ನವದೆಹಲಿ-ರಾಷ್ಟ್ರ ರಾಜಧಾನಿಯಲ್ಲಿ ಜನಸಂದಣಿ ನಿಯಂತ್ರಣ ಕಾರ್ಯಾಚರಣೆ ವೇಳೆ ನಡೆದ ಗಂಭೀರ ಲೋಪಗಳು ಮತ್ತು ಭದ್ರತಾ ವೈಫಲ್ಯಗಳ ಹಿನ್ನೆಲೆಯಲ್ಲಿ, ಕ್ಷಿಪ್ರ ಕಾರ್ಯ ಪಡೆ (RAF) ಕಟ್ಟುನಿಟ್ಟಿನ ಹೆಜ್ಜೆ ಇಟ್ಟಿದೆ.
ಜಂತರ್ ಮಂತರ್‌ನಲ್ಲಿ ನಡೆದ ಪ್ರತಿಭಟನೆಯೊಂದರಲ್ಲಿ ಆರ್‌ಎಎಫ್ ಧ್ವಜಗಳ ಬಳಕೆಯಲ್ಲಿ ಉಂಟಾದ ಗಂಭೀರ ಪ್ರಮಾದ ಹಾಗೂ ಕಾರ್ಯಾಚರಣೆಯ ನ್ಯೂನತೆಗಳನ್ನು ಗಂಭೀರವಾಗಿ ಪರಿಗಣಿಸಿರುವ ಪಡೆ, ದೆಹಲಿಯಲ್ಲಿ ಪ್ರೊಜೆಕ್ಟೈಲ್ ಅಟ್ಯಾಕ್ ಗನ್‌ಗಳು (PAG), ಆಂಟಿ-ಗಲಭೆ ಗನ್‌ಗಳು (ARG), ಎಲೆಕ್ಟ್ರಿಕ್ ಶಾಕ್ ವೆಪನ್‌ಗಳು ಮತ್ತು ಎಲೆಕ್ಟ್ರಿಕ್ ಶೀಲ್ಡ್‌ಗಳ ಬಳಕೆಯನ್ನು ಮುಂದಿನ ಆದೇಶದವರೆಗೆ ಸಂಪೂರ್ಣವಾಗಿ ನಿಷೇಧಿಸಿದೆ.
ಜುಲೈ 22 ರಂದು ಇನ್ಸ್‌ಪೆಕ್ಟರ್ ಜನರಲ್ (IG) ಸೀಮಾ ಧುಂಡಿಯಾ ಅವರ ಅಧ್ಯಕ್ಷತೆಯಲ್ಲಿ ಹಿರಿಯ ಆರ್‌ಎಎಫ್ ಅಧಿಕಾರಿಗಳ ಉನ್ನತ ಮಟ್ಟದ ವೀಡಿಯೊ ಸಮ್ಮೇಳನ ನಡೆಯಿತು. ಜುಲೈ 20 ರಂದು ಜಂತರ್ ಮಂತರ್‌ನಲ್ಲಿ ನಡೆದ ಪ್ರತಿಭಟನಾಕಾರರ ನಿರ್ವಹಣೆಯ ವೇಳೆ ಕಂಡುಬಂದ ಕಾರ್ಯಾಚರಣೆಯ ಲೋಪಗಳನ್ನು ಈ ಸಭೆಯಲ್ಲಿ ತೀವ್ರವಾಗಿ ಪರಾಮರ್ಶಿಸಲಾಯಿತು.
ಪಡೆಯ ಕಾರ್ಯವೈಖರಿ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಐಜಿ ಸೀಮಾ ಧುಂಡಿಯಾ, ಜನಸಂದಣಿ ನಿಯಂತ್ರಣ ಕಾರ್ಯಾಚರಣೆಗಳು, ಶಿಸ್ತು ಮತ್ತು ಹೊಣೆಗಾರಿಕೆಯನ್ನು ಸುಧಾರಿಸುವ ನಿಟ್ಟಿನಲ್ಲಿ ಒಟ್ಟು 26 ಸರಿಪಡಿಸುವ ಕ್ರಮಗಳನ್ನು ಪ್ರಕಟಿಸಿದ್ದಾರೆ.
ಹೊಸ ನಿಯಮಗಳು ಮತ್ತು ನಿರ್ಬಂಧಗಳು
ಹೊಸ ನಿಯಮಗಳು:
ಮಾರಕ ಹಾಗೂ ವಿದ್ಯುತ್ ಅಸ್ತ್ರಗಳ ನಿಷೇಧ: ದೆಹಲಿಯಲ್ಲಿ ನಡೆಯುವ ಮುಂದಿನ ಎಲ್ಲ ನಿಯೋಜನೆಗಳ ಸಮಯದಲ್ಲಿ ಪೆಲೆಟ್ ಗನ್‌ಗಳು, ಎಲೆಕ್ಟ್ರಿಕ್ ಶಾಕ್ ಲಾಠಿಗಳು ಮತ್ತು ವಿದ್ಯುತ್ ಕವಚಗಳ (Electric Shields) ಬಳಕೆಗೆ ತಡೆ ನೀಡಲಾಗಿದೆ.
ಜನಸಂದಣಿಯಿಂದ ದೂರ ಸರಿದ ವ್ಯಕ್ತಿಗಳ ಮೇಲೆ ಬಲಪ್ರಯೋಗ ಮಾಡುವುದು, ಉದ್ದೇಶಪೂರ್ವಕವಾಗಿ ಜನರನ್ನು ನೆಲಕ್ಕೆ ತಳ್ಳುವುದು ಹಾಗೂ ಬ್ಯಾರಿಕೇಡ್‌ಗಳ ಹೊರಗೆ ವ್ಯಕ್ತಿಗಳನ್ನು ಹೊಡೆಯುವಂತಹ ಘಟನೆಗಳು ವಿಮರ್ಶೆಗೆ ಒಳಗಾಗಿವೆ. ಇನ್ನು ಮುಂದೆ ಯಾವುದೇ ಅಸಮಾನ ಅಥವಾ ಅನಗತ್ಯ ಬಲಪ್ರಯೋಗ ಮಾಡುವಂತಿಲ್ಲ.
ಪ್ರತಿ ಕಾರ್ಯಾಚರಣೆಯ ಸಮಯದಲ್ಲಿ ಸಿಬ್ಬಂದಿ ಕಡ್ಡಾಯವಾಗಿ ಬಾಡಿ-ವಾರ್ನ್ ಕ್ಯಾಮೆರಾಗಳನ್ನು ಧರಿಸಬೇಕು. ಪ್ರಮುಖ ಘಟನೆಗಳ ವಿಶೇಷ ವೀಡಿಯೊಗ್ರಫಿ ಹಾಗೂ ಗುಪ್ತಚರ ಮೇಲ್ವಿಚಾರಣೆಯನ್ನು ಬಲಪಡಿಸಲು ನಿರ್ದೇಶಿಸಲಾಗಿದೆ.
ಹಿಂದೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ ವೀಡಿಯೊಗಳಂತೆ ಸಿಬ್ಬಂದಿ ಹೆಲ್ಮೆಟ್ ಮತ್ತು ದೇಹ ರಕ್ಷಕಗಳಿಲ್ಲದೆ (Body Protectors) ಕರ್ತವ್ಯ ನಿರ್ವಹಿಸುವಂತಿಲ್ಲ. ಪ್ರತಿಯೊಬ್ಬ ಸಿಬ್ಬಂದಿಯು ಹೆಲ್ಮೆಟ್ ವಿಸರ್‌ಗಳನ್ನು ಒಳಗೊಂಡಂತೆ ಸಂಪೂರ್ಣ ರಕ್ಷಣಾ ಕವಚಗಳನ್ನು ಧರಿಸುವುದು ಕಡ್ಡಾಯ.
ಆರ್‌ಎಎಫ್ ಪರಿವರ್ತನಾ ತರಬೇತಿ ಪಡೆಯದ ಸಿಬ್ಬಂದಿಯನ್ನು ಜನಸಂದಣಿ ನಿಯಂತ್ರಣಕ್ಕೆ ನಿಯೋಜಿಸುವಂತಿಲ್ಲ. ವಿಶೇಷವಾಗಿ ಜಮ್ಮು ಮತ್ತು ಕಾಶ್ಮೀರದಂತಹ ದಂಗೆ ನಿಗ್ರಹ ವಲಯಗಳಿಂದ ವರ್ಗಾವಣೆಗೊಂಡು ಬರುವ ಸಿಬ್ಬಂದಿಗೆ ಆರ್‌ಎಎಫ್‌ನ ‘ಸೂಕ್ಷ್ಮ ಪೊಲೀಸ್’ (Soft Policing) ತತ್ವಶಾಸ್ತ್ರದ ಬಗ್ಗೆ ತರಬೇತಿ ನೀಡಿದ ಬಳಿಕವೇ Field ಗೆ ಬಿಡಬೇಕು.
ಅನೇಕ ಸಿಬ್ಬಂದಿ ಯಾವುದೇ ಪೂರ್ವ ಮಾಹಿತಿಯಿಲ್ಲದೆ ಕ್ಷೇತ್ರಕ್ಕೆ ತೆರಳಿ ಗೊಂದಲ ಸೃಷ್ಟಿಸಿರುವುದು ಗಮನಕ್ಕೆ ಬಂದಿದೆ. ಇನ್ನು ಮುಂದೆ ಕಮಾಂಡೆಂಟ್‌ಗಳು ಪ್ರತಿ ನಿಯೋಜನೆಗೆ ಮುನ್ನ ವಿವರವಾದ ಬ್ರೀಫಿಂಗ್ ನೀಡುವುದು ಕಡ್ಡಾಯವಾಗಿದೆ.
ಡಿಜಿಟಲ್ ಯುಗದಲ್ಲಿ ಭದ್ರತಾ ಪಡೆಗಳ ಜವಾಬ್ದಾರಿ
ಪ್ರಸ್ತುತ ದಿನಗಳಲ್ಲಿ ಪ್ರತಿಭಟನೆಗಳು ಅಥವಾ ಸಾರ್ವಜನಿಕ ಆಂದೋಲನಗಳು ತೀವ್ರಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ, ಭದ್ರತಾ ಪಡೆಗಳ ನಡವಳಿಕೆ ಹಾಗೂ ಮಾನವ ಹಕ್ಕುಗಳ ರಕ್ಷಣೆ ಅತ್ಯಂತ ಪ್ರಮುಖವಾಗಿದೆ. ಜಂತರ್ ಮಂತರ್‌ನಂತಹ ಪ್ರಮುಖ ಪ್ರದೇಶಗಳಲ್ಲಿ ಕಾವಲು ಕಾಯುವ ಆರ್‌ಎಎಫ್‌ನಂತಹ ಪಡೆಗಳು ಯಾವುದೇ ಸಣ್ಣಪುಟ್ಟ ಪ್ರಮಾದವೆಸಗಿದರೂ ಅದು ರಾಷ್ಟ್ರಮಟ್ಟದಲ್ಲಿ ಚರ್ಚೆಯಾಗುತ್ತದೆ.
ಈ ಹಿಂದೆ ಜಮ್ಮು-ಕಾಶ್ಮೀರದಂತಹ ಕಠಿಣ ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸಿ ಬಂದ ಸಿಬ್ಬಂದಿಗೆ ನಾಗರಿಕ ಜನಸಂದಣಿ ನಿಯಂತ್ರಣಕ್ಕೂ, ಉಗ್ರರ ನಿಗ್ರಹ ಕಾರ್ಯಾಚರಣೆಗೂ ಇರುವ ವ್ಯತ್ಯಾಸದ ಬಗ್ಗೆ ಸೂಕ್ತ ಅರಿವು ಮೂಡಿಸುವುದು ಅತಿವಶ್ಯಕವಾಗಿದೆ.
ಪಿಐಬಿ (PIB) ಇತ್ತೀಚೆಗೆ ಡೀಪ್‌ಫೇಕ್ ವಿಡಿಯೋಗಳು ಮತ್ತು ಸುಳ್ಳುಸುದ್ದಿಗಳ ವಿರುದ್ಧ ಎಚ್ಚರಿಕೆ ನೀಡಿರುವಂತೆ, ಇಂದಿನ ಡಿಜಿಟಲ್ ಯುಗದಲ್ಲಿ ಭದ್ರತಾ ಸಿಬ್ಬಂದಿಯ ಸಣ್ಣ ತಪ್ಪಿನ ವಿಡಿಯೋಗಳು ಕೂಡ ಕ್ಷಣಾರ್ಧದಲ್ಲಿ ವೈರಲ್ ಆಗಿ ಇಲಾಖೆಗೆ ಮುಜುಗರ ತಂದೊಡ್ಡಬಹುದು.
ಈ ಎಲ್ಲ ವಾಸ್ತವಿಕತೆಯನ್ನು ಗಮನದಲ್ಲಿಟ್ಟುಕೊಂಡು, ಆರ್‌ಎಎಫ್ ಪಡೆ ತನ್ನ ಆಂತರಿಕ ಶಿಸ್ತನ್ನು ಮರುಸ್ಥಾಪಿಸಲು ಮತ್ತು ಬಲಪ್ರಯೋಗದ ಮಾನದಂಡಗಳನ್ನು ಕಠಿಣಗೊಳಿಸಲು ಈ ದಿಟ್ಟ ನಿರ್ಧಾರಗಳನ್ನು ಕೈಗೊಂಡಿದೆ.
