಶೋಯೆಬ್ ಮಲಿಕ್ ಮದುವೆಯಾಗಿರೋದು ವದಂತಿಗಳಿಗೆ ತೆರೆ ಎಳೆದಿದ್ದು ಅಭಿಮಾನಿಗಳಿಗೆ ಶಾಕ್ ನೀಡಿದೆ.
Loading ...
