ಅಮೆರಿಕದ ಓಹಿಯೊ ರಾಜ್ಯದಲ್ಲಿ ಆಸ್ಪತ್ರೆಯ ಸಿಬ್ಬಂದಿ ಶೌಚಾಲಯಗಳಲ್ಲಿ ಮಹಿಳೆಯರನ್ನು ರಹಸ್ಯವಾಗಿ ವಿಡಿಯೊ ಹಾಗೂ ಫೋಟೋ ಚಿತ್ರೀಕರಿಸಿದ್ದ ಪ್ರಕರಣದಲ್ಲಿ ಭಾರತೀಯ ಮೂಲದ ವೈದ್ಯನಿಗೆ 6 ತಿಂಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ. ಆರೋಪಿ ಅದ್ವೈತ್ ದೇಶ್ಮುಖ್, ಯುನಿವರ್ಸಿಟಿ ಆಫ್ ಟೊಲೆಡೊದಲ್ಲಿ ಎಂಡೋಯೂರಾಲಜಿ ಮತ್ತು ಯೂರಾಲಜಿಕ್ ಆಂಕಾಲಜಿ ವಿಭಾಗದ ಮೂರನೇ ವರ್ಷದ ರೆಸಿಡೆಂಟ್ ವೈದ್ಯನಾಗಿದ್ದ. ಆತ ಸಾಕ್ಷ್ಯ ನಾಶಕ್ಕೆ ಯತ್ನಿಸಿದ ಒಂದು ಆರೋಪ ಹಾಗೂ ಗುಪ್ತ ಚಿತ್ರೀಕರಣ (Voyeurism) ಸಂಬಂಧಿಸಿದ ಏಳು ಆರೋಪಗಳನ್ನು ಒಪ್ಪಿಕೊಂಡಿದ್ದಾನೆ.
ಲುಕಾಸ್ ಕೌಂಟಿಯ ಕಾಮನ್ ಪ್ಲೀಸ್ ನ್ಯಾಯಾಲಯದ ನ್ಯಾಯಾಧೀಶ ಮೈಕಲ್ ಗೌಲ್ಡಿಂಗ್ ಅವರು ದೇಶ್ಮುಖ್ಗೆ 6 ತಿಂಗಳ ಜೈಲು ಶಿಕ್ಷೆಯ ಜೊತೆಗೆ 3 ವರ್ಷಗಳ ಪ್ರೊಬೆಷನ್, 15 ವರ್ಷಗಳ ಕಾಲ ಲೈಂಗಿಕ ಅಪರಾಧಿ (Sex Offender) ಆಗಿ ನೋಂದಣಿ, Sexaholics Anonymous ಸಭೆಗಳಲ್ಲಿ ಕಡ್ಡಾಯವಾಗಿ ಭಾಗವಹಿಸುವುದು ಹಾಗೂ ಮಾನಸಿಕ ಆರೋಗ್ಯ ಮತ್ತು ಲೈಂಗಿಕ ಅಪರಾಧಿಗಳ ಪುನರ್ವಸತಿ ಚಿಕಿತ್ಸೆಯನ್ನು ಮುಂದುವರಿಸುವಂತೆ ಆದೇಶಿಸಿದ್ದಾರೆ.
ಶಿಕ್ಷೆ ಪ್ರಕಟಿಸುವ ಮೊದಲು ದೇಶ್ಮುಖ್ ನ್ಯಾಯಾಲಯದಲ್ಲಿ ಸಂತ್ರಸ್ತೆಯರ ಬಳಿ ಕ್ಷಮೆಯಾಚಿಸಿದ್ದಾನೆ. ಆದರೆ, ಆತನ ಪರ ವಕೀಲರು ಆತ ಈಗಾಗಲೇ ಚಿಕಿತ್ಸೆಗೆ ಒಳಗಾಗಿರುವುದರಿಂದ ಜೈಲು ಶಿಕ್ಷೆಯ ಬದಲು ಪ್ರೊಬೆಷನ್ ನೀಡುವಂತೆ ಮನವಿ ಮಾಡಿದ್ದರು.
ಸಂತ್ರಸ್ತೆಯ ನೋವಿನ ಮಾತು
ಗುರುತಿಸಲಾದ ಆರು ಸಂತ್ರಸ್ತೆಯರಲ್ಲಿ ಒಬ್ಬರಾದ ಟೊಲೆಡೊ ಆಸ್ಪತ್ರೆಯ ಉದ್ಯೋಗಿ ಲಿಂಡ್ಸೇ ನ್ಯಾಯಾಲಯದಲ್ಲಿ ಮಾತನಾಡಿ, ಈ ಘಟನೆ ತನ್ನ ಜೀವನವನ್ನೇ ಬದಲಾಯಿಸಿದೆ ಎಂದು ಹೇಳಿದ್ದಾರೆ.”ಈಗ ಸಾರ್ವಜನಿಕ ಶೌಚಾಲಯಗಳಿಗೆ ಹೋದಾಗಲೆಲ್ಲಾ ಅಲ್ಲಿ ಅಡಗಿಸಿರುವ ಕ್ಯಾಮೆರಾ ಇದೆಯೇ ಎಂದು ಪರಿಶೀಲಿಸುತ್ತೇನೆ. ನನ್ನ ಚಿತ್ರಗಳನ್ನು ಏನು ಮಾಡಿದ್ದಾರೆ ಎಂಬುದು ಗೊತ್ತಿಲ್ಲದಿರುವುದೇ ರಾತ್ರಿ ನಿದ್ರೆ ಬಾರದಂತೆ ಮಾಡುತ್ತದೆ. ಇಂಟರ್ನೆಟ್ನಲ್ಲಿ ಒಮ್ಮೆ ಹೋದರೆ ಯಾವುದೂ ಸಂಪೂರ್ಣವಾಗಿ ಅಳಿದುಹೋಗುವುದಿಲ್ಲ,” ಎಂದು ಅವರು ಕಣ್ಣೀರಿಟ್ಟಿದ್ದಾರೆ.
ಪ್ರಕರಣ ಬೆಳಕಿಗೆ ಬಂದಿದ್ದು ಹೇಗೆ?
2025ರ ಜೂನ್ನಲ್ಲಿ ಟೊಲೆಡೊ ಆಸ್ಪತ್ರೆಯ ರೆನೆಸಾನ್ಸ್ ಟವರ್ನ ಯುನಿಸೆಕ್ಸ್ ಶೌಚಾಲಯದಲ್ಲಿ ಪೆಟ್ಟಿಗೆಯೊಳಗೆ ಅಡಗಿಸಿಟ್ಟಿದ್ದ ಮೊಬೈಲ್ ಫೋನ್ನ್ನು ಆಸ್ಪತ್ರೆಯ ಸಿಬ್ಬಂದಿಯೊಬ್ಬರು ಪತ್ತೆಹಚ್ಚಿದ ಬಳಿಕ ಪ್ರಕರಣ ಬೆಳಕಿಗೆ ಬಂದಿದೆ.ಪ್ರಾಸಿಕ್ಯೂಷನ್ ಪ್ರಕಾರ, ಮತ್ತೊಬ್ಬ ಸಿಬ್ಬಂದಿ ಫೋನ್ ತೆಗೆದುಹಾಕಲು ಮುಂದಾದಾಗ ದೇಶ್ಮುಖ್ ಅದನ್ನು ಮರಳಿ ಪಡೆಯಲು ಯತ್ನಿಸಿ, ಅದು ತನ್ನದೇ ಮೊಬೈಲ್ ಎಂದು ಹೇಳಿದ್ದಾನೆ.
82 ಚಿತ್ರಗಳು ಪತ್ತೆ
ಪ್ರೊಮೆಡಿಕಾ ಮತ್ತು ಟೊಲೆಡೊ ಪೊಲೀಸ್ ಇಲಾಖೆಯ ಜಂಟಿ ತನಿಖೆಯಲ್ಲಿ ಆ ಮೊಬೈಲ್ನಿಂದ 2025ರ ಫೆಬ್ರವರಿಯಿಂದ ಮೇ ತಿಂಗಳವರೆಗೆ ತೆಗೆದ 82 ಚಿತ್ರಗಳು ಪತ್ತೆಯಾಗಿವೆ. ತನಿಖೆಯಲ್ಲಿ ಆರು ಮಹಿಳೆಯರನ್ನು ಸಂತ್ರಸ್ತೆಯರೆಂದು ಗುರುತಿಸಲಾಗಿದ್ದು, ಅವರ ಅನುಮತಿಯಿಲ್ಲದೆ ಚಿತ್ರೀಕರಣ ನಡೆಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇನ್ನೂ ಹೆಚ್ಚಿನ ಸಂತ್ರಸ್ತೆಯರು ಇರಬಹುದೆಂಬ ಅನುಮಾನವನ್ನೂ ವ್ಯಕ್ತಪಡಿಸಿದ್ದಾರೆ.ಇದೇ ವೇಳೆ, ತನಿಖಾಧಿಕಾರಿಗಳು 2018ರಿಂದಲೇ ಇದೇ ರೀತಿಯ ಗುಪ್ತ ಚಿತ್ರೀಕರಣ ನಡೆದಿರಬಹುದಾದ ಸುಳಿವುಗಳು ದೊರೆತಿವೆ ಎಂದು ನ್ಯಾಯಾಲಯದಲ್ಲಿ ತಿಳಿಸಲಾಗಿದೆ.
ವಿಶ್ವವಿದ್ಯಾಲಯದ ಕ್ರಮ
ಘಟನೆ ಬೆಳಕಿಗೆ ಬಂದ ತಕ್ಷಣ ಯುನಿವರ್ಸಿಟಿ ಆಫ್ ಟೊಲೆಡೊ ದೇಶ್ಮುಖ್ ಅವರನ್ನು ಆಡಳಿತಾತ್ಮಕ ರಜೆಗೆ ಕಳುಹಿಸಿತ್ತು. ಬಳಿಕ ಆಂತರಿಕ ತನಿಖೆ ನಡೆಸಿದ ವಿಶ್ವವಿದ್ಯಾಲಯ, ಅವರ ರೆಸಿಡೆನ್ಸಿ ನೇಮಕಾತಿಯನ್ನು ನವೀಕರಿಸದೆ ಸೇವೆಯಿಂದ ದೂರ ಮಾಡಿದೆ.
