ಸ್ಯಾಂಡಲ್’ವುಡ್ ಅಷ್ಟೇ ಅಲ್ಲದೆ ಇಡೀ ಭಾರತೀಯ ಚಿತ್ರರಂಗವೇ ಕಾತರದಿಂದ ಕಾಯುತ್ತಿರುವ ರಾಕಿ ಭಾಯ್ ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಚಿತ್ರದ ಬಿಡುಗಡೆಗೆ ಇನ್ನು ಕೇವಲ ಮೂರು ವಾರಗಳು ಬಾಕಿ ಇರುವ ಬೆನ್ನಲ್ಲೇ, ಚಿತ್ರತಂಡದಿಂದ ಮಹತ್ವದ ಸುದ್ದಿಯೊಂದು ಹೊರಬಿದ್ದಿದೆ.
ಹೌದು.ಯಶ್ ನಟನೆಯ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾ ಬಿಡುಗಡೆಗೆ ಇನ್ನು ಕೇವಲ ಮೂರು ವಾರಗಳು ಮಾತ್ರ ಬಾಕಿ ಇವೆ. ಈಗಾಗಲೇ ಚಿತ್ರದ ಪ್ರೀ-ರಿಲೀಸ್ ವ್ಯವಹಾರಗಳು ಮುಗಿದಿದ್ದು, ಪೋಸ್ಟರ್ಗಳು ಮತ್ತು ಟೀಸರ್ ಅಭಿಮಾನಿಗಳಲ್ಲಿ ಸಂಚಲನ ಮೂಡಿಸಿವೆ. ಮಾರ್ಚ್ 19 ರಂದು ತೆರೆಗೆ ಬರಲಿರುವ ಈ ಚಿತ್ರದ ಬಗ್ಗೆ ಈಗ ಆಸಕ್ತಿದಾಯಕ ಅಪ್ಡೇಟ್ವೊಂದು ಹರಿದಾಡುತ್ತಿದೆ.
ಚಿತ್ರದ ಕುರಿತು ಈಗಾಗಲೇ ಸೆನ್ಸಾರ್ ಮಂಡಳಿಗೆ ಕೆಲವು ದೂರುಗಳು ಬಂದಿರುವ ಹಿನ್ನೆಲೆಯಲ್ಲಿ, ಯಾವುದೇ ಕಾನೂನು ತೊಡಕುಗಳು ಉಂಟಾಗಬಾರದು ಎಂದು ಚಿತ್ರತಂಡ ಯೋಜಿತ ಸಮಯಕ್ಕಿಂತ ಮುಂಚಿತವಾಗಿಯೇ ಸೆನ್ಸಾರ್ಗೆ ಕಳುಹಿಸಲು ಸಜ್ಜಾಗಿದೆ. ಮುಂದಿನ ವಾರ ‘ಟಾಕ್ಸಿಕ್’ ಸೆನ್ಸಾರ್ ಪ್ರಕ್ರಿಯೆ ಪೂರ್ಣಗೊಳ್ಳುವ ಸಾಧ್ಯತೆಯಿದೆ.
ಕ್ರಿಸ್ಪ್ ರನ್ ಟೈಮ್
ಇತ್ತೀಚಿನ ದಿನಗಳಲ್ಲಿ ದೊಡ್ಡ ಬಜೆಟ್ ಸಿನಿಮಾಗಳು 3 ಗಂಟೆಗೂ ಹೆಚ್ಚು ಅವಧಿಯನ್ನು ಹೊಂದಿರುತ್ತವೆ. ಆದರೆ, ‘ಟಾಕ್ಸಿಕ್’ ಚಿತ್ರದ ಅವಧಿ ಕೇವಲ 2 ಗಂಟೆ 20 ನಿಮಿಷ ಮಾತ್ರ ಎಂದು ಹೇಳಲಾಗುತ್ತಿದೆ. ಈ ಸುದ್ದಿ ಕೆಲವು ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದರೆ, ಇನ್ನು ಕೆಲವರಿಗೆ ಕ್ರಿಸ್ಪ್ ಆದ ಕಥೆ ಇರಲಿದೆ ಎಂಬ ಖುಷಿ ತಂದಿದೆ.
ಸಿನಿಮಾ ಎರಡು ಭಾಗಗಳಲ್ಲಿ ಬರಲಿದೆಯೇ?
ಕೇವಲ 2 ಗಂಟೆ 20 ನಿಮಿಷದ ಅವಧಿಯ ಹಿಂದೆ ಒಂದು ದೊಡ್ಡ ರಹಸ್ಯವಿದೆ ಎಂಬ ಮಾತು ಕೇಳಿಬರುತ್ತಿದೆ. ಮೂಲಗಳ ಪ್ರಕಾರ, ‘ಟಾಕ್ಸಿಕ್’ ಸಿನಿಮಾ ಎರಡು ಭಾಗಗಳಲ್ಲಿ ಬರಲಿದೆ:
• ಭಾಗ 1: ಇದು ತಂದೆ-ಮಗನ ಕಥೆಯಾಗಿದ್ದು, ಮೊದಲ ಭಾಗದಲ್ಲಿ ತಂದೆ ರಾಯನ್ ಚರಿತ್ರೆ ಮತ್ತು ಆತನ ಸಾಹಸಗಳನ್ನು ತೋರಿಸಲಾಗುತ್ತದೆ.
• ಭಾಗ 2: ಕ್ಲೈಮ್ಯಾಕ್ಸ್ನಲ್ಲಿ ಮಗನ ಪಾತ್ರವನ್ನು ಪರಿಚಯಿಸಿ, ಎರಡನೇ ಭಾಗಕ್ಕೆ ವೇದಿಕೆ ಸಿದ್ಧಪಡಿಸಲಾಗುತ್ತದೆ ಎನ್ನಲಾಗಿದೆ.
ಮೂರು ವರ್ಷಗಳ ಕಾಲ ಚಿತ್ರೀಕರಣ ನಡೆಸಿರುವುದರಿಂದ ಕೇವಲ ಎರಡುವರೆ ಗಂಟೆಯ ಸಿನಿಮಾ ಮಾತ್ರ ಇರಲು ಸಾಧ್ಯವಿಲ್ಲ, ಹಾಗಾಗಿ ಚಿತ್ರತಂಡ ಸೀಕ್ವೆಲ್ ಪ್ಲಾನ್ ಮಾಡಿದೆ ಎಂಬುದು ಗಾಂಧಿನಗರದ ಮಾತು.
ಪ್ರಚಾರದ ಅಖಾಡಕ್ಕೆ ಯಶ್
ಗೀತು ಮೋಹನ್ದಾಸ್ ನಿರ್ದೇಶನದ ಈ ಚಿತ್ರದ ಪ್ರಚಾರಕ್ಕಾಗಿ ಯಶ್ ಮತ್ತು ತಂಡ ಶೀಘ್ರದಲ್ಲೇ ಮೈದಾನಕ್ಕಿಳಿಯಲಿದೆ. ಚಿತ್ರತಂಡ ಅಧಿಕೃತವಾಗಿ ಯಾವುದೇ ಮಾಹಿತಿ ಬಿಟ್ಟುಕೊಡದಿದ್ದರೂ, ಸೋಶಿಯಲ್ ಮೀಡಿಯಾದಲ್ಲಿ ಈ ‘ರನ್ ಟೈಮ್’ ಮತ್ತು ‘ಸೀಕ್ವೆಲ್’ ಸುದ್ದಿ ಸಖತ್ ವೈರಲ್ ಆಗುತ್ತಿದೆ.
