ಬುಧವಾರ ನಡೆದ ವಿಜಯ್ ಹಜಾರೆ ಟ್ರೋಫಿಯ ಮೊದಲ ದಿನದಂದು ರೋಹಿತ್ ಶರ್ಮಾ (ಮುಂಬೈ ಪರ 155 ರನ್) ಮತ್ತು ವಿರಾಟ್ ಕೊಹ್ಲಿ (ದೆಹಲಿ ಪರ 131 ರನ್) ಭರ್ಜರಿ ಶತಕಗಳನ್ನು ಸಿಡಿಸಿದ್ದರು. ಜೈಪುರದಲ್ಲಿ ರೋಹಿತ್ ಅಬ್ಬರಿಸಿದರೆ, ಬೆಂಗಳೂರಿನಲ್ಲಿ ಕೊಹ್ಲಿ ಅಬ್ಬರಿಸಿದ್ದರು. ಆದರೆ ಈ ಪಂದ್ಯಗಳ ನೇರಪ್ರಸಾರ ಅಥವಾ ಸ್ಟ್ರೀಮಿಂಗ್ ಇಲ್ಲದ ಕಾರಣ ಅಭಿಮಾನಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದರು. ಬಿಸಿಸಿಐ ಹಂಚಿಕೊಂಡ ವಿಡಿಯೋಗಳು ಕೂಡ ಕಳಪೆ ಗುಣಮಟ್ಟದ್ದಾಗಿದ್ದವು.
ಅಶ್ವಿನ್ ನೀಡಿದ ವಿವರಣೆ ಏನು?
ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಮಾತನಾಡಿರುವ ಆರ್. ಅಶ್ವಿನ್, ಪ್ರಸಾರಕರು ಮತ್ತು ಬಿಸಿಸಿಐ ಎದುರಿಸುವ ತಾಂತ್ರಿಕ ಸವಾಲುಗಳನ್ನು ವಿವರಿಸಿದ್ದಾರೆ:
- ಪೂರ್ವ ನಿರ್ಧರಿತ ವೇಳಾಪಟ್ಟಿ: ದೇಶೀಯ ಕ್ರಿಕೆಟ್ ಪಂದ್ಯಗಳ ಪ್ರಸಾರದ ವೇಳಾಪಟ್ಟಿಯನ್ನು ಮೊದಲೇ ನಿರ್ಧರಿಸಲಾಗಿರುತ್ತದೆ. ಪ್ರಸಾರಕರು ಯಾವ ಕ್ರೀಡಾಂಗಣದಿಂದ ಲೈವ್ ನೀಡಬೇಕು ಎಂಬುದನ್ನು ಮೊದಲೇ ಸಿದ್ಧತೆ ಮಾಡಿಕೊಂಡಿರುತ್ತಾರೆ.
- ಕೊನೆಯ ಕ್ಷಣದ ಲಭ್ಯತೆ: ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಈ ಪಂದ್ಯಗಳನ್ನು ಆಡುತ್ತಾರೆ ಎಂಬ ಮಾಹಿತಿ ಪ್ರಸಾರಕರಿಗೆ ತಡವಾಗಿ ತಲುಪಿರುತ್ತದೆ. ಅಂತರಾಷ್ಟ್ರೀಯ ಕ್ಯಾಲೆಂಡರ್ ನಡುವೆ ದೇಶೀಯ ಪಂದ್ಯಗಳಿಗೆ ಸ್ಟಾರ್ ಆಟಗಾರರು ಲಭ್ಯವಾಗುವುದು ಕೊನೆಯ ಕ್ಷಣದಲ್ಲಿ ನಿರ್ಧಾರವಾಗುತ್ತದೆ.
- ತಾಂತ್ರಿಕ ಸವಾಲು: ಅಹಮದಾಬಾದ್ ಮತ್ತು ರಾಜ್ಕೋಟ್ನಂತಹ ಕ್ರೀಡಾಂಗಣಗಳಲ್ಲಿ ಮಾತ್ರ ಪ್ರಸಾರದ ವ್ಯವಸ್ಥೆ ಮಾಡಲಾಗಿತ್ತು. ಬೆಂಗಳೂರಿನ ಬಿಸಿಸಿಐ ಸೆಂಟರ್ ಆಫ್ ಎಕ್ಸಲೆನ್ಸ್ನಲ್ಲಿ ಅಂತಹ ದೊಡ್ಡ ಪ್ರಮಾಣದ ಪ್ರಸಾರ ವ್ಯವಸ್ಥೆಯನ್ನು ಕೊನೆಯ ಕ್ಷಣದಲ್ಲಿ ಅಳವಡಿಸುವುದು ಕಷ್ಟಕರ ಎಂದು ಅಶ್ವಿನ್ ಸಮರ್ಥಿಸಿಕೊಂಡಿದ್ದಾರೆ.
ಮುಂದಿನ ಪಂದ್ಯಗಳಿಗೂ ಇಲ್ಲವೇ ಲೈವ್?
ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಇಂದು (ಡಿಸೆಂಬರ್ 26) ತಮ್ಮ ಎರಡನೇ ಹಾಗೂ ಕೊನೆಯ ಲೀಗ್ ಪಂದ್ಯವನ್ನು ಆಡಲಿದ್ದಾರೆ. ರೋಹಿತ್ ಉತ್ತರಾಖಂಡ್ ವಿರುದ್ಧ ಹಾಗೂ ಕೊಹ್ಲಿ ಗುಜರಾತ್ ವಿರುದ್ಧ ಕಣಕ್ಕಿಳಿಯಲಿದ್ದಾರೆ. ಈ ಪಂದ್ಯಗಳಿಗೂ ಲೈವ್ ಪ್ರಸಾರದ ಸಾಧ್ಯತೆ ಕಡಿಮೆ ಇರುವುದರಿಂದ ಅಭಿಮಾನಿಗಳು ಮತ್ತೆ ಸೋಶಿಯಲ್ ಮೀಡಿಯಾ ಅಪ್ಡೇಟ್ಗಳನ್ನೇ ಅವಲಂಬಿಸಬೇಕಾಗಿದೆ.
ಇದಾದ ನಂತರ ಜನವರಿ 11 ರಿಂದ ಆರಂಭವಾಗಲಿರುವ ನ್ಯೂಜಿಲೆಂಡ್ ವಿರುದ್ಧದ ಏಕದಿನ ಸರಣಿಯಲ್ಲಿ ಇಬ್ಬರೂ ಸ್ಟಾರ್ ಆಟಗಾರರು ಭಾರತ ತಂಡದ ಪರ ಕಾಣಿಸಿಕೊಳ್ಳಲಿದ್ದಾರೆ.
