ಟೀಮ್ ಇಂಡಿಯಾದ ಸ್ಟಾರ್ ಬ್ಯಾಟರ್ ರೋಹಿತ್ ಶರ್ಮಾ ಅವರು ಕೇವಲ ಬ್ಯಾಟಿಂಗ್ನಿಂದ ಮಾತ್ರವಲ್ಲ, ತಮ್ಮ ವಿನೋದಭರಿತ ನಡವಳಿಕೆಯಿಂದಲೂ ಸುದ್ದಿಯಾಗುತ್ತಾರೆ. ಜೈಪುರದ ಸವಾಯ್ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿ ನಡೆದ ಸಿಕ್ಕಿಂ ವಿರುದ್ಧದ ವಿಜಯ್ ಹಜಾರೆ ಟ್ರೋಫಿ ಪಂದ್ಯದ ವೇಳೆ ಇಂತಹದ್ದೇ ಒಂದು ಘಟನೆ ನಡೆದಿದ್ದು, ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ಸೌಂಡ್ ಮಾಡುತ್ತಿದೆ.
ವಡಾ ಪಾವ್ ಮತ್ತು ರೋಹಿತ್: ಪಂದ್ಯದ ನಡುವೆ ರೋಹಿತ್ ಶರ್ಮಾ ಅವರು ಬೌಂಡರಿ ಲೈನ್ ಬಳಿ ಫೀಲ್ಡಿಂಗ್ ಮಾಡುತ್ತಿದ್ದಾಗ, ಅಲ್ಲಿದ್ದ ಅಭಿಮಾನಿಯೊಬ್ಬ ಕಾಲೆಳೆಯುವ ಉದ್ದೇಶದಿಂದಲೇ ಚೀರುತ್ತಾ, “ರೋಹಿತ್ ಭಾಯ್, ವಡಾ ಪಾವ್ ಖಾವೋಗೆ ಕ್ಯಾ?” (ರೋಹಿತ್ ಅಣ್ಣಾ, ವಡಾ ಪಾವ್ ತಿಂತೀರಾ?) ಎಂದು ಕೇಳಿದ್ದಾನೆ. ಈ ಮಾತು ಕೇಳುತ್ತಿದ್ದಂತೆ ರೋಹಿತ್ ಮುಗುಳ್ನಕ್ಕಿದ್ದಾರೆ ಮತ್ತು ವಿನಯದಿಂದಲೇ ಕೈ ಸನ್ನೆ ಮಾಡುವ ಮೂಲಕ ಆ ಆಫರ್ ಅನ್ನು ನಿರಾಕರಿಸಿದ್ದಾರೆ. ಈ ವಿಡಿಯೋ ಕ್ಲಿಪ್ ಈಗ ಎಲ್ಲೆಡೆ ವೈರಲ್ ಆಗಿದೆ.
ಜೈಪುರದಲ್ಲಿ ‘ಮುಂಬೈಚಾ ರಾಜಾ’ ಗರ್ಜನೆ: ಸಾಮಾನ್ಯವಾಗಿ ಅಂತರಾಷ್ಟ್ರೀಯ ಪಂದ್ಯಗಳಲ್ಲಿ ರೋಹಿತ್ಗೆ ಸಿಗುವ ಕ್ರೇಜ್ ಡೊಮೆಸ್ಟಿಕ್ ಕ್ರಿಕೆಟ್ನಲ್ಲೂ ಕಂಡುಬಂದಿದೆ. ರಾಜಸ್ಥಾನದ ಮೈದಾನದಲ್ಲೂ ಜೈಪುರದ ಅಭಿಮಾನಿಗಳು “ಮುಂಬೈಚಾ ರಾಜಾ, ರೋಹಿತ್ ಶರ್ಮಾ!” ಎಂದು ಘೋಷಣೆ ಕೂಗುವ ಮೂಲಕ ರೋಹಿತ್ ಮೇಲಿರುವ ತಮ್ಮ ಅಭಿಮಾನವನ್ನು ವ್ಯಕ್ತಪಡಿಸಿದ್ದಾರೆ. ಹಿರಿಯ ಆಟಗಾರನಾಗಿದ್ದರೂ ದೇಶೀಯ ಕ್ರಿಕೆಟ್ ಆಡಲು ಬಂದಿದ್ದ ರೋಹಿತ್ ಅವರನ್ನು ನೋಡಲು ಸಾವಿರಾರು ಜನ ಕ್ರೀಡಾಂಗಣಕ್ಕೆ ಧಾವಿಸಿದ್ದರು.
ಬ್ಯಾಟಿಂಗ್ನಲ್ಲೂ ಅಬ್ಬರ: ಬರಿ ತಮಾಷೆಯಷ್ಟೇ ಅಲ್ಲದೆ, ರೋಹಿತ್ ಶರ್ಮಾ ಮೈದಾನದಲ್ಲಿ ಬ್ಯಾಟ್ ಮೂಲಕವೂ ಅಬ್ಬರಿಸಿದ್ದಾರೆ. ಸಿಕ್ಕಿಂ ವಿರುದ್ಧದ ಪಂದ್ಯದಲ್ಲಿ ವೇಗವಾಗಿ ರನ್ ಗಳಿಸುವ ಮೂಲಕ ಮೈದಾನಕ್ಕೆ ಬಂದಿದ್ದ ಸಾವಿರಾರು ಅಭಿಮಾನಿಗಳಿಗೆ ಭರಪೂರ ಮನರಂಜನೆ ನೀಡಿದ್ದಾರೆ.
ಈ ಘಟನೆಯು ರೋಹಿತ್ ಶರ್ಮಾ ಮತ್ತು ಅವರ ಅಭಿಮಾನಿಗಳ ನಡುವಿನ ಆತ್ಮೀಯ ಸಂಬಂಧವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
